پاکستان ءِ گچینکاری ءُ بلوچ راجی جیڑہ | اکبال

1948 ءَ بہ گر داں 2024 ءَ زورگریں پاکستان ءِ گچینکاری بوتگ اَنت، بلے ھر وھد ءَ پاکستان سوبمند نہ بوتگ۔ مروچی پاکستان وتی سوبمندی ءِ جار ءَ جنگ ءَ اِنت کہ من سوبین بوتگ آں ،چوش کہ من اے گچینکاری ءَ کہ گند آں تہ ھمے مار آں کہ زورگر مدام بے سوب بوتگ ءُ وتی پوجی واک ئِے کار گپتگ ءُ انگت ھمے ھنر ءُ ھیلہ ئِے برجاہ اِنت۔

چہ اے نامگپت ءُ وتگڑیں گچینکاریاں پد مارا ھمے کتہ کاری بوتگ کہ ھر گچینکاری ءَ پد پاکستان ءَ بلوچ راج ءِ سر ءَ وتی لشکر کشی بندات کرتگ ءُ وتی واک چکاس اِتگ۔ اے راستے کہ پاکستان ءَ بلوچ راج گوں وتی لشکرک شیاں تاوان داتگ ، بلے من سرپد بہ آں کہ اے نکس ءُ تاوانانی تہ ءَ مزنین دستے دری ڈیھانی الم ھست اِنت۔

چہ دری ڈیھانی نیمگ ءَ پاکستان ءَ رس اتگیں مالی ءُ لشکری کمک پہ بلوچ چکچینی ءَ کارمرز بوتگ اَنت ، بلے اے درگت ءَ دنیگت دری مھلوک ءُ ڈیھاں یک روچے ھم پاکستان ءَ را اے جست نہ کرتگ کہ تو اے کمک کجام جاہ ءَ ھرچ ءُ کارمرز کرتگ اَنت۔ ھمے رنگ ءَ دری ڈیھانی ھواری ءَ ھندی ءُ میان استمانی مردمی اگبالانی زمہ واری چی اَنت ؟ ، بلوچ راج ءِ سر ءَ پاکستان ءِ لشکرکشی، زلم ءُ زوراکی ءِ سر ءَ پرچا بے توار اَنت؟

میاں استمانی مردمی اگبالانی پانک جنوکانی اے دراجیں بے تواری ءَ پاکستان ءُ آئی ءِ زالمیں لشکر گیش توانمند بوگ ءَ اِنت ءُ بلوچ راج ءِ سر ءَ گیش ءَ گیش وتی زوراکی ئِے برجم داشتگ ءُ برجاہ اِنت ۔ اے زلم ءُ زوراکی ءِ تہ ءَ بلوچ پرزندانی ژانگولیں جونانی ھواری ءَ گار ءُ بیگواھیں بلوچ پسگانی مات ءُ گوھارانی سر ءَ لٹ ءُ کٹ ھم ھوار اِنت۔

ھمے رنگ ءَ داں کد پاکستانی لشکر ءِ اے زوراکی برجم بیت اے جتائیں ھبرے ، بلے چہ ھندی ءُ میان استمانی مردمی اگبالانی بے تواری ءَ چہ اے زوراکی ءِ دْرچ الم گیش بیت بلے کم نہ بیت۔

اے زلم ءُ زوراکی ءِ تہ ءَ مردمی اگبالانی جیڑہ روچ پہ روچ گیش ودان ءُ مزنے جیڑھے جوڑ بیان اِنت ، پمیشکا ھندی ءُ میان استمانی مردمی اگبالانی پاسدار پاکستانی لشکر ءِ زلم ءُ زوراکیانی بگیر ءَ توار چست بہ کن اَنت دانکہ جھان ءِ ملک ءُ تاکت پاکستان ءِ زوراکیانی بگیر ءَ ھر مجلس ءُ دیواناں گپ ءُ تران بہ کن اَنت کہ انسانی راھبندانی چپ اَنت۔

