پنجگور ءُ ملا ازم | سنگت یاسر

پنجگور!

چہ دو ھزار شش (2006) ءَ پد وھدے کہ پنجگور ءَ دریں مردمانی آبادکاری بندات بوت، گڑا پنجگور ءِ سیاسی، گزارنکی (معاشی) ءُ دودمانی جاور انچوش ناگیگ بوت اَنت کہ شپ وتی جاگاہ ءَ روچ ءَ ھم ڈن ءَ درکپگ نہ بوت۔ دُزی ءُ دری مردمانی بے میار ءَ کشگ ءُ دور دیگ انچائیں ھبرے اَت۔

اے گالبند کہ برز ءَ نبشتگ منی ھیال ءَ ردیں گالبندے نہ بیت، پرچا کہ پنجگور مروچی ھم ملا ازم ءِ شکار اِنت۔ دو ھزار چار (2004) ءَ وھدے چیئرمین گلام مھمد ءِ سروکی ءَ بی این ایم جوڑ بوت، گڑا اے ھما زمانگ اَت کہ نوک مکران ءِ توک ءَ سما ءُ سسائی سیاست ءِ سرپر بنا بوت۔

واجہ ءِ ھمرائی ءَ لالا منیر ھم ھوار اَت ءُ کچکول ایڈوکیٹ اے زمانگ ءَ منی زانگ ءَ نیشنل پارٹی ءَ اَت۔ واجہ کچکول ایڈوکیٹ ءَ زانتگ اَت کہ نیشنل پارٹی بلوچ ءِ زمین ءِ جیڑہ ءَ ابید وتی جندے، بزاں پہ وتی زات ءَ ، زاتی سیت ءُ نپانی پشت ءَ کپتگ ءُ بے چڑکہ بلوچ ءِ چکچینی ءَ کنگ ءَ اِنت۔

ھمے زمانگ ءَ شھید اکبر ھان بگٹی ھم شھید کنگ بوت، جاور روچ پہ روچ ناگیگ بوان بوت اَنت۔ دو ھزار نو (2009) ءَ چیئرمین ءِ ھمرائی ءَ لالا منیر ءُ شیر مھمد شھید کنگ بوت اَنت، واجہ کچکول ایڈوکیٹ چہ ڈیھ ءَ درانڈیھ بوت۔ پنجگور ءِ سیاست وھدے اسد ءُ ھاجی سالھے ءِ وڑیں مردمانی دست ءَ اتک، گڑا اے زمانگ ءَ پنجگور ءَ ھمک سیاسی سرپرانی بگیر ءَ واجہ وت ریاست ءِ ھمراہ بوت اَنت۔ لشکر اش پنجگور ءِ مردمانی لوگ پہ لوگ ءَ برت ءُ پیش داشت، واجکار ءَ گْوشت کہ اے بلوچ جھد کار ءُ ریاست ءِ دژمن اَنت۔

دو ھزار سیزدہ (2013) ءَ وھدے رھمت سالھے جاندْراھی ءِ وزیر (صحت ءِ منسٹر) بوت، گڑا اے زمانگ ءَ شھید ابدلرھمان ءُ شھید زاھد ءِ وڑیں بامردانی بیگواہ کنگ ءَ ھمے نامگپتیں سیاسی ءُ چیریں واکدارانی دست مان اَت۔

پنجگور ھما زمین بوتگ کہ اد ءَ پہ بلوچ زمین ءُ بلوچ ءِ دودمان ءِ رکینگ ءَ پنجگور ءِ بامرداں وتی سر نْدر کرتگ اَنت، بلے وتی ڈگار ءِ دیگ ءَ ساجو نہ بوتگ اَنت۔

بژن کہ ھمے رھمت سالیھ ءَ پہ وتی ناکو ءِ چک شھید امتیاز ءِ شھید کنگ ءَ دلاری کرت۔ باست ءِ وڑیں لگوریں مردم کوہ ءَ دیم دات اَنت ءُ پد ءَ سرجھل (سرنڈر) کنائین اَنت۔ ھمے رنگ ءَ اگاں پنجگور ءِ ناگیگیں جاورانی سر ءَ گپ کنگ بہ بیت، تاکانی تاک سیاہ کنگ بہ اَنت۔

ملا ازم:

ملا ازم ءِ مول ءُ من ایش اِنت کہ ریاست اسلام ءِ بنیاد ءَ بلوچ ءِ چکچینی ءُ بلوچ پدریچ ءِ گار ءُ بیگواھی ءِ موسم ءَ مھکم بہ کنت، ریاست ءَ اسلام پندلے ءِ ھساب ءَ کارمرز کرتگ کہ من پنجگور ءِ مردماں چون وتی نیمگ ءَ بہ یار آں۔

