ھون ءِ وشبو | جنگی ورنا

زند زیبائیں چیزے وھدے کہ زند ءِ تہ ءَ ھمک وشی بہ بہ اَنت ، مردم ءَ زندمان سک دوست بیت۔ بلے اگاں زندمان ءِ تہ ءَ کسے گلام بوت، آ زند زیبا نہ بیت چہ آ زند ءَ بنی آدم ءَ مرگ دوست تر بیت۔ زند ھما وھد ءَ زیبا بیت کہ وتی زمین ءِ سر ءَ زند بہ گوازین ئے۔ گوں وتی سیاد، دوست ءُ سنگتاں ھوار بہ بہ ئے گڑا چہ زندمان ء زیبا تتر ھچ نہ بیت۔ کسے کہ گلام بوت، چہ وتی ھنکیں ءَ درکنگ بوت چہ وتی سیاداں ءُ چہ وتی راج ءَ گستا کنگ بوت گڑا چہ آ زند ءَ مرگ زیباتر بیت۔

اگاں وتی زندمان ءُ راج ءِ زندمان ءَ زیبا کنگ لوٹ ایں گڑا آ راہ یکین اِنت کہ گلامی ءِ زمزیل پروشگی اَنت۔ پہ گلامی ءِ زمزیلانی پروشگ ءَ ھمبلاں وتی ساہ نْدر کرتگ اَنت۔ زندمان ءِ وشی یل داتگ اَنت ءُ بلوچ راج آجوئی جنگ ءِ بھر بوتگ اَنت ءُ ماں وتی زمینءَ گوں زورگراں میڑ برجاہ داشتگ۔

مارا ھم ھما ھمبلانی راہ ءِ مساپر بوگی انت ءُ پہ وشیں باندات ءَ ، پہ زیبائیں زندمان سپر کنگی اِنت ، مارا وتی پل ءُ گوھریں شھیدانی واھگ سرجم کنگی اِنت۔ اے جنگ ءَ راجی جنگولاں درسیں چیز ، مال ءُ دلوت کربان کرتگ اَنت ، وتی ساہ کربان کرتگ ، دوستیں مردم کربان کرتگ اَنت۔

ھزاراں ورناھاں وتی ھون شلینتگ اَنت پہ ماتیں گلزمین ءَ۔ ھمک گْور ءَ ھونانی وشبو شنگینتگ اَنت۔ شھیدیں ھمبلانی رتکگیں ھون اَنت کہ کوہ ءُ کوچگاں مِسک اتاریں وشبو تالان اَنت۔ وھدے کہ نرمزاریں ھمبلانی ھون ءِ ترمپ گلزمین ءَ کپ اَنت گلزمین وت ءَ گوں ھوناں سینگار ایت ءُ ھما ھمبل کہ وتی ھوناں گلزمین ءِ سر ءَ ریچ اَنت آ گلزمین ءِ سالونک بہ اَنت۔ ھمک سال ءَ بازیں زمین پھاز ندر بیت، پہ گلزمین ءَ ساراوان ءَ بہ گر داں کہ جھلاوان ءَ ، بلوچستان ءِ ھرچ کنڈ ءَ شھیدانی ھونانی وشبو شنگ اِتگ اَنت۔

آجوئی ھما درپشوکیں استال اِنت کہ پہ اے استال ءِ رژنا کنگ ءَ مارا دلسیاھی کشگ ءُ دیمونی دیگ لوٹ ایت۔ اگاں ما پہ دیمونی ءَ دل جت گڑا ھچ بر آجو نہ بہ ایں۔ اے دراجیں راھے ، بوت کنت داں منزل ءَ ما زندگ نہ مان ایں بلے چہ ما پد ھما کہ اے زمین ءَ زند گوازین اَنت آ پہ وشھالیں زندے گوازین اَنت۔ اگاں آ ھم گلام بہ بہ اَنت گڑا آیانی زندمان چو مئے زندمان ءَ زوراکیانی آماچ ءُ مرگ ءِ ارجان بنت۔ مرگ ھمک بنی آدم ءِ سر ءَ ھست اِنت گڑا آ مرگ ءَ انچیں مڑاھے گون کن ایں کہ مرگ ءَ پد ھم زندگ مان ایں۔

آجوئی ءِ جھد ءَ راجی بامرداں وتی مرگ پہ مڑاھے امباز اتگ ءُ نمیران بوتگ اَنت آ پدائی ئیں سنگت بہ بہ اَنت یا کہ ھما سنگت کہ کوھاں نشتگ ءُ جنگ اش داتگ ءُ نمیران بوتگ اَنت۔ جنگ چون ءَ سک ترسناک بیت اگاں جنگ کہ پہ آجوئی ءَ بہ بیت گڑا آ جنگ ترسناک نہ بیت بلکیں گوں آ جنگ ءَ مھر بیت۔ ھمے وڑ ءَ گوں جنگ ءَ مھر کنوکیں ھمبلانی ھند مشکے اِنت۔

