جاہ آھو آواران ھنکین ءِ ھندے ءُ لبز ء ’جاہ آھو ‘ بزانکہ آسکانی جاہ ۔جاہ آھو بلوچستان ءِ مستریں ھندانی ( تھسیلانی) تہ ءَ ھوار اِنت دمگی ھساب ءَ آ اود ءِ نشتگیں مھلوک زمین داری کن اَنت۔ گندیم ،پیماز ،کرپاس گوں ھمے دھکان کاری ءَ وتی وھد ءَ گْوازینگ ءَ اَنت ءُ آ اود ءِ مردمانی مستریں جیڑہ وانگ ءِ آسراتی نہ بوگ انت۔جاہ آھو سدانی کچ ءَ وانگجاہ ھست بلے چنت سال اِنت کہ پہ وانگ ءَ یک روچے ھم پچ کنگ نہ بوتگ اَنت۔تیوک ءَ نام گپتیں ماڑی اَنت ابید چہ یک ءُ دو وانگجاہ ءَ آدگہ درائیں وانگجاہ بند انت۔اگاں ما ھمے وانگجاھانی استادانی گپ ءَ بہ جن ایں گڑا اے وڑیں بازیں استاد ھست اَنت کہ آیاں وانگجاھانی دیم ھم نہ دیستگ بلے ھمے استاد ھمک ماہ گوں آزاتی ءَ پگار گرگ ءَ اَنت ءُ وتی چکاناں اسلام باد ، شال ءُ کراچی ءَ وانینگ ءَ اَنت ۔ بزگ اَنت ھما دھکانانی چک کہ آیانی وانگ ءِ وھد اِنت بلے وانگ ءِ امر ءَ دھکان کاری کنگ ءَ اَنت ۔
جاہ آھو ءَ چوشیں ھزرانی کچ ءَ گونڈل من دیستگ کہ سک وانگ ءِ واھگ دار اَنت بلے لھتے استاد ءُ میر ءُ مسترانی سبب ءَ دیم ءَ اتک کرت نہ کن اَنت وھدے کہ من جاہ آھو ءِ ھما گونڈلاں گند آں کہ آ یانی وانگ ءِ وھد اِنت بلے بدبھتی ءَ آیاں ند ءُ کتاب ءِ بدل ءَ کوڈال ءُ ٹیکم دست ءَ اِنت۔
ھمے وڑ ءَ سیاست ءِ گپ ءَ بہ جن آں گڑا سیاسی ھوالہ ءَ سک شوک بوتگ ۔ 2009 ءَ جاہ آھو سیاسی ھوالہ ءَ سک پھتو اَت ءُ سنگت شوکیں رنگے ءَ کار ءَ اَت اَنت۔ لوگ پہ لوگ ءَ مردماں ایردستی ءِ مارشت ءَ دیگ ءَ اَت اَنت کہ بلوچ راج ایردست ( غلام ) اِنت ءُ ایردستیں راج ءَ را لوگ ءِ نندگ زیب نہ دنت۔ پہ اے ایردستی ءِ ھلاس کنگ ءَ مارا کلاں جھد کنگی اِنت ءُ سیاسی گلانی بھر بوگی اِنت۔
ھمے سنگتانی بازیں تگ ءُ تاج ءَ پد جاہ آھو ءِ زھگ پہ زھگ سرپد اَت کہ ما ایردست این ءُ ایردستی پہ لوگ ءَ نندگ ءُ چارگ ءَ ھچ بر ھلاس نہ بیت اِنت ۔ جاہ آھو ءِ ھرچ میتگ ءَ زھرشانی کنگ بوگ ءَ اَت ءُ ھمے وڑ ءَ لھتے ووٹ پنڈ ھست اَت کہ آیاں سنگتانی کار ھچ وڑ ءَ وش بیگ ءَ نہ اَت اَنت۔گڑا آیاں وتی پوج (پاکستانی لشکر) لوٹارینت ءُ جاہ آھو ءَ مزنیں کچے ءَ لشکر کشی کرت ءُ سیاسی سنگتانی آوار جنگ بندات کت۔ بازیں سنگت شھید کرت اَنت ءُ بازیں مردمے آوار جت ، گار ءُ گور کرت اَنت ۔
2013 ءَ پد بازیں سنگتانی لوگ آس ماندارگ بوت اَنت ۔ چہ ھمے لشکرکشیاں پد داں روچ ء مروچی ءَ ھچ وڑیں سیاسی سرگرمی نہ بوگ ءَ اِنت بلے اے رندی وھدے کہ من جاہ آھو ءَ شت آں گڑا من ءَ ھچ باور بوگ ءَ نہ اَت ، آ اود ءِ گونڈلاں بہ گر داں پیر ءُ کماشاں کلاں سما کرتگ ءُ آ اود ءَ زھرشانی بوگ ءَ اَت۔اے زھرشانی ءَ جنین ھم ھوار اَت اَنت۔ھرچ وڑیں اوگام ( نعرہ ) جنگ بوگ ءَ اَت ءُ اے ھمے مارچ (روانک) اَت کہ جاہ آھو ناں بلکیں کلیں بلوچستان ءِ مردم پاد ئِے کرتگ اَت اَنت ءُ منی میتگ انچیں جاھے بوتگ کہ آ اود ءَ زندگی ءَ چوشیں زھرشانی نہ بوتگ۔ بلے اے ھمے بلوچ مارچ اَت کہ منی میتگ ءِ مھلوک ھم پاد اتکگ اَت ءُ پہ بلوچ ءِ پلہ مرزی ءَ زھرشانی کنگ اَت اَنت۔اے زھرشانی ءَ زھگ ءُ زالبولاں بہ گر پیر ءُ کماش کل یکجاہ اَت اَنت ءُ اوگام جنگ ءَ اَت اَنت۔ من ھمے جیڑ اِت کہ جاہ آھو ءِ مھلوک اینچو لٹ ءُ کُٹ کنگ ءَ پد ھم ایردستی ءَ ھچ وڑ ءَ منگ ساڑی نہ اَنت ءُ مھلوک مروچی ھم مھکم اِنت ءُ وتی جز ءِ پلہ مرزی ءَ کنگ ءَ اِنت۔ھمے وڑ ءَ انوگیں ووٹ ءَ جاہ آھو ءَ 80 درسد مھلوک ءَ چہ ووٹ ءَ دزکشی کرتگ ءُ ووٹ ءَ نہ شتگ اَنت ۔