سرمچاری چے ءَ گْوش اَنت؟ نبشتہ کار: ھانی بلوچ

اے گپ ءِ تہ ءَ ھچ شک نیست کہ زبان دوستی آجوئی جنگ ءِ مستریں بھرے ءُ ایشی ءِ مستریں درور ایش اِنت کہ بنگالی راج ءَ وتی آجوئی جنگ ءِ بنگیج چہ زبان ءَ کتگ ، پمیشکا مارا اول راجی زبان ءِ سرمچار بوگ لوٹ اِیت داں راج ءِ تہ ءَ زبان دوستی ءِ مھکمیں مھر ودی بہ بیت۔ انی شما ھمے جیڑ اِت ءُ سرپد بَہ اِت کہ تھنا ھما مردم پہ وتی راجی آجوئی ءِ ھاتر ءَ تپنگے بڈ ءَ بہ کنت ءُ گوں دژمن ءَ جنگ بہ کنت آئی ءَ سرمچار گْوش اَنت ، بلے چوش نہ اِنت۔ پرچا کہ ساری ءَ بازیں مردمے ءَ پہ راجی آجوئی ءِ موکگ ءَ سلاہ چست کت ءُ پد ءَ تپنگ اِش دور داتگ ءُ دژمن ءِ دیم ءَ سرجھل بوتگ اَنت۔
راستی ءَ سرمچار تھنا ھما مردماں گْوش اَنت کہ آیاں راج ءِ سر ءَ زلم ءُ زوراکی گوں وتی چماں دیستگ ، راج ءُ ڈیھ ءِ گلامی مار اِتگ ، راجی زبان ، دود ءُ رواجانی لگتمالی مار اِتگ ، مات ءُ گْوھارانی درد ءُ کم شرپی مار اِتگ ، ءُ پد ءَ گوں آشوبی مارشتاں دژمن ءِ بگیر ءَ نپرت ودی کتگ ءُ پہ راجی آجوئی ءَ تپنگ چست کتگ ، آئی ءَ راجی سرمچار گْوش اَنت۔ سرمچار ھما راجی جھدکار ءَ گْوش اَنت کہ آ زبان دوست ، راجدوست ءُ ڈیھ دوست بہ بیت ءُ مدام پہ راجی سیت ءُ ڈیھ ءِ آجوئی ءَ یک مھکمیں جھدکار ءُ راجی جز ءِ باسکے بہ بیت۔ پْروش ورگ ءِ ھیال آئی ءِ دل ءُ گمان ءِ تہ ءَ  ھچبر مہ بیت ، بلکیں پہ وتی جھد ءِ سوبمندی ءَ یکشل ءَ کار بہ کنت سرمچارے گْوش اَنت۔ بزاں یک مھکمیں راجی جھدکارے ءَ سرمچار گْوش اَنت کہ آ توری استاد ءُ نودربرے بہ بیت ، آ توری دھکان ءُ پوریاگرے بہ بیت۔

مئے بلوچ راج ءِ مستریں بے اگلی ایش اِنت کہ ما تھنا کوہ ءِ شتگیں گھگیریں براتاں سرمچار گْوش اِیں۔ ما گْوش اِیں کہ تھنا کوہ ءِ بْرات ءُ گْوھار گوں دژمن ءَ جنگ بہ کن اَنت ءُ ماتیں بلوچستان آجو ءُ اے گیرتمندیں بلوچ راج ءَ وتی ڈیھ ءِ وتواجہ بہ کن اَنت۔ ما وت پہ راج ءُ راجی زبان ءَ ھچ نہ کن اِیں ، تھنا ماں گساں نند اِیں اردو ءُ پارسی ءَ وان اِیں ، پاکستانی ءُ ایرانی ڈرامہ چار اِیں ءُ گْوش اِیں کہ منی جند ءَ ھچ راجی زمہ واری نیست ءُ من چہ ھر وڑیں راجی زمہ واریاں آجو آں۔

البت راستی و ایش اِنت کہ اگاں مئے دل لوٹ اِیت گڑا ما ھرکس پہ راج ءُ وتن ءَ بازیں چیزے کت کن اِیں ، بلے بئے ایش اِنت کہ مارا کار کنگ ءِ واھشت بہ بیت۔ ما گوں ایمانداری ءَ وت ءَ راجدوست بہ پھم اِیں۔ راستی ءَ ما دْراہ وت ءَ بازیں وڑے ءَ راجی آجوئی ءِ جنگ ءَ ھوار کت کن اِیں۔ اگاں یک راجے زورگریں دژمنے ءِ ایردست بیت ، گڑا اود ءَ سرمچاراں ھوار راج ءِ استاد ، نودربر ءُ راج ءِ سرجمیں وانندھانی زمہ واری ھم سک گیش اَنت۔ مرچاں بلوچ استاد ، نودربر ءُ وانندھانی زمہ واری چے اَنت؟ اے بابت ءَ اول مارا بنگلادیش ءِ راجی آشوب ءُ آجوئی ءِ جنگ وانگ لوٹ اِیت کہ 1952 ءَ ھمے بنگلادیش ءِ اسکول، کالج ءُ یونیورسٹیانی زبان دوستیں نودربراں پہ وتی راجی زبان ءِ پھریزگ ءَ بنگالی استاد ، کواس ، شائر ءُ شھزانت یکجاہ کت ءُ پاکستان ءِ سوڑگ ءِ بگیر ءَ زبان ءِ جز “بھشا آندولن” ءِ زھرشانی ئیں روانک ءُ نندانک برجاہ کت اَنت۔ چہ ایشی ءَ بنگالی راج ءِ تہ ءَ دژمن ءِ بگیر ءَ نپرت ودی بوت ءُ پد ءَ وتی دژمن ءَ را 1971 ءَ پروش داتگ اِش۔ جھان ءِ آشوبی مردم گْوش اَنت “داں وھدیکہ یک گلامیں راجے زبان دوست ، راجدوست ءُ گوں وتی دژمن ءَ نپرت مہ کنت آ راج ھچبر آجو نہ بیت”

