لھتے وانندھیں بلوچ چہ من ءَ جُست کن اَنت کہ ’’ تو بلوچی دربُرتگ؟ ‘‘ گُڑا من گْوش آں کہ یکے ایشی ءِ جواب تچک اِنت۔ گِند ئے بلوچی مئے وتی جند ءِ راجی ءُ ماتی زبان اِنت۔وتی ماتی ءُ راجی زبان ءِ وانگ ءُ زانگ سک آسان اِنت۔ پہ بلوچی وانگ ءُ دربرگ ءِ جُھد ءَ من چہ درستاں پیسر ھمئے توکل کرت ءُ دل بست کہ من راجی زبان ءِ سرمچارے آں پمیشکا باید اِنت مروچیگیں انٹرنیٹ ءِ زمانگ ءَ پہ وتی راجی زبان ءِ وانگ ءُ دربرگ ءَ من اول دل پروش مہ بَہ آن ءُ ناں کہ اشتاپ بہ کن آں بلکیں یک راجی سرمچارے ءِ وڑ ءَ وتی جُھد ءَ مھکم ءُ برجاہ بہ دار آں۔بہ ھل اِت کہ من ءَ پہ وتی راجی زبان ءِ وانگ ءُ دربرگ ءَ ھپتگے بہ گْوز ایت۔ من وتی موبائل ءِ تہ ءَ بلوچی کیبورڈ ءُ سیدگنج ڈکشنری ایرگیج ءُ ساز اِت۔
گُڑا ھمے وڑ ءَ من اول بلوچی دربری ءِ سےئیں درونت(سبق) ونت اَنت ءُ پد ءَ ھمے بلوچی درونت دو رند ءَ دلگوش ھم کرت اَنت پرچا کہ وانگ ءُ زانگ ءَ مارا اول دَرونت وانگ ءُ دلگوش کنگی اَنت۔چی ءَ کہ ھر وڑیں سرپدی یے چہ وانگ ءَ رس ایت۔ چہ ایشی ءَ پد تاں سے روچ ءَ زبان دوستی ءُ راجدوستی ءِ سر ءَ نبشتانکانی وانگ ءَ گلائیش بوت آں۔ بلوچی وانگ ءِ وھد ءَ من ءَ سرپدی رس اِت کہ زبان ءُ زبان دوستی ءِ ارزشت چی اِنت؟ وانگ چی ءَ گْوش اَنت؟ نبشتہ چی یے ءُ لبزانک ءِ مانا چی اِنت؟
گِند ئے ما بلوچ ایں، بلوچی وَ مئے وتی جِند ءِ زبان اِنت پمیشکا ما دْراہ بلوچی ونت کن ایں، سرپد ھم بہ ایں۔ گڑا باید اِنت ما مدام بلوچی درونتاں بہ وان این ءُ وتی راجی زبان ءِ دربرگ ءِ جھد بہ کن ایں۔ اگاں کسے بلوچی وانگ ءَ نزور اِنت، بزانکہ درونتاں سرپد نہ بیت گڑا چہ سوشل میڈیا ءَ بلوچی دربرگی تامراں بہ چار ایت ءُ تامرانی تہ ءَ ھم شریں وڑے ءَ سرپدی رس ایت۔ مروچی مئے راج ءِ بازیں بلوچ بْرات ءُ گْوھاراں پہ راجی زبان ءِ دیمروی ءَ بلوچی وٹس ایپی ءُ پیسبوکی وانگجاہ اڈ کرت ءُ راج ءِ نودربراں وانینگ ءَ اَنت کہ زوت بلوچی وانگ ءُ نبیسگ راج ءِ تہ ءَ البار بہ بیت۔ گڑا ھورت بہ چار ئے۔اے جُھد ءَ ھر زبان دوست ءُ راجدوستیں مھلوک ءَ باسکی زورگی اِنت، مارا گوں ھمے زبان دوستیں جھدکاراں ھمراھداری کنگ لوٹ ایت پرچا کہ بلوچی وت وانگ ءُ راج ءِ وانینگ مئے تیوگیں راج ءِ زمہ واری اِنت۔
ما گوں شما دزبندی کن ایں کہ شما اشتاپ مہ بہ اِت بلکیں پیش ءَ بلوچی دَرونت ءُ نبشتانکاں وانان ءَ دلگوش بہ کن اِت کہ شما اول بلوچی سْیاھگ ءُ نبشتہ راھبند ءَ سرپد بہ بہ اِت ءُ پد ءَ کم کم ءَ نبیسگ ءَ ھیل بہ کن اِت۔ وھدے کہ شما نبشتہ کن اِت گڑا وتی ھر نبشتگیں گالرداں وت ھم چمشانکے بہ دے اِت بزانکہ دوبر وت وانان ءَ وتی ردیاں وت ھم راست کنگ ءِ جھد بہ کن اِت پرچا کہ چہ ردیانی راست کنگ ءَ مئے بلوچی ونتگیں دَرونت ھم تازگ بہ اَنت۔
اگاں ما وتی دزھورکی ءَ بلوچی بِہ وانین ایں گڑا بزانکہ ما وت دربرگ ءَ ایں، بہ ھل اِت کہ ما ردی بہ کن ایں۔ اگاں ما ردی کنگ ءَ ایں گڑا ایشی ءِ متلب ایش اِنت کہ ما جھد کنگ ءَ ایں پرچا کہ ردی وَ کار کنوکیں مردم کن اَنت۔تھنا جھدکاریں مردم ءِ دست ءَ ردی بیت ھما کہ ھچ کار نہ کن اَنت ءُ بے کاری ءَ وتی وھد ءَ زوال کن اَنت گڑا آیانی دست ردی وَ نہ بیت پمیشکا باید اِنت ما ھر کس پیسر بلوچی درونتاں وت بہ وان این ءُ پد ءَ وتی ھمک دربرتگیں درونت ءَ راج ءَ ھم بہ وانین ایں۔
ما چہ رَدیاں مہ ترس ایں بلکیں چہ ردیاں در بہ بر ایں۔ اگاں شما مروچی بلوچی زبان ءِ نودربر اِت گڑا باندات ءِ استاد ھم بَہ اِت، بزانکہ دلپروش وَ اناں بلکیں مارا بلوچی زبان ءِ سرمچار بوگ لوٹ ایت، بلوچی وانینگ لوٹ ایت۔ اگاں ما دْراہ ھمے داب ءَ جزان بہ ایں گڑا ما زیت وتی راجی زبان ءِ نبشتہ ءَ دربر این ءُ راجی زبان ءِ بلائیں نبشتہ کار ءُ شائر جوڑ بہ ایں۔ بزانکہ ھچ بر بے چمشانک ءَ وتی نبشتگیں نبشتانک ءُ کلوھاں روان مہ دے اِت۔ پیسر وتی نبشتگیں چیزاں دوبر وت بہ چار اِت ءُ راست کنگ ءِ جھد بہ کن اِت وھدیکہ ما ھر کس ءَ ھمے دل بستگ کہ من بلوچی وانین آں گڑا ما وتی راجی زبان ءِ جھد ءَ سوبین بہ ایں۔ پہ راجی زبان ءِ دیمروی ءَ مارا وت ماں وت ھم کوپگ ءُ ھمراھدار بوگ لوٹ ایت۔
بلوچ راج ءِ ورنائیں وانندگ شالا زبان دوست ءُ راجدوست بہ بات اَنت ءُ بلوچی شالا دیمروی بہ کنات، شالا انچوش بات۔
