زندگی ءِ توک ءَ دوچار کپتگیں مردم کدی کدی یاد کا اَنت، بلے زند ءِ آ دگہ اڑ ءُ جنجالانی سبب ءَ دوچار کپگ باز گْران بیت۔
ھمے وڑ ءَ کساس دو ھزار پانزدہ ءَ یا شانزدہ ءِ وھد اَت۔۔ ما پہ شھر ءَ وانگ ءَ در کپت ایں، گڑا ھمود ءَ شاگرد گل ءِ ھوار بوگ ءَ پد گوں باز مردماں دوچار کپت ایں، کدی گپ ءُ تران بوت کدی کندگ ءُ مسکرائی بوت ءُ کدی پکنک ءُ پارٹی ھم کرت۔ ۔۔۔ اینچو وھد روان بوت ، کالج ءِ وانگ ھتم بوت ءُ ھرکس یک یک ءَ اچ آ اود ءِ وانگجاہ ءَ پارگ بوان بوت ءُ دگہ دگہ جاگھاں پہ وانگ ءُ زانگ ءَ جزان بوت۔ چہ ھمے کاروان ءَ لھتے ءَ سور ءُ آروس کرت ءُ لھتے ءَ دگہ راہ گپت ءُ وتی منزل ءِ نیمگ ءَ جزان بوت اَنت۔ھمے وڑ ءَ وھد گوزان بوت، کس کسی ھال ءَ سھی نہ بوت کہ کج ءَ اِنت ءُ چی کنگ ءَ اِنت۔من ھم ھمے وڑ ءَ گوں وتی زند ءِ جنجالاں دزبند بوت آں ، کسی ھال ءَ سرپد نہ اَت آں۔
کِساس دو ھزار ءُ بیست ءُ یک اَت ۔من جاگھے ءَ ھال گپت کہ تو وتی منزل راجی آجوئی گچین کرتگ۔پد ءَ ھمے وڑ ءَ وھد گوزان بوت کس ءَ کسی ھبر نہ اَت۔ ھرکس گوں وتی زندگی ءِ آ دگہ کاراں دست بند اَت۔ گڑا من دو روچ ساری یک نیوزے منی دیم ءَ گوست کہ گْوادر پورٹ ءِ کارگس ءِ سر ءَ ارش بوتگ، پد ءَ انچوش ھرکس پوسٹ کنگ ءُ نبشتہ کنگ بندات بوت گڑا مروچی من یکے ءِ اسٹیٹس دیست کہ درست شھید بوتگیں مردمانی نام اَت انت۔من وھدے پوسٹ ونت گڑا اول تئی نام ءُ تئی ھند ءِ نام منی دیم ءَ کپت۔گڑا من ءَ یک دم تو یاد اتک ئے بلے پد ءَ من گْوشت بوت کنت کہ ھم نامیں مردم باز اِنت۔ پد ءَ من ءَ یکے ءَ گْوشت کہ ھمے تئی ھند ءِ مردم تئی اکساں راون دے اَنت۔ آئی ءَ یک برے جست کرت کہ تو اے اکس ءَچون کن ئے؟ من گْوشت کہ منی ھیال ءَ اے منی پجاروکیں مردمے ۔
گڑا آئی ءَ وھدے کہ اکسے دیم دات، من نو زانت اے پکا تئی اکس اِنت، چہ منی دپ ءَ دگہ ھچ در نے اتک، ایوک ھمے یکیں گپ کہ سد سلام تئی جھد ءَ کہ تو وتی زند ءِ مکسد ءَ سوبین بوت ئے۔یک برے کہ تو وتی منزل گچین کرت گڑا پد ءَ پشت ءَ نہ کنز اِت ئے۔ایوک من ھمے گْوش آں کہ سد سلام تئی جھد ءَ ، سد سلام تئی دلیری ءَ بات۔
