مئے میتگ ءِ نودربر انچوش پشت ءَ کپتگ اَنت ، اے بارہ ءَ مئے نودربر ھچ سرپد نہ اَنت کہ وانگ ءُ زانگ چی اِنت۔ پرچا کہ مئے میتگ ءَ وانگ ءُ زانگ ءِ ھچ آسراتی نیست۔مئے میتگ ءَ 2018 ءِ وھد ءَ وانگ بوت ءُ پد ءَ 2019 ءَ مئے وانگجاہ بند بوتگ، مئے کر ءَ کسانیں نودربر پہ دگہ جاھاں وانگ ءَ رو اَنت، مئے میتگ ءِ وانگجاہ شش سال اِنت بند اِنت۔
2023 ءَ مارا چہ بی این پی ءِ نیمگ ءَ وانگجاھے رس اِت ءُ لھتے وھد ءَ پد وانگجاہ ءِ کار بندات بوت۔ مئے میتگ ءِ سروک ءُ کماش وش ءُ شادان بوت اَنت کہ پہ مئے نودربراں وانگجاہ پچ بوگ ءَ اِنت، مئے زھگانی پندجاہ کمو نزیک بیت۔
لھتے وھد ءَ کار بندات بوت۔ وانگجاہ ء ِکار کمو آسر کنگ ءَ پشت کپت، ماھے بوت مزدور پہ روزگاری ءَ دگہ جاھاں کار کنگ ءَ شت اَنت چہ ایشی ءَ مئے وانگجاہ سرجم نہ بوت ، مئے نودربرانی وانگ اِش ھراب کرت ، مئے لھتے نودربر ھست شپانک اِنت، بے وانگ ءَ زند اِش ھراب اِنت
وھدے کہ من وتی میتگ ءِ نودربراں گند آں منی چماں ارس گْوار اَنت۔ باید اِنت مئے میتگ ءِ سروک ءُ کماش تپاک بہ بہ اَنت ءُ مئے وانگجاہ پچ بہ بیت پرچا کہ وانگجاہ گوں یک مردمے ءَ پچ نہ بیت، مئے بْرات ھم کوپگ بہ بہ اَنت گڑا مئے وانگجاہ پچ بیت، پد ءَ مئے نودربر ھم سرپد بہ اَنت۔
مروچی سال 2024 اِنت ءُ مئے وانگجاہ انگت بند اِنت پرچاکہ مئے گپ ءَ کس گوش نہ دار ایت، مئے نودربراں باز کلوہ کرتگ وتی وانگجاہ ءِ بارو ءَ ، انگت مئے وانگجاہ پچ نہ اِنت۔ ما دگہ ھِچ نہ لوٹ ایں بلے مئے وانگجاہ ءَ پچ بہ کن اَنت، ھمے وڑ ءَ ھزار ءَ گیش زھگ چہ بے وانگی ءِ سبب ءَ وتی زندگی ءِ تہ ءَ ھچ کرت نہ کن اَنت۔ مردم گریب اَنت ءُ پہ وانگ ءَ وتی زھگ ءَ دگہ ملکے ءَ دیم دات نہ کن اَنت۔ باید اِنت مئے سرکار ءُ واجہ مارا وانگ ءِ ھک ءَ بہ دے اَنت ۔مئے بلوچستان تہ ءَ %87 جنینانی وانگ المی اِنت ۔ داں کہ وتی ھک ءَ بہ زان اَنت ، ءُ اے بہ زانت اَنت کہ کجام راہ پہ ما شر انت۔ مئے جنین بے زانتی ءُ بے وانگی ءِ سبب ءَ پہ وتی باندات ءُ ھچ وڑیں کارے کرت نہ کن اَنت۔
من ھمے گْوشگ لوٹ آں کہ پرچا مئے وانگجاہ بند انت ، مئے گپ ءَ دیم ءَ بہ بر اِت داں کہ مئے وانگجاہ پد ءَ پچ کنگ بہ بیت۔ دانکہ مئے آؤکیں پدریچ بوان اِیت ءُ زانتکار بہ بیت۔
