مروچی ملا جان ترا سالے سر جم اِنت کہ تو چہ ما جسدی رنگ ءَ دور بیتگ ءُ نمیران ئے۔ بلے تو ھست ئے ، ھرچ ھما زندگیں بلوچ ءِ دلءِ دریکگاں ھوار ئے کہ تو پہ آئی ءَ گوں زوراک ءَ جنگ کرتگ۔ تو ابدمان ئے تو بے ھال کنگ نہ بہ ئے، تو ھرچ بلوچ ءِ دْروشم ءَ زندگ ئے۔
تو سرمچارانی دْروشم ءَ زندگ ئے، تو سنگتانی دروشم ءَ زندگ ئے ، تو جھد ءِ دْروشم ءَ زندگ ئے ، ھست ئے ، ھمد ءَ ئے ، مزنبند ءِ ھشیمیں ھساراں انگت سنگر گپتگ ءُ نشتگ ئے ءُ دژمن ءِ سر ءَ آس ءُ بیر گوارگ ءَ ئے۔
ملاجان ! تئی تپنگ ءِ ھر گور ءَ توار اِنت ، ساھیجی ءُ مزنبند ءَ بہ گر داں کہ شیراز ءُ کلبر ءَ تو اے سال ءَ گوں سنگتاں گیشتر پند جتگ ، تو گیشتر پروگرام جوڑ کرتگ ، تو پہ جھد ءِ مھکمیءَ گیشتر گوں سنگتاں ھم دیوان بیتگ ئے ءُ جھد ء ِسنگتانی آؤکیں باندات ءِ بارہ ءَ جیڑ اتگ ءُ سسا کرتگ کہ کج ءَ ءُ کدی ، کجام وڑ ءَ جھد مھکم بہ بیت دژمن پروش بہ وارت تئی گوں سنگتاں شھادت ءَ بیت کنت دژمن ءَ گل کرتگ کہ من ملا بھرام شھید کرتگ ، گوں وتی بالگرداں ارش کرتگ، من ءَ سوب رس اتگ ۔ پد ءَ ھما داشتگیں پوجی دلّار ءُ ڈنگاں ھم گل کرتگ کہ ما ملا بھرام شھیدکرتگ نو مارا تاج سر ءَ بیت۔بلے چوش نہ زان اَنت کہ سنگتانی شھادت جھد ءَ گیشتر مھکم کنت ، شھیدانی ھون ءِ وش بو دیگہ چینچو ورنا تیار کن اَنت ، آ پد ءَ ملا بھرام بہ اَنت ، آ پد ءَ کمانچر بہ اَنت پہ دژمن ءَ آس ءُ بیر گوار اَنت۔وتی شھیدانی رتکگیں ھوناں گیر کار اَنت ، بلوچ جھد ءِ کاروان ءَ ھم دست بہ اَنت ءُ شھیدانی واھشتانی پد ءَ جزان کن اَنت کہ آ آجوئی اِنت ، بلوچ ءِ وت واجھی اِنت۔
دیدگیں ملا جان! تئی گوں سنگتاں روگ ، ھمے درد اِنت ءُ ھچ سکگ نہ بیت، ھمے درد کہ شمئے دیم پہ دیمی دیدار چد ءُ دیم نو ھچ بر نہ بیت۔ بلے ھما اِنت کہ شما نمیران بیتگ اِت۔ انچوش سما بیت کہ شما گیشتر دیم ءَ اِت۔ شمئے اکس ءُ ویڈیو سنگتاں شنگ کرت اَنت کہ شما بلوچستان ءِ کوہ ءُ ھساراں سنگر گپتگ ءُ نشتگ اِت یا دژمن ءِ سر ءَ نپت ءُ بیر گوارگ ءَ اِت۔دژمن انچوش گوکو اِنت کہ وتی سر ءَ ھم چست کرت نہ کنت وتی موٹل ءُ گاڑیاں ھم داشت نہ کنت۔آ انچوش وتی سنگراں یا گاڑیاں شموشگ ءَ اِنت ، آہ ءُ زاراں یل کنان اِنت یا گوکو اِنت ءُ گاڑیانی چیر ءَ چیر اِنت یا وتئی سلاہ ءُ ازباباں یل کناں شلوار ءَ لانچگ ءَ اِنت ، انچوش تچگ ءَ اَنت پدءَ تئی کاروان آھانی سامان ءُ سلاھاں دستیگ کنگ ءُ بنجلاں مانداران در کپگ ءَ اِنت۔
دیدگیں راھشون! تو وتی زندگی پہ وتن دات ، پہ راج دات ، تو بھ پہ سنگل ءِ بانداتءَ نہ جیڑ اِت، تو ایوک جھد کرت، من ءَ یاد اِنت تو کہ وھدے چہ امارات ءَ اتک ئے من ترا بازار ءَ باز کم دیست ، من ھمے جیڑ اِت مردم چہ ڈنی ملکاں کئیت ، بازار ءَ گرد ایت ، شوک ءُ شان کنت۔روچے استری داتگیں جوڑی یے گد گور ءَ کنت۔جما ءَ نماز ءَ دیم ءِ سرپ ءَ گوں وش وشیں بواں سھرا بیت بلے من ترا نہ دیست، ناں من ترا گیشتر بازار ءَ دیست یا کہ چوشیں شوک ءُ شان ءَ دیست کہ دگہ مردماں کرتگ اَنت۔ ھما درویشیں ملا بیتگ من دیستگ یک ءُ دو موکلاں پد تو درملک یل دات اَنت گیشتر بازاراں کم زاھر بوت ئے۔
