اگاں یکے وتی راج ءَ دوست دارگ لوٹ اِیت گڑا چہ درستاں پیسر آئی ءَ ماتی ءُ راجی زبان دوست دارگ الم اِنت۔ گِند ئے ما بلوچ این ءُ مئے راجی زبان بلوچی اِنت ما اے ھم زان ایں مئے زبان چد ءُ پیسر مئے پت ءُ پیرکاں ھچ وانینگ نہ بوتگ۔ بلے آوانی بلوچی راست اِنت ءُ آوانی گپ ءُ گالانی تہ ءَ ھچ وڑیں بوچ مان نہ اِنت۔
ما اے زانگ لوٹ ایں پرچا مئے ماتی زبان پشت کپگ ءَ اِنت؟ بلے مارا مئے راج دوست اِنت مارا مئے ڈیھ ءُ ڈگار دوست اَنت ما انگت پر چی ءَ پشت ءَ کِنزگ ءَ ایں؟ بانک کریمہ ءَ گْوشتگ: ’’ اگاں یکے ءَ را وتی راج دوست اِنت ءُ راج ءَ دیم آرگ لوٹ اِیت گُڑا پیسر ءَ آئی ءَ را وتی ماتی زبان دیم ءَ آرگ لوٹ اِیت۔‘‘
مئے دوئیں چم پہ مئے راج ءِ نودربراں سک اَنت کہ باندات ءَ مئے راج ءِ نودربر وان اَنت ءُ مئے زبان ءُ راج ءَ دیم ءَ کار اَنت۔ ما لوٹ ایں کہ مئے راج ءِ نودربر بہ وان اَنت ءُ وتی راج ءِ بزگی ءَ بہ زان اَنت۔ مئے راج ءِ تہ ءَ نوں بازیں نودربرے وانگ ءَ اِنت، ما سک باز گل ءُ شاد ایں۔ بلے مئے راج ءِ تہ ءَ دْرا گْوش اَنت ما بلوچ ایں مارا مئے راج چوش ساہ ءَ دوست اِنت بلے کم نودربر پہ زبان ءَ جھد کنگ ءَ اِنت۔
آ بلوچ بلوچے نہ انِت گڑا آ وت ءَ بلوچے بہ پھم اِیت ءُ وت ءَ بلوچے بہ کنت، وتی ماتی زبان ئِے گار کرتگ ءُ چوش گنگ ءَ دری زباناں گپ جنت ءُ گْوش اِیت ما بلوچ اِیں بلے مارا لج کنت کہ ما آواناں بلوچ ءِ نام ءِ سر ءَ توار بہ کن ایں۔
بانک کریمہ ءَ گْوشتگ کہ اگاں بلوچے بہ وان اِیت گڑا راج ءِ درائیں نودربر چہ آئی ءَ سوج ءُ پنت زیر اَنت بزاں کہ چہ آئی ءَ زانشت دربر اَنت۔
گِند ئے مروچیگیں انٹرنیٹ ءِ زمانگ ءَ نوں نودربر وانگ ءُ وتی زبان ءِ دیم ءَ آرگ اَنت بلے وتی زبان ءِ تہ ءَ دگہ زبانانی گپاں آرگ ءُ ھوار کنگ ءَ اَنت۔آوانی سبب ءَ بلوچی زبان ءِ تہ ءَ دگہ زبانانی گپ ھوار بوان اَنت۔ اگاں پیریں مردے چہ وانندھے ءَ جستے بہ کنت ھما وانندہ گوں پیریں مرد ءَ انگریزی ءُ اردو ھوار کنت ءُ گپ کنت۔ بلے وھے کہ شوانگے وتی زبان ءَ گپ کنت گڑا آ وتی ماتی زبان ءِ تہ ءَ ھچ وڑیں بوچ مان نہ کنت۔
نوزدہ سد ءَ بہ گر داں اے وھد ءَ چہ دھ ھزار ءَ گیش بلوچی گال گار ءُ بیگواہ کنگ بوتگ، ھمے وڑ ءَ بلوچی زبان ءِ تہ ءَ دگہ زبانانی گپ آیگ ءُ ھوار بوان اَنت۔
من گوں وتی کلیں راج ءَ دزبندی کن آں بلوچی مئے راجی زبان اِنت ما وتی زبان ءَ دیم ءَ آرگ ءِ جھد ءَ ھمے وڑ ءَ برجم بہ دار ایں کہ مئے گار ءُ بیگواھیں گالاں ھاٹیگ بہ رس ایت۔ شالا بلوچی جزان کنات ءُ بلوچستان شادان بات۔
