کماش ابدمان بوت | سلیم بکتیار

زندگی سپرے ءُ اے سپر ءَ مردم گوں ھزاراں رنگ ءُ دْروشماں دوچار کپ اِیت ءُ دیم ءَ جزان کنت۔ زندمان ءِ اے سپر ءَ گوں کماش شوکت ءَ منی اولی دیدار دو ھزار چاردہ ءَ بوتگ ۔وھدے بی این ایم ءِ کونسل سیشن ءَ پد من ءَ کولواہ ءِ سنگت گون اَت اَنت دیم پہ کولواہ ءَ روگ ءَ اَت ایں، ھمے سپر ءَ مئے سواری پنچر بوت۔ وھد شپ ءِ نیم ءُ سک سرد اَت، من ٹیر (ٹائر) ءَ گُلائش کہ پچے کن آں، گڑا آپبستیں سردی ءِ زور ءَ ٹیر (ٹائر) پچ بوگ ءَ نہ اَت۔ سنگت باز اَت اَنت، بلے چر اے سنگتاں یکے اتک ءُ من ءَ پہ بچکند گْوشت ئِے من ءَ موہ بہ دئے چون پچ نہ بیت ھاھاھاھاھا۔۔۔

من یک کِر بوت آن ءُ کماش ءَ ٹیر (ٹائر) پچ کُت، اسٹمپنی پیسر ءَ پنچر اَت۔ منی ھمراہ شھید زھور جان پنام اسھاک اَت۔ اسھاک جان ءَ درائینت من ءَ ھمے نزیک ءُ گور ءَ مردمے ھست، من ءُ تو رواں ٹیرے (ٹائرے) پچ گران ءُ کا اِیں، گڑا ھمد ءَ کماش ءَ پہ بچکند گْوشت اڑے سلیم کجا ٹیر (ٹائر) ءَ داشت کنت، بِلے ھمد ءَ بیت من ءُ تو رو اِیں۔۔۔

اے منی اولی رند اَت کہ کماش دیستگ اَت، بلے من چہ آئی ءِ ھمت ءُ توکل ءَ سک باز سانمند بوت آں۔ سنگت راھادگ بوت اَنت، دمانے ءَ پد گوں ٹیر (ٹائر) ءَ واتر اتک اَنت ۔ٹیر (ٹائر) سنگتاں گاڑی ءَ را مان گپت ءُ ما وتی دْراجیں سپر بندات کرت۔

سنگت منی کش ءَ نندوک اَت، من گپ گپ ءِ تہ ءَ جست کرت تو بی این ایم ءَ کدی اتکگ ئے؟ سنگت ءِ پسو ءَ من ءَ گیش وتی نیمگ ءَ بُرت ” من پارٹی ءِ آھگ ءَ پیسر دبئی ءَ بوتگ آں، من ھمود ءَ پیسلو کرتگ کہ دْرانڈیھی ءَ یلہ کن ءُ واتر پہ ماتیں سرڈگار ءَ بہ رو ءُ وتی بالاد ءِ کچ ءَ جھد کارے بہ بہ آں، چی ءَ کہ منی پگر ءُ سسا ءَ ھر وھد من ءَ یکیں جست کرتگ کہ دبئی ءَ من تھنا وتی زھگاں لاپ دات کن آں، بلے پہ وتی راج ءَ ھچ کرت نہ کن آں “۔ گوں ھمے ھبراں ما وتی سپر ءَ سر بوتگ اَت اِیں۔

لھتیں وھد ءَ پد منی سر کولواہ شاپکول ءَ شھید شے شھمیر ءِ لوگ ءَ کپت، من ھمد ءَ کولواہ دمگ ءِ پاگواجہ میجر آسمی وپا دیست۔ گڑا من آسمی وپا ءَ جست کرت ھالاں بہ دئے من سنگتے دیستگ نام ئِے شوکت اِنت، آئی ءِ ھالاں بہ دئے کج ءَ اِنت۔۔۔؟ کولواہ ءَ کجام ھند ءُ میتگ ءَ نشتگ۔۔۔؟ من سنگت ءَ گندک ءُ دیدارے کن آں۔

میجر آسمی وپا ءَ پسو دات ءُ گْوشت کماش شوکت جان ءِ میتگ اچ چد ءَ کمو دور اِنت، اگاں لوٹ ئے ترا پون ءَ گپ دارین آں۔ من ھو کرت، آسمی جان ءَ پون جت ءُ پد ءَ من ءَ دات ئِے، منی گوں ھلو ءَ کماش گْوشت، گوں کماش ءِ گْوشگ ءَ پد آئی ءَ پہ بچکند درائینت سلیم جان تو ئے۔۔۔؟

اے آئی ءِ مھر ءُ مھروانی اَت، ءُ اے منی اولی رند اَت گوں کماش ءَ پون ءَ گپ ءَ اَت آں، بلے من کماش گوں کندگ ءُ ٹھکاں دیست گڑا نہ مار اِت کہ اے منی ءُ آئی ءِ اولی رند اِنت کہ ما پون ءَ گپ ءَ ایں۔ انچو سما بوت کہ ما سکا کْوھنیں سنگت ءُ پجاروک اِیں۔

وھد گوں تْرندیں گاماں جزان اَت، 2015 ءَ وھدے مئے ھنکین سوچگ ءُ ماندارگ بوت، گڑا مئے سر جھل کولواہ ءَ کپت۔ ھر وھد ءَ گوں کماش ءَ ھوار اَت آں، مئے ھر وڑیں کمک ءُ ھمراھداری ءَ ھر گام ءَ ساجو ءُ ساڑی اَت۔

کماش ءِ مستریں کمک آئی ءِ مکھیں مات اَت، مدامی گْوشت ئِے ” شوکت مرگ اللہ ءِ دست ءَ اِنت، بس بے ایمان مہ بہ ئے منی ارواہ “۔ کماش ءَ گْوشت اے منی وش بھتی اِنت تئی دُوا ء نیک گوں من گون اَنت، من انشااللہ بے ایمان نہ بہ آں۔

ھو ماتی! تئی بھادر ءُ مھروانیں بچ بے ایمان نہ بوت، تئی گْوشتن آئی ءَ پہ پھر پیلو کرت داں زند ءِ گڈی گام ءُ گڈی تیر ءَ جنگ ئِے کرت۔ مروچی من جزماں ماتی تئی ءُ کھول ءِ ھمرائی ءَ سرجمیں راج ءِ سر پہ پھر برز اِنت کہ مئے شوکت ءَ وتی سر دات، وتن نہ دات ءُ پہ دائمی ابدمان بوت۔