چی یے؟
زند ءِ ھر پڑ ءَ بدلی ءَ آشوب گْوش اَنت ، آ اگاں دود ءُ ربیدگ ، سائنسی ، ٹیکنالوجیکل یا کشت ءُ کشاری ءِ پڑ بہ بیت ، بلے گیشتر اے لبز ءِ متلب چوش بوت کنت۔
بزاں آشوب ھما کار یا جھد اِنت کہ پہ یکے ءِ ھاکمی ءِ ھتم کنگ ءُ وتی ھاکمی ءِ برجم دارگ ءَ آشوب گْوش اَنت۔ انگریزی ءَ اے لبز ءِ واستا “Revolution” ءُ اردو ءَ ”انقلاب“ کارمرز بیت۔ اے جست ءِ پسو اے ھم بوت کنت کہ آشوب یک ناگتیں بدلی ءَ ھم گْوش اَنت ، ءُ آشوب ماں یک چاگردے ءِ اڈ کنگ ءَ بلائیں کردے پیلو کنت۔
آشوب ءِ بازیں تھر ھست اَنت، انچوش کہ دود ء ُربیدگی آشوب ، سانئسی آشوب ، ٹیکنا لوجی ءِ آشوب ءُ دگہ بازیں ھست اَنت۔ ھر آشوبے وتی جاگاہ ءَ کارمرز بیت ، بلے درائیں آشوبانی بنگپ ، لوٹ ءُ گزر یکے کہ بدلی بئیت ءُ بودناکی بہ بیت۔ وھدے کہ راجے پدمنتگ ءُ ایردست بیت ، گڑا آ چہ درستیں آشوباں زبھر بیت۔ پمیشکا آئی ءَ را اے درائیں آشوب آرگ لوٹ اَنت ، بلے ما اد ءَ یک ایردستیں راجے ءِ راجی آشوب ءِ سر ءَ گپ کن اِیں۔
آشوب پہ یک راجے ءِ واستا المی اِنت ، پرچا کہ بنی آدم چہ بن ءُ بیھ ءَ آزات ودی بوتگ ءُ وتی تب ءِ مستر وت اِنت۔ ءُ آشوب ءِ آرگ ءِ واستا بازیں جھدے ءُ کربانی دیگ لوٹ اِیت ، اگاں ما راجدپتر ءَ چمشانکے بہ دے اِیں مارا گندگ ءَ کئیت کہ آ راجاں کہ آشوب آؤرتگ گڑا بازیں جکانسری کش اِتگ ءُ کربانی داتگ۔ ھمے وڑ ءَ آشوب ءِ راہ ءَ ھر وڑیں سکی ءُ سوری ، اڑ ءُ جنجال برداش کتگ ءُ وتی چم مدام پہ بے ملیں مکسد ءَ سک داتگ اَنت۔
ھمے رنگ ءَ پہ آشوب ءِ آرگ ءِ ھاتر ءَ راج ءِ ھر مردم ءَ را تیار بوگ لوٹ اِیت کہ مرچی منی برات اے راہ ءَ اِنت گڑا باند ءَ منی باریگ اِنت۔ آشوب ھاس پہ وتی واستا آرگ نہ لوٹ اِیت ، ءُ بازیں مردمے ھمے جیڑ اِیت کہ من اگاں آشوب آرگ ءِ راہ ءَ بیران بوتاں گڑا ھچ مول ءُ مکسد نیست۔
اِنا! اے گپ چٹ رد اِنت ، بلکیں آشوب پہ پدریچے ءِ واستا آرگ بیت۔ آشوب ءِ راہ ءَ ھما بالاد کہ چراگ ءَ روک کن اَنت ، آیانی نام گوں سھریں لبزاں نویسگ بیت۔
چو کہ راجے بہ بیت یا کہ بنی آدمے آئی لوٹ ءُ تماہ ھمے بیت کہ آشوب آرگ بہ بیت ءُ آ وتی تب ءِ مستر وت بہ بیت ، بلے لھتیں راج پہ وتی ھاکمی ءِ ھاتر ءَ ایردستیں راجانی سر ءَ کوزہ کناں ءُ آھاناں وتی ھاکمی ءِ دپ ءِ تہ ءَ جور کن اَنت۔ اگاں راجے تاکتور ءُ توکلی یے بیت گڑا آ وتی سر ءَ ھچ وڑیں راج ءَ ھاکمی کنگ ءَ نہ ھل اِیت ، بلکیں آئی بگیر ءَ جھد کنت ءُ دیمونی دنت۔ چی ءَ کہ زورگر ءِ مول ءُ مراد بس زمین ءُ مُلبری دانکہ آ بے برمش ءُ چڑکہ ایردستیں راج ءِ گواجناں بہ بارت ءُ پہ وتی دیمروئی ءُ گھتری ءِ ھاتر ءَ کارمرز بہ کنت۔ اِیشی ءِ گْواچنیں درور چہ ھمد ءَ زانگ بیت کہ وھدے برٹش (برطانیہ) ءَ ھندستان ءِ سر ءَ کوزہ کرت گڑا آئی ءَ ھندوستان ءِ شر شریں چیز کش ءُ برت اَنت۔آئی ءِ زمین ءَ را پہ وتی کمپنی ءُ انڈیسٹریزانی زلورت ءِ پورا کنگ ءِ ھاتر ءَ کارمرز کتگ ءُ ھندستان ءَ را “گولڈن اسپارو“(Golden sparrow) گْوشتگ۔
