واجہ آدم ھکانی ءِ گْونڈیں پجارے | اسمان کازی

اگاں ما بلوچی زبان ءِ گْوستانک ءَ بہ چار ایں یا پٹ ءُ پول بہ کن ایں مارا انچیں نامدار ، جھدکاریں ازمکار ، شائر، ندکار دست کپ اَنت کہ آیاں وتی زند ءِ آ دگہ کسان کسانیں واھشت ءُ واھگ یل کرتگ اَنت پہ راجی زبان ءِ رکینگ ءَ شپ ءُ روچ یکے کرتگ انچوش کہ سید ھاشمی، مبارک کازی، مراد ساھر ، مراد اَوارانی، لالا لال بکش رند، گل ھان نسیر ءُ واجہ آدم ھکانی چہ ھمایاں بیتگ اَنت۔

واجہ آدم ھکانی (1917) ءَ بلوچستان ءِ ھنکین اَواران ءِ جھل جاہ ءِ آھو ءَ ودی بوتگ۔ھکانی ءَ وتی وانگ ءِ بندات چہ بیلہ ءَ کرتگ ءُ پہ گیشیں وانگ ءَ کراچی ءَ شتگ، آئی ءَ چہ کسانی ءَ گوں زبان ءَ مھر بوتگ پمیشکا آئی ءَ راجی زبان ءِ لبزانکی پڑ ءَ مزنیں کرد ادا کرتگ۔

واجہ آدم ھکانی کراچی ءَ وانگ ءَ بوتگ آئی ءِ سنگت ءُ ھمراہ واجہ ابدالواھد آزات، جمالدینی، مولوی ھیر مھمد ندوی، ھاجی ابدال کیوم ، مراد اَوارانی، مراد ساھر، لالا لال بکش رند، یوسپ مستی ھان، گل ھان نسیر، سیدھاشمی بوتگ اَنت۔

واجہ ھکانی ءَ 1958مان مستونگ ءَ بلوچی لبزانک ءِ نیمگ ءَ بلوچی مستریں لبزانکی مراگش بلوچی اکیڈمی شال ءِ بنداتی نیاد ءَ ھم بھر زرتگ اَت، ماھتاک بلوچی کراچی ءِ کمک شونکار ھم بوتگ۔

واجہ آدم ھکانی 21 جلکشان 1986 ءَ بیران بوتگ ، آئی ءِ بیرانی ءَ پد 1987 ءَ آئی ءِ اولی شیرانی دپتر ’’درون ‘‘ چہ ’’ آزات جمالدینی اکیڈمی ‘‘ ءِ نیمگ ءَ شنگ کنگ بوتگ ، پد ءَ دومی رند ءَ 2018 ءَ بلوچی اکیڈمی شال ءَ ھم ’’درون‘‘ چاپ ءُ شنگ کرتگ۔