گند ئے زبان ءِ وانگ ، زانگ ءُ نبیسگ گلامیں راجاں زبان دوست ءُ یکجاہ کنت ، زبان دوستیں مھلوک راجدوست بہ اَنت ءُ راجدوستیں مھلوک وتی ڈیھ ءِ گلامی ءَ نہ منّ اِیت۔ اے درگت ءَ زبانزانت ءُ راجدوست واجہ ناگمان بلوچ گْوش اِیت “داں کہ کسے زبان دوست مہ بیت آ راجدوست بیت نہ کنت۔”

پمیشکا دوئیں پاکستان ءُ ایران ھم نہ لوٹ اَنت کہ بلوچ راج وتی راجی زبان ءَ بہ وان اَنت ءُ راجدوست بہ بہ اَنت۔
ھمے رنگ ءَ بے زالبول ءِ بھر ءَ جھان ءِ ھچ راجی آشوب ءُ آجوئی ءِ جھد سوبین نہ بیتگ ، پرچا کہ زالبول راج ءِ نیم بھر اِنت۔ پمیشکا راجی آشوب ءُ بلوچ آجوئی ءِ جنگ ءَ بلوچ زالبولاں ھم بھر زورگ لوٹ اِیت ءُ ماشااللہ ما گوں پھر ءُ ناز ءَ گْوش اِیں کہ مئے بلوچ راج ءِ گْوھار بلوچ راجی آجوئی جنگ ءَ ھوار اَنت ءُ شریں وڑے ءَ بھر ھم زورگ ءَ اَنت ، پمیشکا تو ھم بھر زرت کن ئے۔  ما شمارا اے و نہ گْوش اِیں کہ شما دْراہ تپنگ چست بہ کن اِت۔

گْوشگ ءِ مراد تھنا ایش اِنت کہ تو وتی وس ءُ واک ءِ رِد ءَ راجی سرمچارے بوت کن ئے ، بلے اے درگت ءَ ترا کمیں وتی چم ءُ اگل پچ کنگی اِنت۔ ترا پہ راجی آجوئی ءَ کار کنگ لوٹ اِیت کہ آ توری راج ءِ تہ ءَ دژمن ءِ بگیر ءَ نپرت ودی کنگ ءِ کار بہ بیت ، توری تپنگ چِست کنگ بہ بیت یا توری زبان دوستی ءُ راجدوستی بہ بیت ، بزاں کہ ھر وڑ ءُ دْروشم ءَ زالبولاں وتی براتیں سرمچارانی ھم کوپگ بوگ لوٹ اِیت۔

باید اِنت ما وت ءَ دلپروش ءُ دلگران مہ کن اِیں ، پْروش مہ ور اِیں کہ من وانگجاھاں بلوچی نہ ونتگ پمیشکا انی من ھچ نہ زان آں یا من بلوچی نبیسگ ءَ نزور (سُست) آں ، بلکیں ما وت ءَ راجی زبان ءِ مھکمیں سرمچار ، جھدکار ءُ ھزمتکار جوڑ بہ کن اِیں۔ گیش ءَ چہ گیش بلوچی درونت ءُ راجدوستی ءِ نبشتانک وانان بہ کن ایں ءُ پہ گلامیں راج ءِ آگاھی ءُ پہ دژمن ءِ بگیر ءَ نپرت ودی کنگ ءَ مدام بلوچ نبشتہ بہ کن اِیں ، پرچا کہ مارا گلامی ءُ دژمن ءِ زلم ءُ زورانسری ءِ بگیر ءَ نبیسگ ءُ دژمن ءِ بگیر ءَ نپرت ودی کنگی اِنت۔

گند ئے شمئے راجی زمہ واری تھنا راج ءِ تہ ءَ زانت ءُ سرپدی ودی کنگی اِنت کہ بلوچ یک جتائیں راجے ءُ ما گوں پنجابی ءَ ھچ وڑیں سیادی ءُ نزیکی نہ دار اِیں ، ءُ بلوچ ءِ وتی جتائیں سرڈگار ، رواج ءُ شاھگانیں زبان ھست اَنت ، پمیشکا ما وتی ڈیھ ءِ آجوئی ءُ وتواجھی لوٹ اِیں۔ گڑا باید اِنت بلوچ راج پہ وتی پجار ءُ ھستی ءِ واستا یکجاہ ، ھم کوپگ ءُ یک مشت بہ بیت۔ اِے درگت ءَ بلوچ زالبولاں وتی راجی زمہ واری ءُ کرد دلگوش کنگی اَنت۔ ھاس ما گوں کالج ءُ یونیورسٹی ءِ نودربراں دزبندی کن اِیں کہ شما راج ءِ امیت ءُ باندات ءِ رھشون اِت۔ وتی موبائلاں پہ زبان ءُ راجدوستی ءَ کارمرز بہ کن اِت۔ چہ درستاں پیسر بلوچی درونت ءُ راجدوستی نبشتانکاں وانان ءَ وت ءَ راجی زبان ءِ سرمچار جوڑ بہ کن  اِت۔

شالا راج ءِ وانندہ راجی زبان ءِ سرمچار ءُ جھدکار جوڑ بات اَنت ، بلوچ راج شالا تپاک ، یک مشت ءُ ھمدست بات۔ راج ءِ نودربر شالا زبان دوست ءُ راجدوست بات اَنت۔ بلوچی ءُ بلوچستان شالا دیمروئی بہ کنات۔