ھمے رنگ ءَ امریکہ اوں میاربار کنگ بوت کہ آئی ءَ ویتنام ءِ زندانی، ویتنام ءِ سیاسی مھلوک گپتگ ءُ برتگ اَنت۔ ٹارچرسیل ءَ بند کنگ ءَ ھوار گوں آیاں ناراھی کرتگ، اے ناراھیں کرد ءُ کار میان استمانی راھبندانی بگیر اَنت۔
سیمی گپ یا سیمی بھتام کہ امریکہ ءِ سر ءَ جنگ بوتگ اَت آ ایش اَت کہ امریکہ ءِ شھرمنند وتی زورانسری ءُ ناراھیں کارپدانی آماچ کرتگ اَنت۔ چارمی بھتام ھمے جتگ اَت کہ اے ٹریبونل ءِ تہ ءَ چیراندری امریکہ ءِ زانتکار ھم گون بوتگ اَنت۔ ھوریں رنگ ءَ گڈی پیسلہ ٹریبونل ءَ ھمے کرتگ کہ امریکہ ءِ ناشرکاری ءَ ویتنام ءِ الس، ویتنام ءِ مھلوک ءِ چکچینی کرتگ۔
اگاں مروچیگیں بنگپ ءِ رد ءَ ما بہ چار اِیں گڑا پاکستان ءِ ناشرکاری، ریاست ءِ دھشت ءُ در انسانی کارپد بلوچستان ءِ تہ ءَ ھمے رنگ ءَ اِنت، باید اِنت میان استمانی ڈیھاں بلوچستان ءِ تہ ءَ پاکستان ءِ جنگی میارباریانی بارو ءَ ٹریبونلے جوڑ کرتیں، ھیر!
سوال ایش اِنت چو چی ءَ بوگ ءَ نہ اِنت۔ اِیشی ءِ پسو ءَ من اے رنگ ءَ دے آں کہ ھما زمانگ ءَ رسل ءَ سارتر ءِ پیمیں مردم دوستیں کواس اے سرڈگار ءِ تہ ءَ بوتگ۔ آ زمانگ دومی جھانی جنگ ءِ زمانگ بوتگ یک Balance globe بوتگ ءُ آ balance globe ءِ تہ ءَ مردم دوستی روایت لیکھی ھساب ءَ ساڑی بوتگ، بلے مروچی ما اے دور ءَ post world war گْوش اِیں اے post world war انچوش کہ یک unipolar globe یا یک unipolar world کہ آئی ءِ تہ ءَ گلوبے balance پشت نہ کپتگ۔ unipolar world ءِ مانا ایش اِنت کہ یک انچیں سامراجی دورے کہ آ سامراج نوکیں نوک آبادی یا نوکیں imperialism یا تو گْوشت کن ئے کہ نوکیں زوراک ءَ مروچی جھان وتی ایردست کرتگ۔ مروچیگیں جھان لیکھی جھانے نہ اِنت، مروچیگیں جھان واپاری جھانے۔ مروچیگیں جھان ءِ لوٹ ءُ واھگ دگہ راجانی مڈیانی شوھاز کنگ، پلگ ءُ ایردست کنگ اِنت۔
اے گپانی کنگ ءِ مستریں من ءُ مول ایش اِنت کہ زانتکاریں مھلوک کہ ھستآ گوں لبزانک ءَ بندوک اِنت۔ انچوش کہ سارتر ءُ برٹرینڈرسل اے ھم گوں لبزانک ءَ بندوکیں مردم بوتگ اَنت آیاں کجام ھساب ءَ کار کرتگ، زوراکی ءِ بگیر ءَ توار چست کرتگ۔ باید ھمیش اِنت کہ آیاں گوں لبزانک ءَ دلگوش بہ داتین ءُ آیاں راجکاری ءُ آشوبی جیڑھانی سر ءَ گپ مہ کرتیں، بلے چوش نہ اِنت۔ مئے چاگرد ءَ مروچی کہ نبشتہ کار ترس ءِ آماچ اَنت آ پہ ھمے ترس ءِ چیر دیگ ءَ لبزانک ءَ چہ آشوب ءَ جتائیں چیزے سرپد بوگ ءَ اَنت۔
اگاں ما میان استمانی لبزانک ءَ بہ چار ایں گڑا مارا چوشیں بازیں نبشتہ کار دست کپ اِیت کہ آیاں جنگی جاورانی تہ ءَ چون وتی مارشتانی درانگازی کرتگ۔ پہ درور ایڈور سئید ھما نبشتہ کار اِنت کہ امریکہ ءِ تہ ءَ جاھمننداَت، بلے امریکہ ءِ زوراکی ءِ بگیر ءُ پہ ایردستیں راجاں نبشتہ کرتگ ئِے۔
دومی نیمگ ءَ گسان کنپانی (غسّاق کنفانی) ءِ وڑیں نبشتہ کار کہ آئی ءَ پہ پلستین ءِ راجی جز ءَ ھم نبشتہ کرتگ ، پہ وتی زبان ءُ لبزانک ءَ ھم، باید و ھمیش اِنت بہ کول ء مئے نبشتہ کارانی ءَ آئی ءَ لبزانک ءِ نیمگ ءَ دلگوش بہ داتیں کہ آ شوکیں گدار نبیسے اَت۔
بلے! آ وتی گلگداراں ھمے گپ ءَ کنت کہ من جنگ پمیشکا کن آں کہ منی آیوکیں پدریچ آسودگ بہ بیت، اے پانگس (چیک پوسٹ) ءُ دگانی سر ءَ ما دارگ ءُ کم شرپ کنگ بہ اِیں، مئے آیوکیں پدریچ چر اے سلیں نوبت ءَ بہ رک اِیت۔
