اڑے کمانچر! چوشیں بے وپائی ، تو زان ءَ نہ زانگ اَت کہ تئی ناگتیں روگ پہ بلوچ راج ءُ سرجمیں بلوچستان ءَ یک بلائیں تاوانے ؟، پرچا کہ تو وتی اندر ءَ بلوچستان ءِ رنگ اَت ئِے۔ ءُ ناکو کمانچر ءِ نام ترا چہ وتی ازم ءِ برورد ءَ رستگ اَت۔
چوش کہ کمانچر مئے باریگ ءِ ھما ورنائیں اکس گِر بیتگ کہ آئی ءَ سرجمیں بلوچستان گول اِتگ۔ بلوچستان ءِ سرڈگار ، بلوچستان ءِ زیبائی ، دود ءُ ربیدگ ءِ اکس بندی کرتگ اَنت۔ من کمانچر ءَ گوں بھ دچار نہ کپتگ آں ، بلے منی یک بلائیں جھدے بیتگ کہ من گوں کمانچر ءَ دچار بہ کپان ءُ چہ آئی ءَ اکس گرگ ءِ درگت ءَ بازیں چیز در بہ براں ، بلے بے ریائیں وھد ءَ موہ نہ دات۔
پہ راستی من بلوچستان ءِ زیبائی ، بلوچ راج ءِ بزگی ، بیوسی ءُ درتہ پچی ءِ درد بکشیں ندارگ چہ کمانچر ءِ گپتگیں اکساں دیستگ اَنت۔ ھمے اکسانی کمک ءَ من کمانچر مدام دیستگ کہ بلوچ ءِ ناگیگیں جاوراں وتی کسانی دْروشم ءَ لس مھلوک ءَ را پہ پیشدارگ ءَ گلائیش اِنت۔ پہ درور لھتیں بلوچ بیتگ کہ آیاناں پہ ورگ ءَ نان ، پاداں چمپل ، گد پہ پوشگ ءَ ، آپ پہ ورگ ءَ ، لوگ پہ نندگ ءُ سر ءِ چیر دیگ ءَ ساھگ نہ بیتگ ، کمانچر ءَ اے درستانی اکس گپتگ اَنت ماں چاگردی رسانکدر ءَ شنگ ءُ تالان کرتگ اَنت داں بلوچ راج وتی بزگ ءُ بیوسیں راج ءَ کمک بہ کنت۔
اے سرڈگار ءُ راج ءِ مھر اَت کہ کمانچر ءَ مدام وتی بزگ ءُ درتہ پچیں راج ءِ ھیال ءُ دلگوش گور اَت۔ ھمے مھروانی ءِ پژدر ءَ من چہ کمانچر ءَ باز چیز در برتگ۔ من ءَ تامر ءُ اکس جوڑ کنگ ءِ ھب ءُ واھگ چہ کمانچر ءِ کش اِتگیں تامر ءُ اکساں بیتگ ، پمیشکا منی دل ءَ گْوشتگ کہ من ھم بلوچستان ءِ زیبائیں تامر ءُ اکس بہ کش آں۔
ھمے رنگ ءَ کہ من جیڑان ءُ سرپد بہ آں ، گڑا منی لیکہ ھمیش اِنت کہ کمانچر ءِ اکس کسہ بیتگ اَنت۔ اگاں یک نبشتہ کارے کمانچر ءِ اکسانی نیمگ ءَ چمشانکے بہ دنت ، گڑا آ اے چیز ءَ الم نبشتہ کنت کہ کمانچر ءِ اکسانی تہ ءَ وشی ، درد ءُ گم ، زانت ءُ سرپدی مان بیتگ۔ پمیشکا مرچی بلوچ راج ءِ اکس گرانی تہ ءَ گیشتر کمانچر ءَ منّ اَنت ، پرچا کہ کمانچر ءَ بلوچستان ءِ ھما زیبائی دیم ءَ آؤرتگ اَنت کہ ھرکس ءَ آیانان دوست داشتگ۔
اے درگت ءَ من ھمے گْوش آں کہ ترا وت ءَ زمینے ھست ، گڑا وتی زمین ءِ زیبائی ءَ پیش بدار کہ من ءَ وت ءَ زیبائیں سرڈگارے ھست۔ ءُ اے مھر ءَ آشنائیں کمانچر ءِ من کجام کسہ ءَ بہ کن آں ، پرچا کہ منی کر ءَ لبزانی کمی اِنت پہ آئی سپت ءُ ساڑاھگ ءَ۔
چی ءَ کہ بلوچ راج سرپد انت کہ کمانچر ءَ اے پڑ ءَ مزنیں جھدے کتگ ، گڑا آ وتی اے رنگیں مھرواناں کدی بے ھیال نہ کنت۔
مرچی سرجمیں بلوچستان پرسیگ اِنت ، ھرچ کنڈ ءَ برو کمانچر ءِ نام اِنت۔ پرے واستا من ءَ کمانچر ءِ کسانسالی ءَ روگ سک تورگ ءَ اِنت ، بلے چے کن ئے کہ ملکموت اچ وتی کول ءُ اکراراں پد نہ کنز اِیت کہ مردم ءَ اوپارے بروت۔بلے اے گپ ءَ من الم گْوش آں کہ کمانچر ءِ وڑیں درد وار کسے بہ گندئے بیت بہ کنت ، بلے کمانچر ھور ءُ ایروپ بہ بہ اَنت یا کہ زمین چنڈ ، گار ءُ بیگوائیں مات ءُ گْوھار بہ بہ اَنت یا ایدگہ بلوچ ءِ لبزانکی مجلس ، کمانچر ھر وھد ءَ ساڑی اَت۔
گڑا من ھمے سرپد بہ آں کہ کمانچر بلوچستان ءِ آدینک اَت ، کمانچر ءَ انگت باز کار کنگی اَت ، آئی ءَ را انگت باز وھد پکار اَت ، بلے ملکوت ءَ چو مستیں لیڑو ءَ مئے سنگت چہ مارا سست۔
منی چہ ھداوند ءَ لوٹ ھمیش اِنت کہ واجہ ءِ ارواہ بلوچستان ءِ دمگاں سیل کنان ءُ آسودگ بات۔ واجہ ءِ سنگت، کھول ءُ بلوچ راج ءَ اے گْرانیں وھد ءِ گْوازینگ ءِ ھاٹی بہ دنت۔ اے گْرانیں گم ءِ بار سبک تر بہ بات۔
ءُ کمانچر وتی اکسانی تہ ءَ پہ دائمی زندگ ءُ نمیران اِنت۔
