انچوش کہ ما سرپد ءُ زان ایں سرجمیں جھانءَ 21 اسپنتان ءَ ماتی زبانانی میان استمانی روچ برجم دارگ بیت ءُ اے روچ ءَ ھرچ راج وتی ماتی زبان ءِ بارہ ءَ مراگش دار اَنت، روانک کش اَنت ، جرتاک ءُ پنتاک جوڑ کن انت ءُ وتی مردماں زبان ءِ گْوستانک ءُ پھریزگ ءِ بارہ ءَ سرپدی دے اَنت۔ بیست ءُ اسپنتان پرچا ءُ چہ پیم ماتی زبانانی میان استمانی روچ ایر کنگ بیتگ ؟
سال 1952 وھد ے بنگالی نودربراں چہ پاکستان ءَ وتی ماتی زبان ءَ را پاکستان ءِ ’ راجی زبان ‘ جوڑ کنگ ءِ لوٹ کرتگ ءُ پہ ھمیشی ءَ روانک کش اِت ءُ زھرشانی کرت چوش کہ آ وھد ءَ بنگلہ دیش پاکستان ءِ بھر اَت۔ گڑا چہ ایشاں چار نودربر ھمے زھرشانی ءَ کشگ بوت اَنت۔ گڑا میان استمانی زانتکار ءُ زبانانی سر ءَ کار کنوکیں مردماں 17 اپریل 1999 ءَ پہ ماتی زبانانی پھریزگ ءَ جیڑ اِت کہ پہ ایشی ءَ روچے ایر کنگ بہ بیت داں ھرچ راج اے روچ ءَ وتی زبان ءَ بہ ساڑا ایت ءُ چہ گار ءُ بیگواہ بوگ ءَ بہ پھریز ایت۔سری رند ءَ سال 2000 ءَ چہ یونیسکو ءِ نیمگ ءَ ماتی زبانانی جھانی روچ برجم دارگ بوت ءُ چہ ایشی ءَ پد نو سرجمیں جھان ءَ اے روچ ماتی زبانانی میان استمانی روچ ءِ بستار ءَ دارگ بیت۔
21 اسپنتان ءَ ماتی زبانانی روچ ءِ دارگ ءِ من ءُ مول چی اَنت ؟
گْوش اَنت کہ جھان ءِ چہ چہ شش ھزار ءَ گیش زباناں گپ بوگ ءَ اِنت ۔ چہ ایشاں چل ماں سدی زبان انچیں ھست اَنت کہ آ گار ءُ بیگواہ بوگ ءِ سیمسران اَنت۔ نوکیں زانتکارانی پٹ ءُ پول ءِ ررد ءَ ھمے چل ماں سدی گار ءُ بیگواھی ءِ سیمسراں سریں زبانانی تہ ءَ ھپتگے زبانے سرجمی ءَ گوں وتی گْوستانک ءَ گار ءُ گمسار بیت۔ پہ زبانانی پھریزگ ءُ مگیم دارگ ءَ یونیسکو ءَ ماتی زبانانی میان استمانی روچ ایر کرتگ دانکہ راج وتی زبان ءَ بے ھال مہ کن اَنت ءُ ھرچ سال پہ مڑاھے اے روچ ءَ مراگش برجم بہ دار اَنت ءُ وتی نوک آؤکیں پدریچ ءَ زبانانی بارہ ءَ سرپدی بہ دے اَنت ءُ گْوستانک ءَ زندگ بہ کن اَنت ۔ ھما زبان کہ گار ءُ گُمسار بیت بیست ءُ یک اسپنتان ءَ آ راج ھمے روچ ءَ وتی زبان ءَ پد ءَ زندگ کنگ ءِ بارہ ءَ کوشست کن اَنت ، جیڑ اَنت۔
انچوش کہ ما بلوچ ایں ، مارا وت ءَ چہ یک ءَ گیش شھد ءُ شرکنیں زبان ھست، ھمے زبانانی برورد ءَ ما راجی بستار ءَ زندگ این ءُ مارا اے جھان ءَ جتائیں پجارے ھست۔چوش کہ ما ایر دستیں راجے ءِ باسک ایں، مئے زبان مئے راج ءَ سرکاری وانگجاھاں وانینگ نہ بیت ۔ مارا جھد کنگی اِنت کہ ما وتی زبان ءِ پھریزگ ءَ کار بہ کن این ءُ وتی راج ءَ زبان ءَ بہ وانین این ءُ بلوچی زبان ءِ گْوستانک ءِ بارہ ءَ راج ءَ سرپدی بہ دے ایں۔ زبان ھرچ راج ءِ پجار اِنت ءُ ھرچ راج ءِ گْوستانکی چیز گوں زبان ءَ ھمگرنچ اَنت۔ زبان دوستیں مردم ھرچ وھد راجدوست بہ اَنت، زبان داں ھست بزاں راج ھست ، زبان کہ مہ بیت راج ھم مردار بیت۔ زبان اے نہ اِنت کہ ما ایوک ءَ گپ ءَ ایں ۔ زُبان سرجمیں راجی ءِ گْوستانک ءِ جھگیری کنت۔