ھمے رنگ ءَ جھان ءِ ھواری ءَ بلوچ راج ھما مھلوک ءَ جست بہ کنت کہ گْوستگیں ھپتاد ءُ ھپت سال اِنت کہ پاکستان ءِ بے باوریں پارلیمنٹ ءِ بھر ءُ بلوچ راج ءِ چکچینی ءَ پاکستان ءِ ھمدست ءُ ھمگام اَنت۔ پہ بلوج راج ءِ دائمی گلام دارگ ءُ گلامی ءِ چیلک ءِ مھکم کنگ ءَ سکا بے چاڑ اَنت۔

چہ ڈگار ءِ زور گرگ ءَ پد بلوچ راج ءِ تاسپیں پسگانی ژانگولیں جون ماں ڈیھ ءِ ھمک کڈ ءُ کور، دشت ءُ کوچگاں دست کپگ ءَ اَنت، بلے ایشانی گُوشاں مورے نہ وارت کہ ما وت ءَ پہ نام بلوچ ءُ راجدوست گْوش اِیں۔

بلے! پہ بلوچ راج اے نوکیں گپے نہ اِنت ، پرچا کہ مدام ڈاکٹر مالک ، اکتر مینگل ءُ ایدگہ پارلیمنٹ ءِ منوگرانی جاک ءُ کوکار، رپک ءُ دورگیں پندل سازگ ایشانی شیتانی آدت اِنت، بلے نوں بلوچ راج جوانی ءَ ایشانی دورگیں رپک ءُ پندلاں آشنا اِنت۔

ھو! من یک گپے پہ ستک گْوش آں کہ ڈاکٹر مالک ءُ اکتر مینگل ءَ ھر وھد ءَ پیپلزپارٹی ءُ مسلم لیگ نون، اسلام آباد ءِ ھاکم پہ وتی سیھک ، چنڈ ءُ دپار ءِ ھاتر ءَ مدام وش کرتگ اَنت ءُ بلوچ سرڈگار ءِ سودا جتگ۔

ھمے سودا ءِ رپک ءُ ھنراں تاں روچ ء مروچی کنگ ءَ اَنت۔ نوں اے بلوچ راج ءِ زمہ واری اِنت کہ وتی آیوکیں پدریچ ءَ چہ اے سوداگراں چون ءُ چہ پیم رکین اِیت۔

اے گپ راستے کہ اگاں تو وتی گلزمین ءَ اچ زورگر ءَ رکینگ لوٹ ئے گڑا گوں وتی راجی جھد کار ءُ آجوئی ءِ جنگولاں ھم کوپگ بہ بہ ئے ءُ چہ دژمن ءَ آجو بہ کن۔ ھمے واجکار کہ پہ کسانیں سرکاری اگدھے ءَ سکا بے چاڑ اَنت، بلے دومی نیمگ ءَ بلوچ راج ءِ چکچینی بوگ ءَ اِنت۔۔۔۔گنگ ءُ کر اَنت۔

اگاں مروچی شما ماں گچینکاری ءَ دزمانجی ءِ بگیر ءَ شھید پدا چار راہ ءَ بہ گر تاں بلوچستان ءِ کنڈ، کنڈ ءَ جھان سر ءَ زرتگ کہ اے گچنکاری ءَ مارا انساپ نہ رس اتگ ءُ گوں مئے سوبین بوتگیں باسکاں ناانساپی بوگ ءَ اِنت۔

ھو! تو مروچی سما کرتگ کہ گوں من ناانساپی بوگ ءَ اِنت ، مئے ووٹ دزگ بوتگ اَنت، بلے واجہ دو ماہ ءَ پیش ھمے شھید پدا چارراہ کیچ ءَ شھید بالاچ ءِ کھول گوں شھید بالاچ ءِ تیر سپتگیں جون ءَ انساپ لوٹگ ءَ اَت ، شما کج ءَ اَت ئے؟