’ مشکے ‘ ھما ھند اِنت کہ اے ھند ءِ زمین شیداھاں گوں وتی وشبویں ھوناں گْوستانک نبشتگ کہ آ پہ ابد جھان ءَ نمیران اَنت۔ مشکے ءِ کوھاں مدام زمین شیداھانی ھونانی وشبو تالان اَنت۔ ھمک سال کہ دسمبر کئیت پہ بلوچ راج ءَ دردناکیں ماھے بیت ءُ گْوز ایت چی ءَ کہ اے ماہ ءَ مئے بازیں ورنا، راھبر چہ ما سستگ اَنت۔

انچوش گْوستگیں دسمبر ءَ ھم وتی درد مارا ءَ دات اَنت ءُ شت۔ سال 2023 اَت ، دسمبر ءِ ماہ اَت کہ سال ءِ گُڈی ماہ اِنت درسیں مردم نوکیں سال ءِ ودار ءَ اَت اَنت۔ مئے ھیال ءَ ھمیش اَت کہ دسمبر اے رندی مارا درد مہ دے کہ اے دردانی سگگ ءِ ھاٹیگ چہ ما شتگ۔ دسمبر تو مارا باز درد داتگ دْریگتیں کہ ئِے یکبرے بہ یتکین ءُ بہ رپتین ئے ، پد ءَ ھچ بر واتر مہ کرتیں۔ مدام جیڑگ ءَ اَت ایں کہ دسمبر تو زوت بہ رو کہ تو مدام مئے ٹپاں کدین ئے ، نوک کن ئے۔

بلے اے رندی ھم دسمبر ءَ وتی درد مارا دات اَنت ءُ گْوست۔ 28 دسمبر اَت ، ھالے ترگ ءَ اَت کہ مشکے ءَ پاکستانی جنگی بالگرد تر ءُ گرد کنگ اَنت۔کوھاں ڈرون تر ءُ گرد کنگ ءَ اِنت بلے انگت ھچ وڑیں جنگ ءِ ھال نیست اَت ۔اے روچ گْوست ءُ 29 دسمبر بوت پد ءَ ھالے اتک کہ مشکے ءَ کوھاں ڈرون ارشے بوتگ ءُ جانی تاوان ءِ ھال اِنت۔

درس پہ زمین زادگاں دوا کنگ ءَ اَت اَنت کہ پاکیں ھاوند سرمچار تئی باھوٹ اَنت۔ گوں کس ءَ ھال بوگ ءَ نہ اَت ءُ روچ روگ ءَ اَت کہ پاکستانی لشکر ءَ درشانے شنگ کرت کہ مشکے ڈرون اُرش ءَ پنچ سرمچار جتگ۔ بلے آیانی پجار ءُ اکس انگت شنگ نہ کرت اَنت۔ ھر کس جیڑگ ءَ اَت باریں کئے اَنت۔ کدی دل ءَ ھمے گپ اَت کہ بوت کنت بدینگیں مردم شھید کرتگ اَنت ئِے ءُ پاکستانی لشکر وتی بے سوبی ءِ چیر دیگ ءَ چوش گْوش ایت۔

بلے آ بندیگ نہ اَت اَنت۔ کلوھے اتک کہ مشکے ڈرون اُرش ءَ درک گوں پنچ سنگتاں شھید بوتگ ، چہ آیاں یکے باسد اِنت ءُ یکے مھراج۔دو سنگت ءِ انگت پجار نہ بوتگ اَت۔ پاکستانی لشکر ءَ 30 دسمبر ءِ شپ ءَ سَے اکس رسانکدر ءَ شنگ کرت چہ آیاں یکے شھید درک ئیگ اَت، یکے شھید باسد ءِ ءُ یکے شھید مھراج ئیگ اَت۔

دل مدام وس واس ءَ اَت کہ باریں آدگہ دوئیں سنگت کئے اَنت ءُ آیانی اکس دژمنیں لشکر ءَ پرچا شنگ نہ کرت اَنت۔ بلے سھتے ءَ پد یکے ءَ گْوشت کہ سنگت کینگی ءُ اَتا ءِ ھم شھیدی ءِ ھال اِنت۔ کینگی کہ شھید سلیمان پنام شیھک جان ءِ ورنائیں بچ اَت ، آئی ءِ اکس مدام چمانی دیم ءَ ترگ ءَ اَت کہ یار کیم جان تو چو زوت چی ءَ شُت ئے۔

گوں ھمے جیڑگاں شھید بوتگیں سنگتانی اکس دیم ءَ کپت اَنت کہ کیپٹن سرور پنام درک، شھید ابدالستار پنام مھراج، شھید آزم پنام باسد، شھید کینگی سلیمان پنام مسلم، شھید الی پنام اتا ءِ اکس ھوار اَنت کہ بلوچ راجی آجوئی سنگر (براس) ءَ درشانے داتگ ءُ ایشانی شھیدی ءِ ھال راست گْوشتگ اَت۔