پرسدانک | ھسا بجار

برکت بل والا

من ءَ دیر نہ اَت کہ نگور ءَ اتکگ اَت آں، من گُرکانی سیچی ءَ اَت آں-

پد ءَ من اَت آں گرکانی سیچی ءُ بل ءِ راه اَت ، پہ هندی تامر ءِ چارگ ءَ یا دار ءِ بها کنگ ءَ ،پہ بل ءِ هوٹلاں۔ راه ءَ برے ھیژے ءِ توار اَت، برے روسی یے ءِ، برے بہ کول ء مئے وانندهیں بلوچانی پچیسے ءِ، اسپیت پوشے گوں اسپیتیں دستی دزمال ءَ کہ سر ءَ ئِے بستگ اَت، آئی ءِ سیاه تابیں دیم ءَ ابید آ چوش نیکے ءَ گوستگ اَت۔

برکت ء شمبے بُن ءَ دشت بشلویگ ءَ جاهمنند اَت ءُ بل ءَ واجہ دهکان پنڈوک ءِ جنک بی بی پنُک ئِے سانگ کرتگ اَت۔پمیشکا مدام چہ بشلویگ ءَ کرک ءُ پیروتگ ءِ رگام ءِ ڈک ءِ راه ءَ برے گوں موٹرسیکلے ءَ برزاد ءُ جهلاد اَت۔

برکت موٹر سیکل سوارے اَت ءُ مدام موٹر سیکل ئِے ترند تاتکگ اَت ءُ پہ تماشا ءُ وتی سواری ءِ پیشدارگ ءَ برے برے موٹر سیکل ءِ کش ءَ یکیں پینڈل ءِ سر ءَ نشت ءُ چب ءِ وڈ بوت کہ رگام ءِ ڈک، براڈے پند ءَ شتگ اَت۔ بلے همے برکت ءَ اے دگہ چونیں هم گاڑی یے ءِ سواری ترس اِتگ اَت ، بالی گراب ءِ و گپ ءَ مہ کن ، ٹیکسی ءُ رکشا ءَ هم سوار نہ بیتگ اَت۔

من برکت اولی برءَ دیم پہ دیمی ءَ گرکانی سیچی ءَ مستری هسین ءِ گور ءَ دیستگ اَت، برکت مدام اتکگ اَت۔ وت، هسین ءُ اهمد ٹرکی ( سیٹ اهمد دشتی، کیچ ءَ دشتی بازار ءَ جاهمنند بیتگ ، ٹرکے گون ئِے بیتگ ءُ چہ گرکانی سیچی ءَ اول سر ءَ سمات ئِے برتگ پد ءَ مدان مدان ءَ دانسریں کور ءِ کهیر ءُ گز ءُ کلیر رپتگ ءُ بُرتگ اَنت ئِے ) برے کرگوشک ءِ شکار ءَ ءُ برے آسک ءِ شکار ءَ شتگ اَنت ( ملک آباد بیتگ سائجی ءِ آسک چہ لنگاسیگ ءِ کور ءُ ڈیمبراں جنان داں ریس ءَ اتکگ اَنت ءُ چب ءِ وڈ ءَ کرگوشک مچ بیتگ)۔

برے برے گوں سُروز ءُ تمبورگ ءَ زهیرگ ءُ الهان سوت بیتگ۔

پد ءَ من کہ بل نگور ءَ نوزده سد ءُ هشتاد ءُ هپت ءَ شش ءَ وانگ ءَ اَت آں برکت هم اتکگ اَت ، بل ءَ ناکو دهکان پنڈوک ءِ لوگ ءَ اَت۔کبلہ ءَ ائید مهمد ائید ءُ شرپ شاد ءِ لوگ اَنت ءُ رودراتک ءَ برکت ءِ ناکو واجہ دهکان پنڈوک ءِ ءُ ایشانی دمک ءَ دگے گوز اِیت همے دگ منی راه اَت۔

برکت نگور ءِ انچیں زیبائیں دروشمے اَت کہ آئی ءِ مٹ نی ودی نہ بیت۔تیوگیں نگور ءَ ءُ گیشتر بل ءِ چاریں آتراپ ءَ یکے پرس ءُ دومی سیر، اے کهول ءَ ابید ناسرجم بیتگ اَنت۔پرس ءِ پتر ءِ آپ ءُ چاه بہ بیت کہ سے پاتیا ءُ ده ءُ چلانی کنور ءُ کار یا سیرانی چاپ ءُ نازینک ،کورگانانی هالو ءُ سرگوپی اے کلانی براه واجہ دهکان پنڈوک، آئی ءِ شاھوکاریں جنک بی بی پنک ءُ همے توک ءَ برکت ءِ مهپل و سوال نمبر یک بیتگ۔

