بی این ایم ءِ هستیں وهد ءِ بنجاهی کابینہ ءِ راهشونانی کاراں سلام اِنت۔ الم! داد دیگ لوٹ اِیت اے وڑیں جاورانی تہ ءَ گلکاری کنگ ءُ پہ سنگت ءُ باسکانی سیاسی ردوم لبزانک ءِ نیمگ ءَ دلگوش کنگ انچیں گامگیجے کہ پہ چوناھیں سیاسی گلے ءَ سکیں هژدری ئیں کارے۔
چد ءُ پیش بی ایس او ءَ اے نیمگ ءَ دلگوش داتگ اَت ، بلے بد نسیبی ءَ ھمے یکیں بی ایس او بیتگ۔بی ایس او ءِ سنگت کہ چہ وانگ ءَ گیش اِتگ انت تہ آ اگاں کوه ءَ شتگ اَنت هم چہ نبشتہ کنگ ءَ مہ کن کنگ بیتگ اَنت ءُ اے نیمگ ءَ بلوچانی بی این پی ءِ وڑیں پاکستانی گلانی وش اتک ءَ ساڑی بیتگ اَنت۔ آ اود ءِ روگ ءَ بی ایس او ءِ پنت ءُ ڈیھ دوستی ءِ درونت چہ دل ءَ روان بیتگ اَنت ءُ مدان مدان ءَ کامریڈیں سنگت کٹریں پاکستانی جوڑ بیتگ اَنت۔
وهدے کہ شھید پدا اهمد گوں وتی همراهاں پہ همے سنچ ءِ دارگ ءَ بی این وائی ایم ءِ وڑیں گلے ٹھین اِیت کہ چہ وانگ ءَ گیش اتگیں مردماں سیاسی پڑے بہ بیت ءُ آشوبی سنچ ءِ ردوم گیش بہ بیت بلے پاکستان زیت پدا اهمد بلوچ ءِ وڑیں زانوگر ءُ وانندگے ءَ شھید کنت ، بلوچ سیاست ءِ تمکاری ءُ آشوبی لبزانک ءِ در ءَ چٹا بند کنت۔
سرکار زانت کہ لبزانک هما راه اِنت کہ آئی ءِ همک کشک ءِ منزل رُژناه اِنت ( روس ءِ آشوب ءِ وهد ءَ کروشیپ (خروشچف) ءَ گْوشتگ اَت کہ اگاں آ وهدی چیزے ندکار کُشگ بہ بیتیں تہ بہ گندئے روس ءَ آشوب مے یتکیں – ) (1)
چہ شھید پدا اهمد ءَ رند دوبر شھید واجہ گلام مھمد ءَ هما مرمرانکیں چراگ روک کرت ءُ یک برے پد ءَ بلوچ چاگرد گوں آشوب ءَ همراه ء لبزانک ءَ هوار کپت۔ همک میتگ ءُ هلکاں کتابجاه ءُ گل ءِ کارگس ٹهینگ بوت اَنت، بلے اد ءَ هم سرکار ءَ هما کرت کہ گوں شھید پدا اهمد بلوچ ءَ کرتگ اَت ئِے۔ گوں وتی داشتگیں بلوچ ندکاریں وزیر ءِ هم شوری ءَ شھید واجہ گلام مھمد گوں وتی همراهاں شھید کرت ءُ کتاب ءُ کتابجاهانی ماندارگ بنا کرت ءُ بلوچ سیاست ءُ آشوبی لبزانک ءَ ماں شھر ءُ میتگاں سر زاهر ءَ هلاس کرت۔
شھید گلام مھمد ءَ پد بی این ایم ءِ شھیدیں راهشون ڈاکٹر منان جان ءَ گوں وتی همراهاں ماں شھر ءُ میتگاں آشوب برجاه داشت۔ ( شھید منان جان ند ءِ واک ءَ سرپد اَت ءُ آئی ءِ رودپتر نز آرگ بہ بہ اَنت ، وت درونتے اَنت پہ چوناھیں سیاسی راهشون ءُ باسکے ءَ۔)
