پروپیگنڈہ ءُ آئی ارزشت نبشتہ کار: دُرّا اِبن مریم

پجار:
پروپیگنڈہ چہ وھد ءُ زمانگ ءَ کارمرز بِیتگ ، بلے دومی جھانی جنگ ءَ پد پروپیگنڈہ سک باز کارمرز بیتگ۔ پروپیگنڈہ ءِ ارزشت زی انچوش مزن بیتگ ءُ مرچی ھم ڈجیٹل دور ءَ ھم گیشتر مزن کُرتگ۔ پروپیگنڈہ جنگانی میان ءَ یک سکیں مزنیں ارزشتے دار اِیت ، ھر ھما جنگ ءَ کہ پروپیگنڈہ کارمز بیتگ تہ ھمے پروپیگنڈہ ءِ سبب ءَ بازیں گلاں وتی سلاہ دور داتگ انت ءُ بازیں گل ءَ باج برتگ۔

پروپیگنڈہ تھنا جنگانی واستا کارمرز نہ بیت ، بلکیں پروپیگنڈہ ءَ واپاری مردم ھم کارمز کن اَنت دانکہ پہ وتی گراکاں گیش ءُ واپار ءَ دیمروئی بہ دنت۔ انچو مزھبی مردم ھم پروپیگنڈہ ءَ کارمرز کن انت پہ وتی مھلوک ءَ دانکہ مزھب ءِ ارزشت ءَ بہ ود اِیت۔ سیاست ءِ پڑ ءَ ھم پروپیگنڈہ سک کارمز بیت ، ءُ ھمے وڑ ءَ پروپیگنڈہ وتی تہ ءَ سک مزن ءُ ایشی ءِ کارمرز کنگ ءِ باز راھبند اَنت۔

چاگردی چست ءُ ایر بہ بہ اَنت یا چاگرد ءِ توکا انچیں کارے بہ بیت درست پروپیگنڈہ ءَ کارمرز کن اَنت پہ آئی ھلاس کنگ ءِ واستا۔ چوش کہ ماں گلامیں راجے ءَ گوں بندوک اِیں ، گڑا مارا اے الم سرپد بوگی اِنت کہ زورگریں ملک کجام رنگیں پروپیگنڈہ کارمرز کنت ءُ آئی پروش دیگ ءِ واستا بلوچ کجام رنگیں پروپیگنڈہ ءَ کارمرز بہ کنت۔ درستاں پیش چاراں زورگر ءِ پروپیگنڈہ کجام اَنت ءُ آ ھمیشاں چون کارمرز کنت۔

1- رپینگ (Manipulation): پہ مردمانی رپینگ ءَ زورگر پروپیگنڈہ کنت۔ ایشی ءِ تہ ءَ ھما کہ تچک ءُ گْواچنیں ھبر اِنت ، آ ھبر ءَ چیر دنت ءُ دروگیں ھبر سھرا کنت۔ ھمے پروپیگنڈہ ءِ رد ءَ ترا چاگردی ، دود ءُ ربیدگی ، سیاسی ءُ نپسیاتی ھساب ءَ رپینگ ءِ زد ءَ کار اِیت ءُ ایشی ءِ تہ ءَ تئی درستیں مڈیانی لٹ ءُ پل ھم ھوار اَنت۔

2- جھانگپِری(polarization): پروپیگنڈہ ءَ زورگر پہ دروگ کارمرز کنت ، پہ مردمانی بدنام کنگ ءُ چاگرد ءِ توکا دروگیں ھبر شنگ کنت۔ پہ وتی نپ ءُ سیتانی ھاتر ءَ ایشی تہ ءَ زورگر وتی ھبراں مھکم کنت ءُ ترا چہ تئی بنکی جیڑہ ءَ دور کنت۔

3- لٹ ءُ پل(Exploitation ): زورگر مدام پروپیگنڈہ ءِ پشت ءَ تئی مال ءُ مڈی ، تئی کار ءُ روزگار ءَ ھوار درستیں چیزانی لٹ ءُ پُل ءَ کنت۔ اے درگت ءَ اگاں تئی سرڈگار ءِ مال ءُ مڈی بہ بہ اَنت یا ایدگہ گواجن ، درستاں پروپیگنڈہ ءِ کمک ءَ بارت۔

نوں چاریں گلامیں راج ایشانی دیم ءَ چون دار اِیت ، انچوش کہ زورگر ءِ کِر ءَ انچیں کارتیپ (Factor) ھست ، گلامیں راج ءِ کِر ءَ ھم ایشانی پروش دیگ ءِ واستا انچیں کارتیپ ھست اِنت۔

