انوگیں جاور مئے دیم ءَ اَنت کہ کجام وڑ ءَ بلوچ راج بزگ ءُ لاچار اِنت، سال ءِ دوازدھیں ماھاں ماں دگانی سر ءَ نشتگ اَنت ءُ پہ وتی بیگوْاھیں براس، پس ءُ آ دگہ کس ءُ آزیزانی آجوئی ءِ لوٹ ءَ کنگ ءَ اَنت کہ ریاست ءَ آوار جتگ ءُ بیگواہ کرتگ اَنت، بوگی و ھمیش اَت کہ ریاست ءَ آیانی مردم آجو بہ کرتین اَنت یا ماں آمیدگساں پیش بہ کرتین اَنت بلے آئی ءِ جاگہ ءَ مئے ماس ءُ گوھاراناں، براس ءُ کماشاناں لٹ شاپ کنگ، آیانی سر ءَ زمستانیں شپاں آپ پرریچگ ءُ دگہ بازیں وڑاں آیانی سر ءَ زوراکی کنگ ریاست ءِ زورگری ءَ پدر کنت۔
دومی نیمگ ءَ مئے وتگڑیں پارلیمانی راجدار کہ وت ءَ راج ءِ دردوار لیک اَنت ءُ آیانی ھمدردی ءِ گپ ءَ جن اَنت بلے اگاں تو راستیں دْروشم ءَ بہ چار ئے آیانی ھواری ترا ھچ گندگ ءَ نیئت۔
پارلیمانی راجدار اگاں وت ءَ راج ءِ دردوار لیک اَنت یا آیانی دل ءَ پہ راج ءَ یک ماں سدی (1%) ھم مھر ھست اِنت گڑا آ دگہ ھِچ مہ کن اَنت ایوک ءَ ھمے گار ءُ بیگواھیں بلوچاں آجو بہ کنائین اَنت، اگاں آجو کرت نہ کن اَنت گڑا آمیدگس(عدالت) ءِ دیم ءَ بہ یار اَنت ءُ پیش بہ کنائین اَنت بزاں کہ آیاں کرتگ، اگاں اے ھم کرت نہ کن اَنت گڑا بہ رو اَنت دمانے گوں ھما مردماں بہ نند اَنت ءُ ھمدردی بہ کن اَنت کہ پہ وتی بیگواھیں براس ، دوست ءُ کساں ماں دگانی سر ءَ زمستانیں شپ، ھور ءُ گوات ءُ توپان ءَ نشتگ اَنت ءُ آیانی آجوئی ءِ لوٹ ءَ کنگ ءَ اَنت۔
آپ، لین ءُ روڑ ءِ جیڑہ اے مزنیں جیڑہ ءِ دیم ءَ ھِچ نہ اَنت ءُ من اے ھم زان آں کہ شما آیاں ھم کرت نہ کن اِت، ھرچ پارٹی یے کہ سرکار جوڑ کنت گڑا ایوک پہ وتی ھما چندیں مردمانی کار کنت کہ آئی ءِ کارکن اَنت پہ دگہ مردماں ھچ کار نہ کن اَنت۔
آ کہ پہ راج ءِ باندات ءَ ، پہ دمگ ءِ مردمانی وانگ ءُ زانگ ءَ کار کن اَنت آ ماں زنداناں بندیگ اَنت، آ پمیشکا بند کنگ بوتگ اَنت دانکہ وتگڑیں راجدار بہ یا اَنت ءُ مردماں رد بہ دے اَنت۔
اگاں شما اے کاراں کرت نہ کن اِت گڑا مہ یا اِت ءُ مردماں رد مہ دے اِت کہ ما سرکار ءَ کا این ءُ شمئے جیڑھاں گیشوار کن ایں، اے گپ ءَ ھرکس سرپد اِنت ءُ زانت کہ گچینکاری ھمینچو گیش بیت ، ھمینچو بلوچ ءِ چکچینی ھم گیش بیت، پارلیمنٹ ءَ کس نہ نند ایت ءُ پہ بلوچ ءِ باندات ءَ گپ نہ جنت بلکیں گیشتر بلوچ ءِ چکچینی ءِ شور کنگ بہ اَنت۔
گُڈسر ءَ من وتی راج ءَ ھمے دزبندی کنگ لوٹ آں کہ بس اِنت نوں ما ءُ شما باز رد وارتگ چہ وتی نام گپتیں میر ، کھدہ ءُ واجھانی دست ءَ نوں پاد بہ یا اِت ءُ وتی راست ءُ رد ءَ سرپد بہ بہ اِت ءُ پہ وتی اگبالاں لوٹ بہ کن اِت۔
