گچینکاری ءِ ھال اتک ، گوں ھمے ھال ءَ وابیں چاگرد ءَ چہ واب ءَ بست کرت ءُ چہ درستاں پیسر ساڑی بوت۔
’’ ماں گچینکاریاں ما ووٹ دے این ءُ مارا وزیر گزیر پنڈ گر اَنت دے اَنت۔‘‘
دگہ باریگاں چہ واب ءَ بست نہ کنت بلے وھدے کہ زر ، مال ءُ مڈی ءِ گپ بیت گڑا منی وابیں چاگرد چہ درساں پیسر اِنت۔
منی وابیں چاگرد ءِ درسیں مردم ھمے داب ءَ اَنت ، مزن داں کساں درست ھمے آس ءَ ستکگ اَنت۔ آ اود ءَ کہ بلوچ ءِ چکچینی بوگ ءَ اِنت، بلوچ اوبادگ آزار دیگ بیگ ءَ اَنت ، آ اود ءَ منی وابیں چاگرد ءِ دپ ءَ للک ماں نہ اِنت کہ بہ روت ھم توار بہ بیت ءُ بلوچ ءِ گپ ءَ بہ کنت۔
اسلام آباد ءَ وھدے بلوچ گوھارانی لٹ ءُ کٹ کنگ بوت اَنت منی چاگرد ءِ مردمانی گوش ءَ مورے ءَ نہ وارت۔مات ءُ گوھار زندانی برگ بوت اَنت، آیانی سریگ پچ گرگ بوگ ءَ اَنت بلے مئے چاگرد ءِ مردماں وتئی ایمان گوں زر ءَ بست۔
وھدے کہ براتے ءَ ووٹ ءِ بگیر ءَ دو گپ جت کہ ووٹ مہ بیت گڑا مئے چاگرد ءِ مردم ھمائی ءَ وتی دژمن سرپد بوت اَنت۔ آ بد ءُ رد اش کرت۔ مئے وابیں چاگرد ءِ تہ ءَ انگت اے زانت ءُ زانگ ودی نہ بوتگ کہ وتی دژمن ءَ پجا بہ یار ایت کہ کے اِنت منی دژمن ؟ یا کہ زانگ ءَ زان اَنت پاد پر دے اَنت۔
ووٹ لالچے کہ بلوچ راج ءَ را دیگ بوگ ءَ اِنت۔مئے چاگرد ءِ مردم ھمے سرپد بہ اَنت کہ ما ووٹ دے ایں ، مارا روزگار رس ایت بلے اے نہ جیڑ اَنت کہ چہ مئے سرزمین ءَ ھرچیز ودی بوگ ءَ اِنت۔درست زورگریں دژمن ءَ وتی کرتگ اَنت۔ بلوچ وتی ھمیشانی پد ءَ بہ جنت۔
بلے مئے چاگرد ءَ کے سرپد بہ کنت !
تو وت واجھیں راجے بیتگ ئے ترا زیردست جوڑ کنگ بوتگ ، وتی وت واجھی ءَ بہ زان۔سرپد بہ بہ ئے ءُ گوں بلوچ ءَ ھم توار بہ بہ ئے۔ وتی اگبالانی بارہ ءَ گپ بہ کن۔
بلے ناں ، چاگرد ءِ مردم انگت رو اَنت پاکستان ءِ وتگڑیں وزیراں ووٹ دے اَنت۔ ھمایانی منتوار بہ اَنت کہ مارا نوکری بہ دے اِت۔ تو چہ کرناں ھمے سرڈگار ءَ نشتگ ئے ترا شد ءَ نہ کشتگ۔تئی پیریں کماشاں جنتر ءِ سر ءَ دان درشتگ، دو وھد ءِ نان وارتگ۔
تو اگاں انگت وت ءَ را بہ دار ئے ، ووٹ مہ دے ئے ترا شد نہ کش ایت بلکیں تئی ووٹ نہ دیگ ءَ دژمن نزور بیت۔گچینکاری بلائیں پندلے کہ پہ بلوچ ءَ سازگ بوتگ داں بلوچ ءِ تہ ءَ ناتپاکی ودی بہ بیت۔
چوناھیا مئے چاگرد ءِ مردم تپاک اَنت یکے دومی ءِ مرگ ءُ زند ءَ گون اَنت ھمے کہ ووٹ ءِ وھد بیت ھریکے دگہ دگہ پارٹی یے گچین کنت ھما کہ سوبین بیت ءُ آدگہ ناسوب بیت گرا مئے تہ ءَ گوں یک دومی ءَ ناتپاکی ءُ زھری پیداک بیت یکے دومی ءِ لوگ ءِ دپ ءَ نہ رو ایں۔دژمن اے گپ ءَ سوب کنت۔
اگاں ما بہ چار ایں بلوچ ءَ وتی واک چست کرتگ ءُ پاکستان ءِ وتگڑیں وزیرانی دستاں داتگ داں کہ بلوچ پہ نوکری ءُ روزگار ءَ ووٹ بہ دنت۔
باریں کدی مئے وابیں چاگرد دژمن ءِ دورگیں پندلاں سرپد بیت ءُ دژمنءَنزور کنت۔ وت ءَ بلوچءِ جھد ءِ بھرے سر پد بیت ءُ وت ءَ را بلوچے۔
کدی منی وابیں چاگرد سما کنت کہ ما چیردست ایں مارا پہ وت ءَ دیمونی دیگ لوٹ ایت۔ دژمن چہ من ءُ تئی ووٹانی دیگ ءَ مھکم بیت۔دژمن مھکم کنگی نہ اِنت ، پروش دیگی اِنت ۔
من واھگ اِنت کہ منی وابیں چاگرد ءَ را زانت ءُ سرپدی بہ بیت ءُ وتی سیت ءُ تاواناں بہ زانت۔
