کمانچر بلوچستان ءِ کمان اَت نبشہ کار: سمی اللہ رھیم

من کمانچر بھ نہ دیستگ ، بس انسٹاگرام ءَ کدی کدی ھال اھوالے بوتگ ءُ زانتگ کہ یک جوانیں اکس گر ءُ شوکیں انسانے۔ من ءَ یات بیت سال 2019 اَت من ءَ کمانچر ءِ گندگ سک دل ءَ اَت ، بلے نہ زانت کہ گندانے یا ناں۔ یک روچے من ءُ منی سنگتے پہ وتی کارانی نیت ءَ بازار ءَ شت اِیں ، گڑا ھمد ءَ منی موبائل ءَ زنگے اتک چاراں سنگتے زنگ جنگ ءَ اِنت۔ من موبائل ءِ زنگ چست کت گوں ھبر ءَ ھور سنگت ءَ گْوشت ” بہ یا کمانچر اتکگ ءُ ترا لوٹگ ءَ اِنت “۔
من گل بوت آں کہ مرچی من بلوچستان ءِ اکس گریں ھستی ءَ گند آں ، گڑا ھمد ءَ ما زوت وتی کار گیشوار ءُ دیم پہ سنگت ءِ لوگ ءِ نیمگ ءَ شت اِیں۔ ما کہ سنگت لوگ ءِ نزیک ءَ سر بوت اِیں ، گوں سنگت ءَ موبائل ءَ ھال کت کہ ڈن ءَ بہ یا ما اتکگ ءُ در ءِ دپ ءَ اِیں۔ سنگت اتک سلام ءُ دْروت بوت اِیں ، پد ءَ سنگت ءَ گْوشت ” بریں کہ مجلس برجم اِنت ، کمانچر تئی وداریگ ءُ ترا گندگ لوٹ اِیت “۔
من بس وتی دل ءَ ھمے جیڑگ ءَ اَت آں کہ کمانچر باریں چونیں مردمے ءُ چونیں تب ءِ انسانے بیت ، پرچا کہ اِش کتگیں گپ ءُ چم دیستگین ءَ زمین ءُ آزمان ءِ پرک بیت۔ ھیر ما شت اِیں لوگ ءِ توکا ءُ مجلس ءَ سر بوت اِیں ، سلام ءُ دْروت ءَ پد نشتیں ءُ ھبر بندات بوت۔

من کسانیں ساھتے ءَ پد جست کت کہ کمانچر ءَ من ءَ پیشدار اَت ، شمئے تہ ءَ کمانچر کجام اِنت؟ کمانچر ءَ ھمد ءَ مزاک ءِ توکا دگہ سنگتے ءِ نیمگ ءَ وتی دست دْراج کت ءُ گْوشت ” اِش اِنت ” ، ءُ پد ءَ وت کندگ ءَ لگ اِت۔ گڑا ھمے دمان ءَ سنگت ءَ گْوشت ” من نہ آں ، کمانچر ھمیشی ءِ جند اِنت کہ مسکرا کنگ ءَ اِنت” ۔
منی کر ءَ گپ ھچ نیست اَت ، من بس گْوشت دگہ تو وش جوڑ ئے ، تئی مھلوک وشاں ، ھند ُ دمگ وش بیتگ اَنت؟
گڑا پہ مھروانی درائینت ءُ گْوشت ئے ” کل وشاں ، من ھم یک ءِ سر ءَ آں ، برابراں ” ، من پسو ءَ گْوشت ھدا وش بہ کنت ءُ وش بات ئے ، گڑا منی ھمراہ ءَ جست کت ” زوھیر شما نیاؤرتگ گوں؟ “۔
کمانچر ءَ منی ھمراہ ءِ پسہ دات کہ ” ناں یار! زوھیر ءَ کمیں کار بیتگ ءُ دگہ نیمگے شتگ ، پمیشکا آھگے نہ بیتگ”۔

منی جند ءَ کمانچر ءِ یک ھبرے ءِ سر ءَ بھ باور نہ بیتگ کہ کمانچر یک کْوھنیں ماڈل ءِ ٹیلپونے ءِ سر ءَ چوں چوشیں جوانیں اکسکاری کت کنت ، ءُ مُدام وت ھم ھمے گپے انسٹاگرام ءَ لایب ءَ جتگ کہ من یک کْوھنیں نوکیا ءِ سر ءِ اکسکاری کناں ، بلے من ءَ بھ باور نہ بیتگ۔

من مدام کلوہ داتگ ءُ پرس اِتگ من ءَ تئی ٹیلپون ءَ چہ شرتریں ٹیلپونے گون ءُ دی ایس لِر کیمرھے ھم ، بلے منی گوم ءَ تئی وڑ ءَ اکسکاری نہ بیت۔ من ءَ مزاک ءِ سر ءَ گْوشت ئے ” تو گڑا کیمرہ ءِ وڑ ءَ نہ زان ئے ، کیمرہ ءَ بہ دئے من ءَ “۔
من گْوشت کربان اڑے تئیگ اِنت، کج ءَ دیمے بہ دئے آں؟
آئی ءَ پہ مھر ءُ بچکند گْوشت ” اڑے پل من مزاک کن آں ، تئی اکس شوک ءُ جوان اَنت بس پوٹوگراپی کنان بہ کن۔ وتی ھند ءُ دمگاں پیشداران بہ کن ھرکس ءَ “۔

