گنوکو | آشا

گنوکو جان تو زان ئے؟ ، دوشی کہ من نیم واب اَت آں گڑا منی ھیال یکدم گوں ترا شت ءُ تئی لھتے گپ ءُ تران من ءَ یات اتک من کمو دگہ وڑ بوت آں، گڑا من چم بند کرت اَنت کہ واب بہ کپ آں ، بلے تو ھما اِنت کہ رپتگ ئے من سک کم واب کپتگ آں۔ ھر وھد ءَ کہ ھیال گوں ترا بوتگ گُڑا من ءَ گیش واب نے اتکگ ءُ دانکہ  شپانی نیم ءَ من آگاہ بوتگ آں۔

ھمے کہ من چم بند کرتگ اَنت، تئی کلوہ اتک ءُ تو گْوشت ’’ ھال کن ترا چون اِنت کہ تو وتارا مروچاں چٹ گنوک ءُ ریٹا کرتگ؟ وارک وتی ھالاں کن!‘‘

من کلوہ ءِ پسو دات ’’من وش آں پل، تو ھالاں کن ترا چی اِنت کہ مروچاں چو ھاموش ئے؟ تو و بھ چو ھاموش نہ بوتگ ئے ، مروچاں زاناں تو چہ مارا بے ھال ئے؟ بلے نوں من گوں تو زھر آں۔‘‘

گنوکو جان ءِ پسو ’’ اللہ ترا وش بہ کنت منی وارک ھاھاھاھاھا، تو چونیں ھبر کن ئے، من ءُ ھاموشی چو و بوت نہ کنت۔ تو و زان ئے کہ من ھاموش بوت نہ کن آں ھاھاھا، بلے گوں من زھر مہ بہ ئے۔ تو زان ئے کہ من ءَ بے تو ھچ وش نہ بیت، تو کہ چوشیں گپے ءَ دلرنج بہ ئے گڑا من الم کھت بہ آں، پرچا کہ تو و زھری مردمے نہ بوتگ ئے، بلے تو کہ زھر بہ بہ ئے گڑا من چوں ھاموش نہ بہ آں ؟‘‘

من گنوکو جان پسو دات ءُ گْوشت ’’ اناں تو نوں من ءَ رد مہ دئے، گوں تو و گونڈو رد نہ کپ اَنت تو من ءَ چوں رد دئے ھاھاھاھا۔ بس نوں جوان بہ ئے، اگاں تو پیسری وڑ ءَ بہ ئے گڑا من ءَ ھچ وش نہ بیت ۔اگاں من گوں تو زھر نہ بہ آں گڑا تو گوں من ءَ ایوک ءَ گپ کن۔‘‘

گنوکو جان ءَ پہ کندگ پسو دات ’’ ھاھاھاھا، ھو! من و گپ کن آں، اگاں گپ مہ کن آں تو منی جند ءَ کش ئے، تو انچیں زالمے یے ھاھاھاھا۔‘‘

من ھم پہ کندگ پسو دات ’’ ھاھاھاھا، تو پہ راستی من ءَ سکیں زالمے ءِ دروشم ءَ گِند ئے ؟ ‘‘

  گنوکو جان ’’ ھاھاھاھاھا، نہ اڑے تو زالمے نہ ئے، من بس مسکرا کرت پہ تئی کندینگ ءَ ، بلے منی گپ ءَ جوان گوش دار ءُ وتار ءَ ٹیٹ کن۔ مہ گریو، اگاں گریوئے بہ گریو، بلے وتارا پریشان ھچ مہ کن کہ گنوکو چہ ترا دور شتگ۔ من چہ ترا دور نہ شتگ آں، ناں کہ رو آں، من گون تو مدام ھوار بوتگ آن ءُ انگت ھم گون تو ھوار آں، ایوک وت ءَ ٹیٹ کن۔ پرچا کہ من ھمے لوٹ اِتگ اَت کہ تو چہ من ءَ پد ٹیٹ بہ بہ ئے ءُ من ءَ گوں تو ھمے امیت اِنت کہ تو ٹیٹ بہ ئے۔

بلے وتی ھیالداری ءَ بہ کن شر، من نوں جزاں کہ من ءَ دور روگی اِنت۔ من پہ تو جل اتِگ آں کہ ترا رکست کن آن ءُ نوں بہ رو آں، چی ءَ کہ من زانتگ ترا منی یات سک پیداک اَنت۔ شر گڑا! من رو آں کہ سنگت منی ودار ءَ نشتگ اَنت، نوں دوبر منی آھگ نہ بیت، بس ترا ھمے گْوش آں کہ وت ءَ ٹیٹ بہ کن ءُ کدی ھم پریشان مہ بہ ئے۔
شر شنکوں! من نوں جز آں ، ھوار اِیں “۔

من ترا پہ مھر پسو دات ءُ گْوشت ’’ شر پل! انشااللہ من نوں ٹیٹ بہ آں، ھوار اِیں۔‘‘ ءُ ھمے پیم تو من ءَ رکست کت ءُ شُت ئے، بلے من ترا گْوشگ لوٹ آں کہ من ھچ پیم ءَ ٹیٹ بوت کنگ ءَ نہ آں۔ من نوں چٹ تہ پروش آں، من سک ابیتک آں، پمیشکا مروچی تئی لاڑکویں گْوھار ءَ پہ ترا وتی ھیال ءُ مارشت نبشتہ کرتگ اَنت۔