ھمے وڑ ءَ اگاں آشوب آرگ مہ بیت گڑا اے زوراکیں راج مدام ایردستں راجانی سر ءَ ھاکمی کن اَنت ءُ وتی کوزہ ءَ پہ دائمی برجاہ دار اَنت۔ چوش کہ آشوب ءِ آرگ ءِ وھد ءَ راج گوں وڑ وڑیں جاوراں دچار بہ اَنت ، پہ درور چکچینی ، زوانسری ءِ بیگوائی ، گریبی ، لگتمالی ، بے روزگاری ءُ دگہ بازیں اڑ ءُ جنجال دیم ءَ کا اَنت ، پمیشکا چاگرد ءِ ھر مردم آشوب ءِ راہ ءَ وتی کرد ءَ ادا کرت کنت۔
آشوب کئے کار اِیت؟
چوش کہ آشوب یک مردمے آؤرت نہ کنت، البت یک مردمے یک راجے ءَ لیڈ کرت کنت پہ آشوب ءَ۔ چی ءَ کہ آشوب ءِ آرگ ءَ راج ءِ ھمک مردم وتی کردار ءَ ادا کرت کنت۔ ھاس وانندگیں مردم آشوب ءِ پڑ ءَ جوانیں ارزشت دار اَنت ، پرچا کہ آشوب ءِ درگت ءَ بازیں جیڑھاں چہ یک ناوانندگے ءَ وانندگیں مردمے گھتر ءُ جوانی ءَ پوہ بیت۔ پرے واستا وانندگیں مردم آشوب ءِ پڑ ءَ بھر بہ زور اَنت ، ءُ اے ھم الم نہ اِنت کہ آ جنگ ءِ پڑ ءَ بہ رو اَنت ، بلکیں آشوب ءِ آرگ ءِ بازیں وڑ ءُ ڈول ھست اَنت۔ انچوش کہ آشوب آروکیں مردمانی کمک کنگ ، آشوب ءُ راج ءِ ڈالچاری ءِ بابت ءَ راج ءِ نودربراناں آگاھی ءُ سرپدی دیگ ، راج ءِ نودربراناں وانگ ءُ دگہ بازیں پڑاں بھر زورگ۔
آشوب ءِ راہ ءَ زالبول ءِ کرد چے اِنت؟
آشوب ءِ راہ ءَ زالبول ءِ بلائیں کردے ھست ، وھدے جنگ ءِ پڑ ءَ مرداں گوں ھوار زالبول کہ ھوار بہ اَنت گڑا آ راج گیشتر مھکم ءُ تاکتور بیت۔ وھدے زالبول گوں مرداں ھم کوپک بہ اَنت گڑا انچیں جاھاں کہ مردین ناگیگ بہ اَنت گڑا زالبول آ کاراں گوں ارزانی ءَ کرت کن اَنت۔ ھمے وڑ ءَ شائرے گوں وتی شائری ءَ راج ءِ مردماں آگاہ کنت ءُ سرپدی بکش اِیت۔ آ گوں وتی شائری ءَ گلزمین ءَ چو لیلا ءِ وڑ ءَ نازین اِیت ءُ راج ءِ جھدکاراں دلبڈی دنت۔ ھمے داب ءَ یک شائرے ءِ رنگ یک گشندھے ھم ھمے پیم ءَ وتی کرد ءَ پیلو کنت۔نودربرے گوں وتی گْوشتانک ، زانت ءُ پنتاں وتی کرد ءَ پورا کنت۔ یک راھشونے گوں دل ءِ جھلانکی ءَ وتی راھشونی ءِ لوٹ ءُ گزر ، وتی گچینی ئیں کرد ءَ پیلو کنت۔ ھمے رنگ ءَ ایدگہ مردم ھم وتی کرد ءَ ادا کن اَنت۔
ھمے وڑ ءَ گْوستانک ءِ راستیانی رد ءَ آشوب ءِ شریں ءُ ھرابیں دْروشم ھم ھست اَنت۔ انچیں آشوب راج ءَ تباہ ءُ برباد کنت ، بلے گیشتر آشوب ءِ شریں نشان ھست اَنت۔ انچوش کہ امریکہ ءِ آشوب ، پرانس ءِ آشوب ءُ یورپ ءِ آشوب ءِ شریں کرد بوتگ اَنت ، گڑا چر ایشی ءَ ھمے پدر بیت کہ آشوب ءِ راہ ءَ ھرابی کم ءُ شری گیشتر اِنت۔
اگاں ما لوٹ اِیں کہ مئے وتن آشوب بئیت ءُ ما وتی تب ءِ مستر وت بہ بہ اِیں ، گڑا مارا جھد کنگ ءُ دژمن ءَ را چہ وتی وتن ءَ کشگ لوٹ اِیت۔ الم نہ اِنت کہ ما جنگ ءِ پڑ ءَ بہ رو اِیں ءُ بھر بہ زور اِیں ، بلکیں ما ھرکس وتی گنجائش ءِ ھساب ءَ وتی آشوب ءِ ھاتر ءَ جھد بہ کن اِیں دانکہ باند ءَ آیوکیں پدریچ ءِ بار گْرانی ءِ بدل ءَ سبک ءُ ارزان بہ بیت۔