ھمے چارراہ ءَ شھید بالاچ ءِ کھول ءِ ھمرائی ءَ ڈاکٹر سبیہ ، ڈاکٹر شلی ، ڈاکٹر مھرنگ ءُ سمی دین ءِ سروکی ءَ یک روانکے چہ کیچ ءَ بندات بوت بلوچستان ءِ کنڈ، کنڈ ءَ آگاھی دیان داں اسلام آباد ءَ سر بوت ، بلے شما گوں وتی گچینکاری ءِ کمپئن، دیوان ءُ مجلساں دزگٹ اَت ئے ءُ نہ زانت کہ مئے مھلوک چو وار ءُ بزگ اِنت۔

گْوستگیں روچ ءَ وھدے من نادر کدوس ءِ گوشتانک گوش داشت ، سک بژن بوت۔ واجہ وتی گوشتانک ءِ تہ ءَ گْوشگ ءَ اَت کہ ” مارا دو چیز ءَ سک لگور ءُ پشل کتگ۔ یکے کتاب ءُ دومی بی پی ءِ گولیاں ” ھاھاھاھا۔

نادر کدوس جان! کتاب کدی زندگیں مردم ءَ لگور ءُ پشل نہ کنت، بلکیں دلیر ءُ زانتکار کنت ءُ سرپدی بکش اِیت۔تو کتاب ءَ بھتام مہ جن، وتی راج دژمنی ءَ اچ وتی جند ءَ سوج بہ گر اگاں بدن ءَ زردے ءِ واھند ئے۔ زورگر شمئے کلیں رپک ءُ ھنراں سرپد اِنت کہ بلوچ راج ءِ گور ءَ شمئے ارزشت چی اِنت، پمیشکا شمارا مدام چوش ٹشو ءِ کاگد ءَ کارمرز کنت ءُ بوچانی ڈب ءَ چگل دنت، ءُ پہ راستی شمئے بسات ھمیش اِنت۔

ھمے رنگ ءَ شمئے وتگڑیں راجدوستی ءَ بلوچ راج جوانی ءَ سوگہ ءُ سرپد اِنت کہ ابید ء پارلیمنٹ ءِ بکملیں کرشی ءُ سارت ءُ گواتگریں ماڑی ءَ شمارا گوں بلوچ راج ءُ بلوچ سرڈگار ءَ ھچ رنگیں لوٹ ءُ گزر نیست۔ چوش کہ اے گچینکاری پہ بلوچ راج ءَ نوکیں ھبرے نہ اِنت ، چوشیں گچینکاری بلوچ راج ءَ باز دیستگ۔ ھمے گچینکاری 2013 ءَ بلوچ راج ءَ رد کرتگ ءُ ریاستی ووٹ بینک یک درسد نہ بوتگ۔

ھمے پیم ءَ 2024 ءِ گچینکاری چہ بلوچ راج ءِ نیمگ ءَ پہ پاکستان ءُ آئی پارلیمنٹ ءِ اگدہ داراں چہ چکاسے ءَ کم نہ اِنت، پرچا کہ جھان مروچی پاکستان ءِ نام گپتیں گچینکاری ءِ سر ءَ ھیران ءُ پریشان اِنت۔ چی ءَ کہ بلوچ راج ءَ سابت کرت کہ مئے گوں پاکستان ءَ ھچ رنگیں سیادی یے نیست، بلکیں پاکستان یک زورگرے ءُ بلوچ سرڈگار گوں لشکری زور ءُ واک ءَ گپتگ۔
دومی بلوچ راج ءِ راجی آجوئی ءِ جھد ءَ اے گپ پدر کرتگ کہ بلوچ ھچ رنگ ءَ گوں پاکستان ءَ ھور بوگ ءَ ساجو نہ اِنت۔

بلے! پہ شما یک راھے پش کپتگ اگاں شما وتی چل ءُ پولنگاں شودگ لوٹ اِت، آ راجی آجوئی ءِ جھد اِنت۔ اگاں نا بلوچ راجدپتر شمارا ھما نام ءَ توار ءُ نبشتگ کنت کہ مروچی ملا ھسن ءُ ایدگہ، پمیشکا من گْوش آں کہ سما کن اِت داں باند ءَ دیر مہ بیت۔