بلوچستان ءَ وَ چوناھا ھزارانی کچ ءَ ھال رسانکدر ءِ بْراہ جوڑ بہ اَنت بلے برے انچیں ھال ھم دیم ءَ کپ ایت کہ مردم ءِ زرد ءَ ژامبلین اَنت۔
شما بلکیں بہ جیڑ اِت کہ اے نبشتانک چہ شھزانتے ءِ گْوشتن ءَ، چہ کواسے ءِ گپ ءُ گالاں یا چہ کتابے ءِ مناکاں نبیسگ بوتگ گڑا من چہ پیسر ءَ چہ شما پھلی لوٹ آں کہ چوش نہ اِنت شما جیڑ اتگ۔ اے منی ھما مارشت اَنت کہ من ماتانی رتکگیں ارسانی گندگ ءَ پد نبیس اتگ اَنت۔ماں اے نبشتانک ءَ من ناں لبز در چتگ اَنت ءُ ناں کہ چوشیں مناکے دیم ءَ آؤرتگ ،بلکیں وتی مارشاتان ءَ انچوش پہ شما سرکنگ ءِ جھدے کرتگ۔
وھدے چہ مردم ءِ درائیں اوست ءُ امیتاں ستک ھلاس بہ بیت گڑا گوں سدکی ءَ ترا ھما مردمانی سر ءَ بزگ بیت کہ چہ زندگ بوگ ءَ پد ھم چہ زندمان ءَ بے پرواہ بہ اَنت۔ مروچی وھدے زاکر جان ءِ مات دگانی سر ءَ زار زار ءَ گریوگ ءَ اِنت کسے اے سرپد مہ بیت کہ آ پہ وتی بچ ءِ جتائی ءَ گریوگ ءُ پریات کنگ ءَ انت پرچا کہ اے ھما مات انت کہ آئی ءَ زاکر ءِ وڑیں نا ترسیں راھشونے ودی کرتگ ءُ پہ راج ءَ نْدر کرتگ۔جی ھو! ھما زاکر ءِ گپ بوگ ءَ اِنت کہ آئی ءَ بلوچ ماتانی ارس پاک کرتگ اَنت ءُ گوں آوانی توار ءَ ھم توار بوتگ ، گام پہ گام ھمراھداری ئِے کت۔ مروچی زاکر جان ءِ مات نزور نہ اِنت بلکیں آئی ءِ اوست ءُ امیت اچ ما پرشتگ، آ مروچی مئے بے پرواھی ءُ بے زانگی ءَ پد ھم ھاموش بوگ ءِ جھد ءِ سر ءَ گریوگ ءَ اِنت۔ آ گریوگ ءَ اِنت کہ زاکر جان ءَ مدام پہ اے راج ءَ دگانی سر ءَ روانک کش اتگ بلے مروچی پہ آئی ءَ روانک ءِ کشگ ءَ کس ساڑی نہ انت۔
آ اچ ما پرسگ ءَ اِنت کہ مروچی پرچا زاکر ءِ وڑیں ھزاراں ورنا بیگواہ کنگ بوتگ اَنت ءُ دژمن ءِ آزاراں سگ ءَ اَنت پرچا کہ آ اے چاگرد ءِ ھمراہ اَت اَنت۔ آواں چاگرد ءِ تہ ءَ بوؤکیں ھمک نا روانی ءِ سر ءَ تْران کرتگ اَت، پریات اش کرتگ اَت__ ءُ لمہ پد ءَ وت مارا جستانی پسواں دیگ ءَ اِنت کہ سد بژن، مروچی ھمے چاگرد ءِ مردمانی زبان گنگ اِنت، آ پہ راستی ءَ گپ کنگ ءَ ترس اَنت کہ آ ھم بیگواہ کنگ مہ بہ اَنت۔ ھمے ارس کہ چہ لمہ ءِ چماں شیپ گپتگ اَنت، پہ ما شگان ءُ ٹاکورے ءِ مانند اَنت، چہ لمہ ءِ چماں شیپ گرگ ءَ پد مارا تاسے آپ ءِ تہ ءَ بڈگ ءُ مرگ ءِ گْوشگ ءَ اَنت۔ ما اگاں مروچی ھست ءُ زندگ ایں یا زندگ بوگ لوٹ ایں گڑا مئے سیادی گوں ھمے چاگرد ءَ اِنت، ما چہ چاگرد ءِ ھچ وڑیں درد ءُ رنجاں گستا بوت نہ کن ایں۔