بل ءِ تہ ءَ چہ میر ، چہ کھدا، چہ گریب اے هزمتکار گوں هرکس ءَ یک داب ءَ گون بیتگ اَنت ءُ هرکسی سیر ءَ برکت ءِ مهپل گوں سانو ٹیپ ءُ ٹولویں لوڈ ءُ ’’ بجلی ‘‘(1) یے ءِ رُزن ءَ الم جم اتگ۔

برکت ءِ ناکو ءُ آئی ءِ سرجمیں کهول نگور ءِ مردمانی مرگ ءُ میراں ، سیر ءُ سمبراں هر وهد ءَ هوار بیتگ اَنت ءُ هوار اَنت۔چوشیں چاگردی هزمتگارانی نام مئے نیست ءُ نابود ءُ گهتگیں چارگرد ءَ گوں ٹیھ ءُ ٹمبر وڑیں گالاں پیسوستگ اَنت۔

( همے نپسیاتی نادراهی ءَ برکت بل والا بِھ مزن بیگ ءَ نہ اِشت ءُ هرجاگہ برکت ءِ گمان همیش اَت کہ کسے ناں کسے ، جاهے ناں جاهے من ءَ کم شرپ مہ کنت ، چہ گونڈ ءُ چہ مزن برکت ءَ وت ءَ چہ انچیں مردماں هم کم لیک اتگ اَت کہ آیاں بچے هم بها نہ بیتگ۔)

پہ بلوچی ساز ءُ زیمل ءَ آئی ءِ هزمت بھ پراموش کنگ نہ بیت۔

هشتاد ءِ دهک ءَ برکت چہ برکت سوتی ءَ برکت بل والا ءِ نام ءَ هرجاگہ زانگ ءُ پجارگ بوت۔وش ملے پروڈکشن ءُ ابراھیم پٹان ءِ گهڑی چوک ءِ بی ایم سی ءِ نوار ، هرجاگہ برکت ءِ سوت اَت اَنت ۔برکت سک باز نامدار بوت بلے برکت ءِ ترس ءَ برکت دگہ دیاراں سپر کنگ ءَ نہ اشت۔آئی ءِ دیرتریں پند روبرکتی بلوچستان ءِ چیزے شهر بیتگ اَنت۔آ هم برکت ءِ وتی منشا ءَ ڈرائیور شتگ۔داں وتی زند ءَ برکت ءَ کراچی نہ دیست بلے برکت هرجاگہ گوشدارگ زیک هم بیتگ ءُ مرچی هم بیگ ءَ اِنت۔

’’ برے من پیکپ ءِ سیٹ ءَ آں برے من پیکیپ ءِ پُشت ءَ آں۔‘‘برکت ءَ چوش ناکو سبزل ءَ شیر وتی وڑ ءَ گشان کرتگ اَنت ، هرچی کہ دپ ءَ اتکگ۔ برکت چٹیں ناوانندگے اَت ، وانگ ئِے هچ نہ زانت بلے نازینک ءُ زهیریگ ءَ زبر اَت۔مئے دمگ ءِ یکیں سوتی اَت۔

زمانگ مٹ بوت برکت هم چہ آ پیش ءِ برکت سوتی یا بہ کول ء کماشاں برکت پهلوان ، ( پهلوان مئے دمگ ءِ سے بیتگ اَنت یکے نمیرانیں ھیبتان چکی ءُ دومی نمیرانیں ناکو بشام ، سیمی پهلوان مراد مهمد اِنت هست ءُ هیات بات ) بلے کماشاں برکت هم پهلوان گْوشتگ ، پهلوان ءُ سوتی ئیں برکت کہ برکت بل والا بوت۔ ( پٹان ءِ برکت ءَ چہ برکت بلی ءَ بل والا بوت ءُ همے پٹان اَت کہ بلوچی گشندہ ئِے پہ وتی زر ءِ لالچ ءَ چہ بلوچی ءِ شیرکنیں تام ءَ دیر بران کرت اَنت )۔

برکت بل والا ءَ پد برکت ءِ ٹولی یے ٹاہ اِت بینجو والا مساپر گپور نلینٹی تبلہ جنوک ، گل مهمد کُلی لیٹ ءُ لوڈ مستری مولی کراچی والا۔

