کامریڈیں اسد ۔۔۔! | سلمان ھمل | گواڑگ

لھتے مردم جھان ءَ کئیت ءُ انچیں کار کنت دانکہ دنیا مان ایت یات کنگ بیت ، پہ ٹوھیں مولے ءَ نْدر بوگ ءِ شھزانتی (فلسفہ) مارا اے درس ءَ دنت کہ مول ءِ دیم ءَ جند ءَ ھچ ارزشت نیست، آ کہ کرناں بہ گر داں مروچی گْوستانک ءِ تہ ءَ گیر آرگ بہ اَنت ، آواں وتی من ءُ مول ءُ شھزانتی (فلسفہ) ءِ دیم ءَ سر جھل نہ کرتگ،آ سکرات ءِ زھر ءِ تاس بہ بیت، منسور ھلاج ءِ پاھو ءِ ساد یا ارنیسٹو چی گویرا ءِ امریکی زورگری ءِ دستاں کوش۔

ھمے وڑ ءَ منی وتی سرزمین ءِ سر ءَ ھزاراں انچیں نام اَنت کہ آواں وتی سر داتگ ءُ وت ءَ گْوستانک ءِ تاکانی تہ ءَ نمیران کرتگ، ھما نمیران بوتگیں نامانی تہ ءَ نامے منی دوست، برات ، ھمبل جگر ءِ کپ کامریڈ اسد ئیگ اِنت، کہ آئی ءَ ننگ ءُ ناموس ءِ دود برجاہ داشت ءُ وت ءَ پہ مادریں گلزمین ءَ نْدرکرت ءُ نمیران بوت۔ بیت کنت اسد ءِ بارو ءَ نبشتہ کنگ ءَ گال بہ دْروہ اَنت، بہ بیت، پن بے کٹ اَنت ءُ ند بہ مان ایت، بلے آئی ءِ داتگیں دیمونی ءِ ند پہ نبشتہ ءَ بند نہ بیت۔ بیت کنت منی مارشت ءَ چہ جنگ ودی بہ بیت،کہ اے وڑیں نزیکیں ھمراھے ءَ گوں ھمراہ ءَ بہ بہ آن ءُ بیت کنت اے مارشت ءُ آئی ءِ ترانگاں من نبشتہ کرت مہ کن آن ءُ من ءَ لبز ھم بہ دْروہ اَنت۔

اسد ! ھما کامریڈ اَت کہ سکیں ناگیگیں جاواراں، ھوں سنگتاں ھمراھداری کنگ ءَ اَت، لھتے ءَ وتی دژمن ءِ دیم ءَ وتی سراں جھل کنان اَت، لشکرکشیانی تہ ءَ تیزی اتکگ اَت ، گل ءِ اوتاگانی راز دژمن ءَ سر بوتگ اَت اَنت، پد ءَ ھم اسد جان ءَ امیت ءِ دامن داشت ءُ دیم ءَ جنزاں اَت۔پہ گل ءِ کارانی روانی ءُ ادارھانی جوڑ کنگ ءَ شپ ءُ روچ جھد ءَ اَت، برے پروم ، برے کولواہ ءُ برے کلبر ءَ گوں ھمراھاں دوچار کپت ءُ آوان ءَ چہ سادہ ءُ مدامی وڑ ءُ پیم ءِ جنگ ءَ در آیگ ءِ سر ءُ سوج ئِے کرت۔ اے کار بزاں پہ یک نیم ٹکی ءُ ٹکی چاگردے ءِ تہ ءَ آشوبی کار ءُ ادارھانی جوڑ کنگ ، پر آئی ءَ سک گْران اَت،بلے پد ءَ ھم اے گْرانیں بار شیھو ءَ وتی کوپگاں زرت ءُ گوں بے کساس ایمانداری ءَ سپر دیم ءَ برت ۔ اے سپر ءَ وتیگاں ھم نیمراہ ءَ دْروہ اِت بلے شیھو اَت کہ گوں بچکنداں دیم پہ وتی مرادانی منزل ءَ جزگ ءَ اَت۔

اے کامریڈ اسد اَت کہ پنجگور ءَ توپک ءِ جنگ ئِے مھکمی ءَ داشتگ ءُ جنگ ءَ دیم ءَ بران اَت، انچیں ھمراہ ئِے در چت کہ آ ایمانداری ءُ جھد ءُ دلسیاھیانی اوپار کنگ ءَ وتی درور وت اَت اَنت۔پمیشکا رئیس ءِ وڑیں پدائی ءُ اسد ءِ رنگیں مھروانیں ھمراھانی روگ ءَ پد ھم توپک ءِ جنگ ءِ دْرچ مروچی جوانیں وڑے ءَ چیرکی جنگ ءِ داب ءَ جوانی ءَ برجاہ اِنت ۔ کامریڈ ءِ وڑیں ھمراھانی چہ وھد ءَ پیسر روگ چہ جمار ( کیامت ) ءَ کم نہ اِنت بلے اے راہ وت دیمونیانی راہ انت ، اد ءَ وتی ساہ ندر کنگی انت دانکہ راجی جنز پہ وتی منزل ءَ دو گام نزیکتر بہ بیت ءُ اسد بلوچ ءَ گوں وتی ھوناں منزل نزیکتر کتگ ءُ پشت کپتگیں سپر پہ ما پشت گیتکگ ، مارا ھم اسد بلوچ ءِ راہ ءَ روگ ءُ جز ءِ دراھیں توان یکجاہ کنگ ءُ دژمن نیست ءُ نابود کنگی اِنت۔ ھمے شھیدانی شھزانتی ءُ ھمے شھیدانی واھگ اِنت، ءُ شھیدانی واھگ، گوں آوانی شونداتگیں راہ ءِ روگ ءَ سرجم کنگ بہ اَنت۔

کون کہتا ہے کہ موت آئی تو مر جاؤں گا
میں تو دریا ہوں سمندر میں اتر جاؤں گا

زندگی شمع کی مانند جلاتا ہوں ندیم
بجھ تو جاؤں گا مگر صبح تو کر جاؤں گا

• احمد ندیم قاسمی

شیھو جان رخصت اف اواران