پد ءَ دیر نہ اَت کساس سالے ءُ کپے بیتگ ات کہ شھید ھالد ءُ دلجان شھید کنگ بیتگ اَت اَنت پد ءَ دمگ سک ھاموش اَت اَنت۔سنگت یک یک اَت اَنت، آھاں سرے درکار اَت کہ آھانی راھشونی ءَ بہ کنت۔وتی ھند ءُ دمگاں کار کرت بہ کنت ، راہ ءُ دراں بہ زانت آپ ءُ کوھان ءُ راہ ءُ راھبنداں شر پوہ بہ بیت۔کوھی مردمے بہ بیت۔آ راھشون تو اَت ئے کہ چوش ربال ءَ سنگتاں ھوار کپت ئے۔تو انچوش کار کرت کہ ھرچ مشکل وتی سر ءَ زرت اَنت۔ جھد انچوش مھکم بوان بوت ، سنگتانی ھمراہ داری بہ بیت یا پہ جھدءَ دگہ کار ءُ کسب۔ تو بنداتی روچاں داں شھادت ءَانچوش پیلو کرت اَنت۔ درستیں سنگت اے گپ ءِ گْواہ اَنت بلے بندات ءَ ھالد شھید بیتگ اَت استاد کمبر ریاستی آزارجاھاں بند اَت ، شکاری گوں سنگتاں ایوک اَت۔ گوں تئی ھوار بیگ ءَ جھد ءُ جھد ءِ سنگتاں انچوش مار اِت کہ گْوش ئے اللہ ءَ پہ بلوچ جھدءَ جوڑ کرتگیں کارستے روان داتگ اَت۔
ملا بھرام کہ جھد ءَ ھوار بوت گڑا شکاری وتی ھند ءُ دمگاں گیشتر دلجم بوت ، پرچا کہ شکاری ءُ ملا بھرام یکیں ھند ءَ نشتگ اَت انت۔ملا بھرام ءِ ھواری ءَ شکاریءَ پہ بلوچ جھدءَ گیشتر سوب مندی دیست۔سک گَل ات کہ مارا ملا گونگیں سنگتے ھوار کپتگ کہ آئیءِ کسانی مزنبند ءِ کوھاں گْوستگ۔ وتی ھند ءُ دمگاں انچوش آشنا اِنت کہ ھر جاہ ءِ نام تئی دپ ءَ در اتکگ گڑا ملا بھرام ءَ ھما ٹک انچوش نشاندھی کرتگ ، سنگت انچوش سر ءُ سوج کرتگ انت کہ گْوش ئے ھما جاہ ءَ مردم ساڑی اِنت ، ملا جان ءَ سنگت انچوش سر ءُ سوج کرتگ اَت اَنت کہ آئی ءَ ڈوک ڈوک یاد اَت ، آپ آپ ءَ سوگہ اَت ، کوہ کوہ ءَ بلد اَت، کور کور ءَ سرپد اَت ءُ درستیں ھند آئی ءَ زانتگ اَت اَنت ، استاد کمبرءَ ملا جان ءِ نام کوھانی شھزادگ ایر کرتگ اَت۔
تئی سنگت کسہ کن اَنت کہ آ سنگر ءَ ملا بھرام گونگیں سر کہ ھمراہ بیتگ اَنت گڑا آ جنگ ءِ تام ءُ تاھیر دگہ بیتگ اَنت انچوش جنگ وش بیتگ، انچو سپر۔ جھد ءُ سنگت ھم انچوش شادان بیتگ اَنت داں ملا جان ءِ اسنیپر ءَ کار کرتگ ءُ آئی ءِ رینج بیتگ بزاں دژمن کونڈموش بیتگ۔ چہ سنگر ءَ در اتکگیں ھرچ تیر ءَ یکے کونڈموش بیتگ۔ آئی ءِ پریادانی توار داں لاھور ءَ شتگ اَنت۔پاکستان ءِ شاھین ملا بھرام ءِ ھلاپ ءَ بے بانزل بیتگ اَنت۔ٹرکانی چیر ءَپترتگ اَنت بلے ملاجان ءَ گوں سنگتاں گاڑیانی چیر بہ بیت یا کوہ ءُ تلمبانی چیر ھچ جاگاہ نہ اِشتگ ، در گیپتگ ءُ درست مُرادر کرتگ اَنت۔مزنبند ءِ سنگراں انگت یک تیرے آواز کنت گڑا مئے دل ءَ آئی ءِ آواز ءَ تئی اسنائیپر انگت ھم آواز اِنت ، سنگت گیشتر مھکم اَنت ، گیشتر تئی بھادری ءُ دلسیاھی کشگ ءِ درور ءَ دے اَنت کہ مارا ملا بھرام گونگیں سرانی سوج سسا ءُ شھزانتی ءِ بنیاد ءَ وتی جھد دیم ءَ برگی اِنت پرچا کہ تو انچوش وت ءَ ابدمان کرتگ، تو مروچی بلوچ جھد ءِ راھشونی ءِ ھما درور جوڑ بیتگ ئے کہ راجے سما بہ کنت کہ مارا وتی سسا ، سنچ ءُ شھزانتی ءُ جھد چوں ملا بھرام ءَ دیم ءَ برگی اَنت، جھد کنگی اِنت وت ءَ را مھکم کنگی اِنت۔