برکت ءِ چہ بشلویگ ءَ لڈگ ءُ آیگ ءَ ناکو واجہ دهکان پنڈوک ءِ لوگ زیمری دربرجاهے جوڑ بوت دهکان پنڈوک ءِ چکے مراد ءَ تبلہ در برت ءُ گپور گچکی ءَ بینجو ءُ آدگہ بازیں چُک ءُ نماسگے همراه ء برکت ء چک ءَ گوں گشندهی ءُ ساز ءُ زیمل ءَ بندوک بوت اَنت۔مروچیگیں تژن ءُ بچکند ءِ شائر ارپان وهید هم همے دربرجاه ءِ برورد اِنت۔ماں بل ءَ باز براں جهد اش کرتگ کہ زیمری دربرجاه ( کلب ) بہ ٹاھین اَنت بلے دائمی داشت اِش نہ کرت اَنت ، مدان مدان ءَ کل نشھانی آماچ بہ اَنت ءُ مر اَنت –

گپور شت امارات ءَ چہ همود ءَ ایڈز ئِے بوت ءُ اتک، چیزے وهد ءَ زندگ بوت ، پد ءَ مدان مدان ءَ کٹان بوت ءُ مرت۔واجہ دهکان پنڈوک دگ ویلے ءَ بُزی ءَ نمیران بوت ءُ نگور ئِے ابیتک کرت۔پد ءَ مولی ءَ هم سپر کرت ، مرادک نشہ ءَ کشت ءُ برکت یک برے پد ءَ چٹ تهنا بوت۔پد ءَ گوں استاد داد ءِ وڑیں سازگرے ءَ هوار کپت داں وتی گڈی روچاں۔

برکت ءِ مهپل تهنا مهپل نہ بیتگ اَنت ، برکت ءِ مهپل چہ مهپلاں گیشتر وژنودی مراگاه بیتگ اَنت۔یکے برکت ءِ ازمکاری ءُ دومی ماں بل ءَ برکت ءِ مهپل بہ بیت ءُ ابدو ( ابدُلله شمبے ) نشہ مہ بیت ءُ کوهیگ تیر مہ جن اَنت بیت نہ کنت ءُ برکت چونیں هم سوتے گْوشگ ءَ بیتگ گوں ابدو ءِ زاهر بیگ ءَ اول وَ همے گْوشتگ ئِے پرمائش کرتگ واجہ ابدلله ءَ کہ اے سوت ڈبل بہ بیت۔ یا وَ اے سوت ئِے یلہ کرتگ ءُ دگہ سوتے بنائِے کرتگ ، گْوشتگ ئِے ’’ واجہ ابدلله ءِ پرمائش اِنت گوش ئِے دار اِت۔‘‘ تپنگی یے ءِ گندگ ءَ سوت ئِے بند کرتگ، دزبندی ئِے کرتگ یا وَ همے میان ءَ گوں وژگپی ئیں دابے ءَ وتی گپ ئِے جتگ ’’ واجهاں تیر مہ جن اِت کہ شمئے گلام ءَ ترس اِیت ۔‘‘ چٹ اِتگ برکت ءِ زهیریگ_ اولی گشنده برکت بیتگ کہ مرے زمانگ ءَ هم آئی ءِ تلو ’’ اسٹیج ‘‘ بس تگردے اَت ءُ میک ئِے چو کوکی شبندے اَت۔

گُڈ ء برکت ءَ بل چٹ ءَ ابیتک بیت ، آ اود ءَ کس نہ بیت چہ رپیک اومان ءَ پیش برکت اَت ءُ چہ ریپک ءِ چماں اندیم بیگ ءَ پد هم یکیں برکت اَت کہ سازے ، آوازے گوشاں کپت۔

دوا انت کہ هاوند نمیرانیں برکت بل والا ءَ وتی رهمتانی ساهگ ءَ جاگہ بہ دنت ءُ بیگواهیں اومان ءَ آجو بہ کنت ءُ همراه ء استاد داد الله ءَ نودربریں گشنده ءُ سازندهاں سلامت ، سوبین ءُ وژنام بہ کنت۔ واجہ دهکان پنڈوک ءِ کهول ءَ اے گرانیں بار ءِ سگگ ءِ هاٹیگ بہ دنت ، شالا انچوش بات۔

1۔ بجلی بتی یے کہ گوں گاسلیٹ ءِ گوات ءَ روک بیت ، سک روژنا اِنت ءُ رُژن ئِے چو ٹوپ ءَ اِنت۔