بد نسیبی ءَ بلوچ ءِ آشوبی لبزانک ردانک ءِ تہ ءَ نیستی ءَ هساب اِنت، چیزے نبشتانکی کتاب ءُ واجہ ابدل نبی بنگلزھی ءُ واجہ کامریڈ واهد کمبر ءِ گلگدار اَنت ءُ کمانڈر کادر مری ءِ کتاب اِنت بلے اے تک ءَ سنگر ءِ جھد هچ وڑ ءَ پراموش کنگ نہ بیت۔ پد ءَ ھم چوشیں مزنیں مڈی یے ردانک ءِ دْروشم ءَ کسھی لبزانک ءِ تہ ءَ ناں چوشیں مزن ءُ بازیں گدارے گندگ بیت ءُ ناں کہ درکسھی لبزانک ءِ تہ ءَ مزنیں کچے ءَ نبشتانکی کتاب یا کجام ٹوهیں راهشونے ءِ زندگی نامگ یا آهانی وتی نبشتگیں رودپتر ءُ سرگوستے هست۔
شھید منان جان ءَ پد دژمن ءَ وتی کار راهبنداں تْرند تر کرت اَنت ءُ بی این ایم چیر ءُ زیر بیگ ءَ لاچار بوت۔سنگت ءُ راهشون چہ وتی هلک ءُ دمگاں لڈ ءُ بار کنگ ءَ لاچار بوت اَنت۔ مدان مدان ءَ بی این ایم ءَ دیم پہ درانڈیهی ءَ سپر کرت۔
اد ءَ بی این ایم ءِ کہ هستیں وهد ءِ کابینہ ٹھ اِت ، تہ آهانی تہ ءَ کل چہ بی ایس او آزاد ءِ کٹ ءَ ردوم زرتگیں وانندگ ، زانوگر ، شیوار ءُ چہ سرکار ءِ چیریں زنداناں زندانی بیتگ ءُ لٹ وارتگیں باسک ھوار اَنت۔ دومی ایشانی تہ ءَ بازیں سنگتے ءِ سیادی وڑے ناں وڑے ءَ گوں ندکاری ءَ اِنت۔ چہ ایشاں سنگت ڈاکتر جلال ءِ وڑیں لبزانک ءِ بستار ءَ سرپدیں مزنیں ندکارے هوار اِنت ءُ آئی ءِ هواری هما توم کہ بی ایس او ، شھید پدا اهمد ، شھید واجہ گلام مھمد ءُ شھید منان جان ءَ کشتگ هما درچک ءَ جوانیں وڑے ءَ چوش پهتویں دهکان کارے ءَ وش سمات ءُ آپ کنان ءُ ردوم دیگ ءَ اِنت۔
گوں ڈاکتر ءَ هوار لبزانکی وانندگ ءُ هنرمندیں سنگتانی ٹوهیں لڑے کہ هرکس وتی تک ءُ وتی ادارگانی تہ ءَ گوں زیبائی ءَ کار ءَ اِنت۔ چہ همد ءَ گلکاری ءِ زگریں دْروشم سھر ءَ بیت ءُ بی این ایم دیم پہ ادارگ سازی ءَ جزان کنت ءُ وتی باریگ ءِ گونڈ تریں بھرے ءَ بازیں ادارگے ٹاھین ایت ءُ همے ادارگانی سنگتانی زهمت کشی ءَ مروچی بی این ایم لبزانک ءِ پجیگ ءَ دیم پہ سپارتکاری ءَ جزان اِنت۔
بلوچ راجی جز میزران بات
بلوچستان آجو بات
سرشون :
(1) سے ماهی ” نیاورق ” ، ممبئی ، بیست ءُ پنچمی تاک
ابدل سمد کنج . (ڈاکتر ھمایوں ءِ کرتگیں ردانک ءُ آشوب ءِ سیادی ءِ جست ءِ پسو ءَ ابدل سمد همے گپ ءَ کنت۔)