ھمے ریاست ءَ پیسر ءَ کشندہ رمب (ڈیتھ اسکواڈ) ءِ نام ءَ ھما بلوچاناں تپنگ ءُ گاڑی دات کہ آیاں اے نہ زانتگ اَت کہ ما وت کے، ءُ ما اے کار ءَ پہ کے ءُ پرچا کنگ ءَ اِیں۔۔۔؟؟ بلے چوش کہ ریاست وتی رپک ءُ پندلانی (ٹِکٹسانی) توکا مدام بے سوب بوتگ۔ نوں آئی ءِ گور ءَ ھمے راہ پشت کپتگ کہ اسلام ءَ کارمرز بہ کنت ءُ ملاھاں مھکم بہ کنت، آیاں بہ والین اِیت ءُ پہ وتی مکسد ءَ کار بہ گپت ءُ گوں بلوچ راج ءِ چکچینی ءَ دلگوش بہ کنت۔

مروچی پنجگور ءِ ھنکین ءَ انچیں جاورے ودی کنگ بوتگ کہ کسے وتی برات ءُ چک ءِ سیر (سور) ءِ شادھی مجلسے (پروگرامے) ھم برجم داشت نہ کنت کہ ملا ازم ءِ بگیر اِنت۔

ھمے لانگ مارچ ءَ پنجگور ءِ دیوالانی سر ءَ کہ دیوال نبیسی کنگ بوت، ھمے یکیں شپ ءَ ملا ازم ءِ منوگراں دیوال نبیسی لڑیت ءُ (Removed) ءُ رنگ کرت اَنت۔ بلے من ھمے ملاھاں گْوشگ لوٹ آں کہ اے راجی توار ءُ جز ءَ نوں شما داشت نہ کن اِت۔ پہ مدرسہ ءُ آدینگ ءِ واز ءَ مردماں بڈ ( Brain washed) اِت نہ کن اِت، نوں آپ چہ سر ءَ گْوستگ ءُ راج ءَ سما کرتگ۔ نوں پہ تئی سبھان اللہ ءَ پدکنز نہ بیت۔

کماشے کسہ کنگ ءَ اَت کہ” مئے مسیت ءِ ملا ءَ پیش ءَ سھب ءِ بانگ وت داتگ، نوں نماز ءَ رَند کئیت “۔ اے گپ ءِ کنگ ءِ مول ءُ من ھمیش اِنت کہ شپ ءَ پنجگور ءِ دَمک ءَ چو کچک ءِ پیم ءَ ملا ازم یلہ اِنت، چتور نماز ءَ پشت نہ کپ اَنت۔

پنجگور ءَ پیسر ءَ ایپ سی ءَ تر ءُ گرد کرتگ، بلے نوں ایپ سی ءِ جاہ ءَ ملا ازم تر ءُ گرد اِنت، سرجمیں کاراں ملا ازم کنگ ءَ اِنت۔ پمیشکا نوں آئرا چہ وتی بنجلاں در آیگی نہ اِنت۔ چی ءَ کہ ملا ازم ریاست ءِ وپادار اِنت ءُ گوں وتی واجہ ءَ بے وپائی نہ کنت۔

گیدی کسھے ءِ ترانگ ءَ کپت آں، گوں ھمے کسہ ءَ گپ ءَ آسر کن آں: “ھست اَت شیرے کہ مدتے بوتگ اَت آئی ءَ را شکار دست نہ کپتگ اَت، شیر یک روچے لاچار بوت کہ کچک ءُ بز ءِ ھمرائی ءَ بہ روت شکار ءَ۔ بازیں تگ ءُ تاچ ءَ رند یک شکارے سئیناں کرت۔ نوں پہ شکار ءِ بھر ءُ بانگ ءَ شیر ءَ بز ءَ را گْوشت اے شکار ءَ سے جاہ ءَ بھر کن، بز ءَ شکار سے جاہ ءَ بھر کت۔ شیر ءَ را وش نہ بوت کہ بز ءَ شکار سے جاہ ءَ پرچا بھر کت، پرچا کہ اے شکار آئی ءَ را تھنا ورگی اَت۔ مدتے بوتگ اَت کہ آئی ءَ ھچ نہ وارتگ اَت، پمیشکا شیر ءَ چہ زھر ءَ بز ءِ جند وارت ءُ کچک ءَ را گْوشت نوں تو بھرے کن باریں۔کچک ءَ درائینت من اے بز ءِ ھڈ ءُ مڈاں وراں تو اے شکار ءَ تھنا بہ ور۔ شیر گل بوت ءُ گْوشت ئِے تو وپاداریں ھمراھے یے۔

اگاں اے کسہ ءَ ما بہ یار اِیں گوں ملا ازم ءُ کشندہ رمب (ڈیتھ اسکواڈ) ءُ واجکار ءَ دیم پہ دیم بہ کن اِیں، گڑا الم ملا ازم پنجگور ءِ توک ءَ کچک ءِ کرد ءَ پیلو کنگ ءَ اِنت۔