کمانچر بلوچ راج ءُ بلوچستان ءِ ھما نام ءُ توار اِنت کہ کدی شموشگ ءُ بے ھیال کنگ نہ بیت ، ناں کہ ما کمانچر ءِ گچینیں کرد ، بُر اِتگیں پند ءُ ھید ریچی ءَ شموشت کن اِیں۔ اے راستی یے کہ جوانیں کرد بنی آدم ءَ گار ءُ گمسار بوگ نیل اِیت ، ءُ کمانچر ھما کارستاں چہ یکے کہ آئی نمیرانی ءِ بے ملیں پاگ وتی سر ءَ بست ءُ زندمان ءِ لد ءَ وت ءَ پہ دائمی ابدمان کت۔
کمانچر بلوچ ایردستیں راج ءِ ھما آزاتیں پسگ اَت کہ آئی ءَ وتی زند ءِ چاریں روچ پہ آزاتی ءُ تمردی راج ءُ سر ڈگار ءِ نام ءَ کتگ اَت اَنت۔ اے ھبر بھ مانا نہ دار اِیت کہ تو چنکس روچ زندگ بوتگ ئے ءُ ساہ کش اِتگ ، بلکیں پہ سسا ءُ آجوئیں انسانے ءَ اے ھبر پُر مانا ءُ زیبا ِانت کہ آئی وتی زند ءِ چاریں روچ چون ءُ چتور گْوازینتگ اَنت۔
پمیشکا! اے ھبر مارا ھچبر کھتیگ بوگ ءَ نیل اِیت ، پرچا کہ کمانچر ءِ زند سک زیبا ءُ ڈولدار بوتگ۔ آئی ءِ پگر ءُ لیکہ ءِ سپر کدی تامور ءُ بے مانا نہ اَت ، بلکیں کمانچر ءِ توکل چو البرز ءِ کوہ ءَ بُرز اَت۔ آئی ءَ را پاداں کدی نہ دْروہ اِتگ اَت ، ءُ کمانچر مدام گوں ماتیں وتن ءِ زیبائیں ندارگاں گپ ءُ تران ءَ اَت۔ مارا ڈسگ ءَ اَت کہ بلوچستان سک زیبا ءُ ڈولدار اِنت ، بلے دست ء ناکساں کپتگ ءُ مجاں گپتگ۔
چوش کہ کمانچر ءِ گونگیں بالادانی چر اے گیدی ءَ سپر کنگ پہ ایردستیں راج ءُ بندیگیں سرڈگار ءَ ھما تاوان اِنت کہ کرن پدی بہ بہ اَنت آئی ءِ لاگریں بالاد ءِ جاہ ھورک ءُ ھالیگ اِنت ، بلے بژن پمیشکا درشانگ نہ بیت کہ کمانچر ءَ وتی بھر ءِ کار شریں رنگے ءَ پیلو کرت اَنت۔
ھو! آئی ءِ کار داں ھما وھد ءَ سرجم نہ اَنت ، داں بلوچ وتی ماتیں مرزبوم بلوچستان ءِ ھاک ءَ ساہ کشگ ءَ اِنت۔
پرچا کہ کمانچر ءِ مدام واھگ ءُ واھشت ھمے بوتگ کہ من بلوچ ءَ بلوچستان ءِ زیبائی ءَ وتی اکسانی اندر ءَ گوں جوانیں رنگے ءَ پیش بہ داران ءُ جھان ءَ بہ ڈساں کہ بلوچ ءِ مرچی ئیں زند راستے کہ گرانیں مشکل ، اڑ ءُ جنجالانی دیپمان اِنت ، بلے بلوچ راج ءَ را شاھیں کادر ءَ یک انچیں سرڈگارے ءِ ھدابند کتگ کہ شما آئی ءِ ندارگاں الم بہ گند اِت ، ءُ گندگ ءَ ھوار بہ مار اِت کہ پُر گنجیں سرڈگار ءِ واھند پرچا شدیک ، درتہ پچ ، پاد شپاد ءُ گژنگ اِنت؟
پمیشکا من یک کسانیں نبشتہ کار ءُ راجکاریں باسکے ءِ بستار ءَ ھمے جیڑان ءُ سما کن آں کہ کمانچر وتی تھانگ ءَ واجہ گلام مھمد ، یلیں شیرل ءُ لالا منیر اَت۔ چوش کہ نمیرانیں بلوچ راجی راھشون ءُ بلوچ نیشنل مومنٹ ءِ بن ھشت ایر کنوکیں کماش واجہ گلام مھمد ءَ وتی گْوشتانکانی تہ ءَ مدام بلوچ ءِ ایردستی ، بزگ ءُ لاچای ، درتہ پچی ، پادشپاد ءُ تنگدستی ءِ درد مینتگیں کسہ جھان ءَ را گْوشتگ ءُ سرپد کرتگ کہ آئی پژدر ءِ گْوستانکی داستان چی اِنت ، ءُ کمانچر ءَ ھمے راج ءِ بزگی ، درتہ پچی ، ایردستی ءُ پادشپادی ءِ کسہ ءِ سوگا کنگ ءِ ھاتر ءَ وتی بے زبانیں کیمرہ کار بستگ ءُ زبان داتگ کہ پُر گنجیں سرڈگار ءِ واھند ءِ زندمان اے مشکلانی دیمپان ، پرچا۔۔۔؟
گڈی ءَ من گوں وتی باسمائیں بلوچ راج ءُ سوھوئیں ورناھاں ھمے گْوشگ لوٹ آں کہ مئے ءُ شمئے تھانگ ءَ کمانچر گونگیں بامردے ھست ، آئی ءَ ٹوھینگ ءُ کمانچر ءِ رند پداں راھی کنگ ءِ زلورت اِنت ، پرچا کہ کمانچر مئے ءُ شمئے برات اَت۔ بلوچے اَت ، ءُ راستیں ھبر ھمیش اِنت کہ کمانچر وتی تھانگ ءِ باسمائیں مردم ءِ پولگ ءَ کامیات ءُ سوبمند بوتگ اَت۔
زیک ءُ مروچی بلوچ ءِ زھگ زھگ ءَ گْوشتگ ءُ گْوش اِیت من بالاچ ءُ دودا ، پیرک ءُ وپا بوگ لوٹاں کہ منی راج ءِ تمردیں بامرد اَنت ، ھمے وڑ ءَ مروچی بلوچ ءِ زھگ زھگ گْوش اِیت من کمانچر بہ آں۔ ایردستیں بلوچ ءُ بلوچستان ءِ بزگی ءَ چہ مجاں در بہ کن آں ، پریم ءِ دْروشم ءَ چو کمانچر ءَ زبانے بہ دئے آں۔
ھانل پہ ترا چمان اِنت
گْران ءُ مشکلیں ھرچ کارے
(سید ھاشمی)
