دگنیا روچ پہ روچ دیمروئی کنگ ءَ اِنت ، ءُ ھمے دیمروئی ءِ سبب ءَ بازیں چیزانی توکا مٹ ءُ بدلی پیداک اِنت۔ ڈیجیٹل زمانگ ءَ دگنیا ءِ رنگ ءُ داب مٹ کرتگ ، چوش کہ ھمے مٹی ءُ بدلیانی برورد ءَ رسانکدر ءِ ھم دْروشم مٹ ءُ بدل بیتگ۔ زی روتاک ءُ پنتاک ءِ زمانگ بیتگ ، مرچی چاگردی رسانکدر ایشانی برورد ءَ کارمز بوگ ءَ اِنت۔ چاگردی رسناکدر ءَ دگنیا یک گوانکویے ءِ توکا کید کتگ ، مرچی دگنیا ءِ سرجمیں ھال مردماں ماں یک گوانکویے ءِ توکا رس اَنت۔
ھستیں وھد ءَ چاگردی رسانکدر پہ پروپیگنڈہ ، سیاست ، واپار ءُ دگہ بازیں چیزاں پہ کارمز بیت۔ چاگردی رسانکدر یک آزاتیں رسانکدرے ، چوناھیا دگنیا ءِ دگہ ھچ رسانکدر آزات نہ اِنت۔ دگنیا ءِ توکا وت ءَ منارینگ ءِ یک مستریں ازبابے گْوشت کن ئے کہ رسانکدر اِنت۔ دگنیا ءِ واپاری مردم پہ وتی واپار ءَ سرجمیں دگنیا ءَ شنگ کنگ ءِ واستا چاگردی رسانکدر ءَ کارمز کن اَنت۔ چوش کہ ما چاگردی رسانکدر ءِ توکا اے ھم گند اِیں کہ وڑ وڑیں چیزانی (Advertisement) دست کپ اِیت ، ءُ اود ءَ واپاری مردم وتی چیزاں بھا کنگ ءَ اَنت۔ چی ءَ کہ چاگردی رسانکدر ءَ دگنیا ءَ بازیں مٹ ءُ بدلی آؤرتگ۔
ھمے رنگ ءَ مرچی جھان ءَ یک جنگے جزگ ءَ اِنت ، آ جنگ پپت جنریشن وارپئیر نام ءَ زانگ بیت۔ پپت جنریشن وارپئیر سرجم ءَ جاگردی رسانکدر ءِ سر جزگ ءَ اِنت۔ اے ھبر مارا زانگ لوٹ اِیت کہ اگاں چاگردی رسانکدر بہ بیت یا رسانکدر ءِ جند یک ملکے ایشی ءَ پہ وتی مشینری ءَ کارمز کنت۔ دگنیا ءِ توکا نامداریں چاگردی رسانکدر کہ ایکس (X) ءِ نام ءَ زانگ بیت ، ھمے ایکس دگنیا ءِ مستریں سیاسی چاگردی رسانکدر اِنت۔ ایکس یک سکیں شریں چاگردی پلیٹ پارمے پہ وتی ھبرانی دیم ءَ شنگ کنگ ءُ وتی جیڑھانی ماں دگنیا ءِ دیم ءَ پدر کنگ ءَ۔
چاگردی رسانکدر ءِ روچ پہ روچ گیش بوگ ءِ سبب اے سکیں مھکمیں پروپیگنڈہ ءِ سازمانے (Tool) جوڑ بیتگ۔ چوش کہ پروپیگنڈہ ءِ یک مستریں سببے ایش اِنت کہ چاگردی رسانکدر ءِ توکا پروپیگنڈہ زوت شنگ ءُ تالان بیت۔ چاگردی رسانکدر ءِ کارمز کنوک روچ پہ روچ گیش بْوان اَنت۔ چاگردی رسانکدر ءَ ھر یکے وتی رنگ ءَ کارمرز کنت ، بلے ایشی تہ ءَ چاگردی مردم پہ چاگرد ءَ کارمز کنت ءُ سیاسی مردم پہ وتی سیاسی جست ءُ ایرانی ھاتر ءَ کارمزے کن اَنت۔
ھمے وڑ ءَ چاگردی رسانکدر ءِ توکا پروپیگنڈہ ھم یک شریں رنگے ءَ کارمز بوگ ءَ اِنت۔ مئے دیم ءَ پدر اِنت کہ مرچی زور بیگوائیں بلوچانی درگت ءَ پاکستانی رسانکدر ءُ چاگردی رسانکدر ءِ کارمز کنوک یک مزنیں رنگے ءَ پروپیگنڈہ کنگ ءَ اِنت۔ پاکستان ءَ وتی مردم داشتگ اَنت کہ آ چاگردی رسانکدر ءِ توکا پروپیگنڈہ بہ کن اَنت۔ مرچی ھمے پاکستانی پروپیگنڈہ ءِ سبب ءَ دگنیا ءِ دیم ءَ بلوچ ءِ جیڑہ گچینیں دابے ءَ پیشداشتگ۔
وھدے چاگردی ءُ ماس رسانکدر ءِ بابت ءَ آکسپورڈ انٹرنیٹ انسٹی ٹیوٹ ءِ ولیم ڈٹن ءَ جست بیت ، گڑا آ گْوش اِیت کہ “ما انچیں نیٹورک ءُ زورآوریں آواز گندگ ءَ اِیں کہ ایشی ءَ ماس رسانکدر چہ گیش راستیں آواز ءُ کار کت کنگ ءَ اِنت”۔ چاگردی رسانکدر ءِ کارمز کنگ ، پروپیگنڈہ کنگ ءَ بائد ما درست آشنا بہ بہ اِیں ، پرچا کہ چاگردی رسانکدر پہ ما یک مزنیں ءُ توانائیں آوازے بیت کنت۔