مروچی پمیشکا چہ مات ءِ چماں ارس ترمپ ترمپ ءَ رچگ ءَ اَنت کہ گوں آئی ءَ روانک ءِ تہ ءَ ھمینچو مردم ھوار بوتیں کہ لٹ ھم زمین ءَ مہ کپتیں، بلے گوں آئی ءَ روانک ءَ ایوک چندے مردم اَت اَنت کہ وت ءَ ھمے درد ءِ بھرے سرپد بوت اَنت۔
آ چہ ھمدرداں ابید دگہ کس نیست اَت کہ انسانے ءِ بستار ءَ، راجے ءِ بستار ءَ ھمے روانک ءَ ھوار بوتین ءُ وتی راجی ڈبو ئِے پیلو بہ کرتیں گڑا پمیشکا لمہ زار زار ءَ گریوگ ءَ اَت ءُ جست کنگ ءَ اَت کہ مروچی کج ءَ اِنت ھما نبشتہ کار، کج ءَ اِنت ھما لچہ کار، کج ءَ اِنت ھما استاد، کج ءَ اِنت ھما نودربر ، کج اَنت ھما سیاسدان ، کج ءَ اَنت ھما بیروکریٹ، مروچی کج ءَ اَنت ءَ ھما لبرل ءُ دیمروئی پسند کہ بلوچستان ءِ جیڑہ ءَ ابید پرشت ءُ پروش ءَ گیشوار کن اَنت،وھدے ماتے دگ ءِ سر ءَ زار زار ءَ گریوگ ءَ اَت پہ آئی ءِ تسلہ دیگ ءَ ایوک یک مات ءُ چکے ھست اَت کہ آ وت چہ ھمے درد ءَ گوزگ ءَ اَت اَنت۔
اے ارسانی پرواہ ھماوان ءَ بیت کہ دیستگ اَنت اش، کرگوشک ءِ واب ءَ وپتگیں ، چہ اے ارسانی ھار ءَ رک اَنت ءُ کج ءَ تچ اَنت ءُ رو اَنت؟ ، ھمے کہ پرایمنیں جھد ءِ منوک ءُ سوشلسٹ اَنت کجام سیاہ مار ءَ وارتگ اَت اَنت، کہ وھدے ماتے ءَ، گْوھارے ءَ، براتے ءَ گورنر ءِ لوگ ءِ دپ ءَ رسینگ ءَ،کارندھاں آوان ءَ راہ ءِ سر ءَ داشتگ اَت؟
بژن کہ اے ارسانی مز ءِ دیگ ءَ زاکرے بوتین ءُ مئے زرد ئِے ژامبلینتین اَنت ءُ روانک ءَ ھوار بوگ ءِ بہ گْوشتین ئِے بلے آ زندان ءَ بندیگ اِنت۔
مروچی لمہ ءِ ارساں مارا اے باور کنائینت کہ ما ھوری ءَ ، راجے ءِ جھت ءَ چہ وتی راجی زمہ واری ءَ چینکس بے پرواہ ایں، مارا ایوک دانک ءُ گالانی جھان ءَ زندگ بوگ دوست بیت ، مارا گوں آ مات ءُ گوھارانی درداں ھچ نزیکی نیست کہ آوانی چم ءِ چراگ دگانی سر ءَ بیگواہ کنگ ءُ کشگ بوتگ اَنت۔
نو مئے اندر ءَ آ راجی درد ءُ بلوچیت نیست کہ وت ءَ آ مات ءُ گْوھارانی درد ءِ بھرے سرپد بہ بہ این ءُ ھوار بہ بہ ایں، بلے لمہ من گوں تو ءَ دستبندی یے کن آں کہ اے ارساں پشت گیج ، اگاں چپ ءُ چاگرد ءِ کسے ءَ اے مارشت بوت ءُ بے کسی ءِ ھلاس کنگ ءَ، وت ءَ مانداشت ئِے گڑا ھمے ارساں پہ ھمائی ءِ رکینگ ءَ کامرز کن پرچا کہ تو زاکر جان ءِ مات ئے۔