کمانچر ءَ من ءَ مدام دلبڈی دات ، من مرچی ھمے گپاں یات کناں ءُ سرپد بہ آں کہ کمانچر منی استاد بیتگ ، ءُ پد ءَ ما کا اِیں دیوان ءَ کہ من کمانچر ءَ جست کت تئی ھمے ٹیلپون کجیں کہ تو ھمیشی ءِ سر ءَ اکسکاری کن ئے؟ کمانچر ءَ ھما دمان ءَ پسہ دات کہ ” من نیاؤرتگ گوں ” ، من ھم ھچ نہ گْوشت۔
منی زند ءِ کار باز اَت اَنت ، گڑا ما سنگت موکل کرت اَنت کہ مارا موکل بہ دئے اِت باز کار ھست ، بلے شما باند ءَ بہ یا اِت منی کر ءَ سبارگ ءَ ، گڑا کمانچر ءَ گْوشت کہ ” ما باند ءَ جاھے روگ ءَ اِیں ، باند ءَ نہ بیت ءُ پونشی ما رو اِیں کیچ ءَ  ، پد ءَ زندگی بیت الم کا اِیں “، من گْوشت ھیر! اگاں نہ شت ئے الم بہ یا اِت، گڑا پہ بچکندگ گْوشت ئے ” ھیر بیت اِنت اِنشااللّہ ” ،  گڑا  ما موکل کت ءُ درکپت اِیں۔

چہ موکل ءَ پد ما دیم پہ وتی نیمگ ءَ جز اِت اِیں ، بلے برے برے ھال اھوال ءُ وھد دیم ءَ کنزان اَت۔ یک روچے کمانچر ءَ من ءَ ھال کت کہ ” کج ءَ ئے؟ ” ، من گْوشت گْوادر ءَ ، پد ءَ گْوشت ئے کہ ” تو کارے بہ کن ” ، من گْوشت بہ گْوش ، ” تو برو انیتا جلیل ءِ کر ءَ لھتیں کتاباں دز بہ گر اِش ءُ شاھین ٹرانسپورت ءَ بر اِش ءُ ماں تربت ءَ گون اِش کن ، من انیتا گْوشتگ کہ سنگتے کئیت کتاباں بہ دئے اِش “۔
من گْوشت شر! چد ءُ پیسر ناں من انیتا جلیل دیستگ ناں کہ انیتا جلیل ءِ لوگ، ھیر من سنگتے کلوہ دات ءُ جست کت کہ تو انیتا جلیل ءِ لوگ دیستگ اَنت؟ سنگت ءَ گْوشت “ھو!” من گْوشت منی ھمراہ بو من ءَ کارے ھست کہ سنگتے ءِ لھتیں کتاباں چہ ھمود ءَ دزگرگی ءُ تربت ءَ دیم دیگی اَنت ، گْوشت ئے ” شریں! بلے کدی؟ ” ، من گْوشت مرچی بیگاہ ءَ۔ گڑا سنگت ءَ گْوشت “شریں”۔
وھدے بیگاہ بوت ما شت اِیں انیتا جلیل ءِ لوگ ءَ کتاب دزگپت ءُ ٹرانسپورت ءَ دات اَنت ، گڑا من ھمد ءَ کمانچر ھال کت کہ من کتاب گوں کرتگ اَنت۔ ءُ کتابانی اکس تئی وٹس ایپ ءَ دیم داتگ ، گْوشت ئے ” منتوار”۔

وھد گوازان بوت ، ھال اھوال برجاہ اَت ، بلے پد ءَ ناں من کمانچر دیست ءُ ناں کہ کمانچر ءَ من ءَ ، بس کدی کدی ھال ءُ اھوال بوت۔ انوں لھتیں روچ ساری یکے ءَ وتی اسٹوری ءَ اکس ایر کتگ اَت کہ کمانچر نادْراہ اِنت۔ من دل ءَ گْوشت اے بزگ مدام نادْراہ اِنت ، ھدا وت ایشی ءَ وش بہ کنت۔

ھمے میان ءَ لھتیں روچ گْوست ، بلے تو وش نہ بوت ئِے ، گڑا شانزدہ (16) اپریل ءَ سنگتے ءَ وٹس ایپ ءِ اسٹوری ءَ اکسے جتگ اَت کہ ” آہ کمانچر! ھدا ترا جنت نسیب بہ کنت۔۔۔۔
گوں اے دانکانی گندگ ءَ ھوار من ناں سنگت کلوہ کت ناں کہ دگہ کسے ءَ گوں ھال کت ، شت آں انسٹگرام ءَ چاراں جمال بلوچ ءَ ھم اکس جتگ۔ من اِد ءَ کہ تئی اکس دیست ، گڑا نی من باور کت کہ تو رپتگ ئِے ، بلے کمانچر تو گپے زان ئِے ترا چو اشتاپ ءُ زوت روگی نہ اَت ، بلکیں ترا انگت گوں وتی کیمرہ ءَ باز اکسکاری کنگی اَت۔ ترا باز پند برگی اَت ، بلے ھدا تئی جاہ ءَ مدام وش بہ کنات ، رکست اپ ھواراں کمانچر! ، رکست اپ ھواراں۔۔۔۔۔

سلام دیدگاں تئی
( کمانچر بلوچ ءِ نام ءَ )
ندارگانی لاڈُکی ءِ..
لاڈکیں تو سنگت ءِ..
زمین ءِ رنگ ءَ زندگ ءِ..
شُلُنچ ءِ اکس بے مثال..
نگاہ ءِ تُنّی ایں زر ءَ..
ھمے کہ رنگی ایں تئ جھان ءَ..
ایر باں کدم..
تو بےکساس دوست بئے..
دل ءُ ھیالاں پچگرءِ..
بلوچ ءِ زندمانی ءِ..
عزابیانی ءَ پولگ ءَ..
اے کِسّہ ءِ پہازگ ءَ..
سلام دیدگاں تئی..
سلام دیدگاں تئ..

(مولُم چراگ)