1-جنزارگ( Mobilization) : پروپیگنڈہ جنزارگ ءَ ھم کارمرز بیت اِنت۔ چوش کہ اد ءَ ھما درستیں رپک ءُ پندل زورگر ءَ کہ ساچ اِتگ اَنت ، تو آ درستاں وتی مھلوک ءِ دیم ءَ پدر کن ئے ءُ آیانی ھما کہ اسل جیڑہ ھست اِنت تو ھمائی ءَ دیم ءَ ایر کن ئے ءُ پروپیگنڈہ ءِ برورد ءَ تو مردماں پہ جنگ ءَ ساڑی کت کن ئے۔ اد ءَ ھر ھما بیانیہ کہ زورگر ءَ داتگ ، تو درستاں رد کن ئے۔

2- سرپدی (Awareness): وتی مھلوک ءَ سرپدی دیگ ءِ واستا ھم پروپیگنڈہ کارمرز بیت ، ایشی ءِ تہ ءَ ھما زمینی سرپدی ، راجی جز ءِ سرپدی ءُ وتی سرڈگار ءِ رکینگ ءِ سرپدی درست کا اَنت۔

3- اکلاکی پروپیگنڈا (Ethically Propaganda): اکلاکی پروپیگنڈہ ءِ برورد ءَ بازیں مردم ءِ جیڑھانی توجیل سازگ بہ اَنت ءُ اکلاکی پروپیگنڈہ ءِ برورد ءَ مردماں یک مشت کنگ بیت یا دگہ چاگردی جیڑہ گیشینگ بہ اَنت۔

چوش کہ جنگانی وھد ءَ پروپیگنڈہ یک سکیں مزنیں ارزشتے دار اِیت ، جنگانی وھد ءَ وتی لس مھلوک پہ جنگ ءَ جاڑیک کنگی اِنت۔ چوشیں دور ءَ مارا بازیں چیزے دست کپ اِیت کہ آ جنگانی وھد ءَ پروپیگنڈہ ءِ ھساب ءَ کارمرز بوتگ اَنت۔ چوش کہ نازی جرمن پروپیگنڈہ بہ بیت یا سکندر آزم ءِ پروپیگنڈہ بہ بیت ، اے درستاں پروپیگنڈہ وتی جنگ ءِ یک بھرے لیک اِتگ ءُ آئی ءَ را شریں رنگے ءَ کارمز کتگ ءُ سوبین بیتگ اَنت۔

پروپیگنڈھانی سوبین بوگ ءِ یک مستریں سببے ایش اِنت کہ اے انسان ءَ ساھکولوجیکلی سان دنت، ءُ دگہ یک سببے اے بوت کنت کہ اے سرپدینانی گر ءُ دار کنگ ایشی ءِ مستریں درور ھٹلر اِنت کہ اے پہ سرپدینانی دارگ ءِ واستا یک منسٹرے جوڑ کنت کہ آئی نام (Reich Ministry) بیت اِنت۔ پہ پروپیگنڈہ ءِ کارمز ءَ روتاک ، تامر ، ریڈیو سک باز کارمرز بوتگ اَنت۔ کتابانی تہ ءَ ھم بازیں پروپیگنڈہ دست کپ اَنت۔

پاکستان ءِ پروپیگنڈہ ءَ اگاں ما بہ چار اِیں ، آ روچے یک پندلے ساز اِیت۔ مرچی مئے دیم ءَ زاھر اِنت کہ زور بیگواھیں بلوچانی سر ءَ کجام رنگ ءَ پروپیگنڈہ کنگ ءَ اِنت ، ءُ بی وئی سی (BYC ) ءِ نندانکی گدان ءَ پروش دیگ ءِ واستا زورگریں ملک ءَ وتی یک دگہ گدانے ءُ کیمپے جنت ءُ بی وئی سی ءِ کیمپ ءَ ایر جنت۔

چوش کہ ھستیں وھد ءِ توکا پاکستان وتی میڈیا ءِ سر ءَ سک باز پروپیگنڈء سازگ ءَ اِنت، ھمے رنگ ءَ پاکستان ءَ پہ پروپیگنڈہ ءَ وتی شپ ءُ روچ یک کتگ اَنت ءُ پہ وت ءَ انچیں مردم ھم داشتگ کہ آ تھنا پہ آئی ءَ پروپیگنڈہ بہ کن اَنت۔
پمیشکا مارا اے درستیں چیز سرپد بوگی اَنت کہ زوگر گوم ءَ چونیں پروپیگنڈہ کنگ ءَ اِنت ، ءُ آیانی دیم مارا کجام رنگ دارگی اِنت۔