نمدی یے پہ شھید رسول جان ءَ | تنویر مراد

رمس : 10/26/2023

دْروت ءُ دْراھبات کماش!

من اد ءَ وش ءُ وشهال آں ءُ تئی وشهالی ءَ چہ هاوند ءَ لوٹوک آں۔

انوں شب ءِ چہ وھد اِنت من ءَ سما نہ اِنت، پرچا کہ منی کر ءَ انوں ھچ نیست ابید چہ ھمے ند ءُ کاپی ءَ کہ ھمیشانی برورد ءَ من پہ تو اے نِمدی ءَ نبیسگ ءَ آں۔

من پہ مردگاں نمدی نبشتہ نہ کن آں پرچا کہ نِمدی مردگاں نہ رس اَنت بلے من زان آں تو زندگ ئے، تئی ھیال زندگ اَنت۔ تئی دیمونی زندگ اَنت۔تئی کشتگیں کِشار زندگ اَنت۔ تئی زمین دوستیں سنگت زندگ اَنت. تئی گل بی ایس او ھم زندگ اِنت ، تئی راج زندگ اِنت ءُ تئی گھگیری زندگ اِنت۔

من اے نمدی ءَ پہ تو پمیشکا نبیسگ ءَ آں کہ ترا تئی ھما جھد ءِ ھالاں به دے آں کہ تو بندات کرتگ اَت، ٹوھیں کچے ءَ گُونڈو یکجاہ کرت ءُ وانیت اَنت۔

تئی ھمے جھد ءِ برورد اِنت کہ مروچی کولواہ ءِ نام ڈولدار اِنت ءُ تئی ھمے لیکہ سرجمیں کولواہ ءَ زندگ اِنت ء کولواہ ءَ مروچی ھمک زھگ پہ وانگ ءَ جھد کنگ ءَ اِنت۔

ھمے نودربر کہ چہ تئی کوٹی ءَ تئی ھمراھی ءَ بیگواہ کنگ بوتگ اَت اَنت، آ دْراه یلہ کنگ بوتگ اَنت. بلے بد بهتی ھمیش اِنت کہ تو یل کنگ نہ بوت ئے۔تئی جون مارا دست کپت ءُ تو پہ وت ءَ شھیدی ءِ نامے کٹ اِت۔ تئی جون ءِ دست کپگ ءَ رند درستیں راج ءَ ترا سهریں دْروت پیش کرت ءُ ترا گوں بلوچستان ءِ بیرک ءَ سینگارگ ءَ رند تئی گڈی وابجاہ ءَ رسینت۔

تئی نودربر ءُ ھما سنگت کہ گوں تو ھوار بیگواہ کنگ بیتگ اَت اَنت ءُ پد ءَ یلہ کنگ بیتگ اَت اَنت، چہ آیاں لھتے سنگتاں وتی وانگ سرجم کرتگ ءُ لھتے انگت جھد کنگ ءَ اَنت ءُ پہ بلوچ راج ءَ سیاست ھم کنگ ءَ اَنت۔ ترا یات کن اَنت، پہ ترا شئر گْوش اَنت ، برے برے دیوان ءَ کہ تئی گپ بیت مردم دْرا گوں ھاموشی ءَ اش کن اَنت ءُ پد ءَ تئی داتگیں دیمونیاں سلام کن اَنت۔

تئی سنگت ھمے گْوش اَنت کہ تئی جھد زوال نہ بیت، تئی جز برجاہ اِنت، ھمے گام کہ تو چست کرتگ، پہ بلوچ راج ءَ مٹ آران کنت ءُ تئی داتگیں دیمون زوال نہ بہ اَنت۔

گڈسر ءَ من ایوک ھمے گْوشگ لوٹ آں کہ تئی مات گل جان مئے ءُ درسیں بلوچ راج ءِ مات اِنت۔درسیں راج تئی مات ءَ وتی مات سرپد بیت۔چوشیں ماتانی دیمونی ھچ وڑ ءَ شموشگ نہ بہ اَنت کہ ایشاں تئی وڑیں بچ ودی کرتگ ءُ پہ گلزمین ءَ سالونک کرتگ اَنت۔

مئے گوں ھدا ءَ نیکیں واهگ اِنت کہ مئے سرڈگار آجو بات ءُ بلوچستان تئی وڑیں آشوبی بچ ودی کنات، تئی داتگیں دیمونی رنگ بہ یارات ، تو پد ءَ ودی بات ئے۔

تئی پگر ءِ دیوانگ ءُ تئی گیشینتگیں کشک ءِ مساپر ءُ تئی کستر

تنویر مراد