پشت کپتگیں یاد
(شھید ودار جان )
دومی بھر
وھد روان بوت من وتی وانگ ءُ زانگ ءَ دست گٹ اَت آن ءُ شھید ودار جان وتی۔ مئے نند ءُ گند ایوک ءَ شپاں بوت، شال اَت موسم مٹان اَت تہ برے نوکیں رنگے گندگ بوگ ءَ اَت۔
یک شمبے ءِ شپ ءَ گپ ءُ دیوان اَت سرکل اَت گوں آدگہ رومیٹ ءَ، برے برے ماں کہ ھردوئیں ایوک ءَ نشت ایں گڑا ماں جنگ ءِ بارہ ءَ باز گپ جت ، مھلوک ءِ بارہ ءَ گپ ءُ دیوان کرت۔ شھید ءَ مُدام گْوشت کہ من اینچو نہ ونتگ کہ وت ءَ زانتکارے بہ گْوش آں بلے من ءَمنی چاگرد ءَ ھمینچو پیش داشتگ ءُ من ھمینچو دیستگ کہ من نوں شرے وڑے ءَ سرپد آں کہ مئے پشت کپتگیں راہ بس جنگ اِنت دگہ راہ نیست گڑا من مدام گْوشتگ اَت کہ انگت بہ جل بہ چار جنگ ھلاس نہ بیت پہ ما جنگ بیت مئے وھد الم کئیت۔
گُڑا شھید ءِ پسو ھمیش اَت کہ جان گوں من برداشت نہ بیت اینچو نِندگ ءُ ندارگ کنگ ۔من ھرچ بزگیں بلوچ ءَ گند آں یا من شھید بوتگیں سنگتانی مات ءُ گْوھاراں گند آں من ءَ منی سما ءُ سنچ نندگ ءَ نہ ھل ایت ماں ھردیں کہ جنگ ءِ بارو ءَ گپ ءُ دیوان کرت گڑا تہ دیر ءَ نشت ایں۔لھتے انچیں ساھت بوتگ اَنت کہ منی واھشت مدام ھمیش بوتگ کہ بہ جل اَنت بلے وھد پہ کس ءَ نہ اوشت ایت، روان کنت ،وھد ھمیں وڑ ءَ روان اَت۔
من تئی ترانگ ءَ کپ آں گڑا من ءَ شال باز گیر کئیت ھما شپ باز گیر کا ینت کہ من ءُ شھید ءَ پہ نندگ سھب کرتگ اَنت۔ھردیں کہ ماھکانی بوتگ گڑا من ءُ شھید شپ ءَ الم تہ دیر ءَ نشتگ ایں ، گپ ءُ دیوان کرتگ۔ کندگ ءُ مشکرا بوتگ۔من ءَ یاد اِنت شپے ءَ ماھکانی اَت ، موسم سرد اَت شھید ءَ گْوشت ’’ بہ یا رو ایں بی ایم سی ءَ چاھے ور ایں۔‘‘ ما چہ کمراہ ءَ در کپت ایں۔
بی ایم سی ءَ سر بوتیں ٹی وی ھال رش ءُ کش اَت کوکار ءُ جاک اَت، ما دو چاہ زرت ءُ بان ءَ شت ءُ نشت ایں، ماہ سک ڈولدار اَت موسم سرد اَت شھید ءَ دو ٹال سگریٹ بُن دات ، یکے پہ من شھار اِت ءُ یکے وت کشگ ءَ اَت ، شھید ءَ کند اِت ءُ گْوشت ’’ تو گپے زان ئے ؟‘
’’ بہ گْوش باریں چہ گپے؟‘‘
’’ انوں من تو ماہ ءِ سر ءَ بوتینیں، کْوش پہ تبیں کشگ ءَ بوتیں دگہ کس مہ بوتیں ، کوکار ءُ جاک ھچ مہ بوتیں ءُ استاد آرپ ءِ کْوھنیں سوتے پر کرتیں سک وش نہ بوتگ اَت ، تو گْوش ئے ؟‘‘
’’ وشی ءَ ھو سکا وش بوتگ اَت، ماہ ءِ سر ءَ دریا ءِ لمب بوتیں وش تر نہ بوتگ اَت ، تو گْوش ئے __ ھاھاھاھاھا۔‘‘
’’ ھاھاھاھا ، ترا وڑ نیست تو ماہ ءِ سری سامانے نہ ئے ، تو ھمد ءَ شر ئے، تو مہ یا گوں پل۔‘‘
’’ ھاھاھا ، مزاک کن آں پل۔‘‘
’’مزاک مہ کن ھاھاھا، من ءَ ءُ ترا چوناھا ھم کس ماہ ءِ سرا سر نہ کنت منی ءُ تئی بھت ءَ ھمے جنجال اَنت ، ایوک ءَ __ ھاھاھا۔‘‘شھید ودار جان مدام بچکندگ ءَ اَت ، ھرچ تبیں جاور ءَ آئی ءِ کندگ گار نہ اَت۔
کندان ءَ گْوشت ئِے ’’ بہ رو ایں کہ نوں من ءَ سرد کنگ ءَ اِنت۔‘‘
ماں چہ بی ایم سی ءَ در کپتیں دیم پہ وتی کوٹی ءَ ،ماں راہ ءِ نیم ءَ وتی شپ ءِ توشگ زرت ءُ لھتے سگریٹ ھم۔ مزاک کنان راھادگ بوت ایں۔
روان اِنت۔۔۔
