دورت منی مکھیں مات!
من ھمے امیت کن آں کہ چہ من ءَ پد تو بلکیں کمو بژنیگ ءُ مونجاں بہ بہ ئے. بلے چہ اے بژن ءُ مونجانی ءَ گیش من جزم آں کہ تو وش ءُ شادان ئے پرچا کہ چہ من ءَ پد ھر دیوان ءُ بازار ءَ تئی کہ سر کپ ایت، تئ سر چو جَنزات ءُ سگار ءَ (جَنزات، کرکی ءُ سنگاباد ءِ زرباری نیمگ ءَ کوھے کہ سک ءَ برز ءُ نامدار اِنت، سگار، تجابان ءِ گوریچانی نیمگ ءَ کوھے کہ آ ھم برز اِنت) برز بیت۔
منی مکھیں مات، من دل ءَ جزم آں کہ یک چیزے ترا سک ءَ کھت اِنت۔ بلے منی مکھیں مات پہ منی اے چیز ءَ تو ھچ کھتیگ ءُ بژنیگ مہ بہ ئے، بلکیں ھمے سر پد بہ بہ ئے کہ تئی اے واھشت من سرجم کرتگ، تئی ھب ءُ واھشت منی سالونکی بوتگ۔ منی ھم ھب ءُ واھشت ھمے بوتگ۔ تئی واھشت ھمے بوتگ کہ منی بچ پہ من سالونک بہ بیت ءُ پہ من لاڑوک ءُ بےدروریں نشارے بہ یار ایت، بلے منی ھب ءُ واھشت ھمے بوتگ کہ من پہ سرجمیں بلوچ ءُ بلوچستان ءَ سالونک بہ بہ آن ءُ پہ وتی آیوکیں پدریچ ءُ پشتپداں آسودگی یے بیار آں۔
منی مکھیں مات ، من تئی ءُ وتی دوئینانی واھشت سرجم کرت اَنت۔ من سالونک بوت آں بلے پہ تو نشارے نے آورت بلکیں پہ باندات ءِ آسودگی ءَ سالونک بوت آں۔
منی مکھیں مات من ءَ پھل کن کہ من چہ وتی سالونکی ءَ پیش ترا نہ گْوشت کہ من سالونک بہ آں۔ یکے منی گل ءِ راھبند انچوش اَت آن ءُ دومی پد ءَ جاور ھم انچوش اَت آں کہ من ترا ھال دات نہ کرت۔
منی مکھیں مات اگاں من ترا ھال دات کرتیں من ترا ھمے گْوشتگ اَت کہ من آ نیمگ ءَ جَنگ ءَ بنا کن آں تو اد ءَ ءَ وتی نازینک ءُ ناچاں بنا کن۔ تو ھمے سرپد بہ بہ ئے کہ اے تیر ءُ گولہ کہ توار ءَ اَنت اے منی سور ءِ چوک ءُ چاپ اَنت ءُ اے ھون کہ زمین ءِ دلبند ءَ ریچ اَنت اے منی دست ءُ پادانی ھنی اَنت۔
منی مکھیں مات! چہ من پد تو ھچ پریشان ءُ گمیگ مہ بہ ئے بلکیں گل ءُ شاد بہ بہ ئے ءُ منی ھمراہ ءُ ھمکاراں دوست بہ دار۔چوش منی وڑ ءَ آ ھم تئی چک اَنت۔ انچوش کہ تو من ءَ دوست داشتگ انچوش آیاں ھم دوست بہ دار۔
تئی ، بلال
