تو اتک ئِے ءُ گْوشت ” انشپی پد ءَ ھور اِنت ، بلے دار کل نہ کرتگ “۔ مرچی اناگت ءَ کماش تو گیر اتک ئِے ءُ دل ءِ بنزہ جیڑگانی امبارے بوت۔ من لوٹ اِت کہ وت ءَ اچ تئی انگریں یاتاں دمے آجو بہ کن آں ءُ جیڑگانی تک ءَ دگہ دیمے مان بہ دئے آں بلے نہ بوت ، چی ءَ کہ من ءَ منی ھاٹیگ ءَ جواب داتگ اَت کہ من گوں تئی یاتاں وت ءَ دیم پہ دیم کت بہ کن آں۔
جمبراں تانسریں آزمان مان پوش اِتگ اَت ءُ ترمپ زمین ءِ دلبند ءَ چکگ ءَ اَت اَنت ، پمیشکا تو چمانی دیم ءَ میلانک بوت ئِے ءُ من ءَ ماں ھیالانی جھلیں زر ءَ چگل دات۔
تو ءُ ھما شپ ءِ ھور ، پادانی پلاسٹک ، بلے مرچی تئی کمی ءُ انشپی پد ءَ ھور اِنت۔ ما درس ھما پیم ءُ تو گون نہ ئِے ، پمیشکا من گوں ھاموشی ءَ نشت ءُ بس ھور ءِ ترمپانی توار گوشداشت اَنت ءُ پد ءَ شھیدانی ھما اکس چار اِت اَنت کہ من ءُ تو ھور ءِ توار ءَ شھید وپا ءُ سنگتانی اکس چار اِتگ اَنت۔
مرچی پد ءَ تئی نمیرانی ءَ پد من ھمے کڈک ءِ تہ ءَ تئی یاتاں گوں ترمپانی توار ءُ اکساں چارگ ءَ آں ، بلے تئی ھمے اکس چماں کپت کہ ترا سگریٹے دست ءَ تو بچکندگ ءَ ئِے۔ بلے اے اکس ءِ چارگ ءَ چہ پد ھما دیوان یات اتک اَنت کہ من ءُ تو پارٹی ءِ درشان (بیان) ونت ءُ یکے دومی ءَ را جست کت پارٹی ، اگدہ ، سنیئر ، جونیئر۔۔۔۔؟
بلے! من گْوشت کہ کماش تئی کردار ءُ کربانی راج ءِ دیم ءَ اَنت ، ترا تئی راج وت یک نامے دنت۔ تئی ھونانی وشبوہ یک نوکیں رنگے کار اِیت ، گڑا تو کندگے جت ءُ گْوشت ” دگہ ھچ نہ لوٹ اِیت ، بس جنگ کنگی اِنت۔ دژمن تاچینگی اِنت ، پنجاپی ءَ را بس ھمے پیشدارگی اِنت کہ بلوچ ءَ گوں جنگ کنگ آسانیں گپے ءِ نہ اِنت “۔
اے ساھت ءَ ھور ءُ ترمپاں گوں کسہ وت ءَ برے دْروشمے پتاھان ءُ تئی انگریں یات گیش ودان۔ من ءَ انچو گمان بوگ ءَ اَت کہ تو مرچی رکست بوتگ ئِے ءُ تئی کندگانی توار انگت گوشاں پیداک اَنت ، بلے جیڑاں تو ، موسم ءُ ھور یکجاہ اتک ءُ شت ئِے۔
دلدار! اگاں کجام وھد ءَ تئی یات بہ یا اَنت ، جزماں تو گوں موسم ءُ ھوراں الم دُچار کپ ئِے۔ بلے تئی کندگانی زیبائی ءُ مھروانی برے برے من ءَ رولہ ءِ زردی ءُ زھیر نالیں کپوتانی کوکواں گوں ھوار ھما بندر ءَ بر اَنت کہ تئی ءُ رپتگیں سرانی ھواری ءَ چینچو دلکش بوتگ ، بلے اے سپر ءَ کسے رند ءُ کسے ساری پمیشکا گلگ نہ کن آں۔۔۔۔
