سلام ءُ دْروت مھروان!
من زان آں کہ تو منی دْروت درْواھیانی پّسواں اوں نہ دے۔
پرچاکہ ترا ھشت ماہ سرجم اِنت کہ تھاریں کوٹیانی باھوٹ ئے، من زانت نہ کن آں کہ تو گوں کُجام جاوراں دوچار ئے ءُ چونیں زوراکی تئی سر ءَ بوگ ءَ اِنت ءُ ترا چی گْوشگ ءُ پرمایگ ءَ اَنت تئی سر ءَ چونیں بھتام اِش جتگ ءُ من چوش ھم زانت نہ کن آں کہ تو کجام جاگہ ءَ ئے ءُ چتور ئے۔
دیر اِنت کہ منی دِل ءَ بیتگ پہ تو چیزے نبشتہ بہ کن آں بلے ھچ نبشتہ نہ بیت پرچ اکہ شمئے وڑیں مھروان گار ءُ بیگواہ کنگ بوگ ءَ اَنت دروگیں میڑ ءِ نام ءَ کشگ ءُ دور دیگ بوگ ءَ اَنت۔ مئے سر ءَ گیشتر گم گیش بوان اَنت، ءُ ما گیشتر ترس ءِ آماچ بوان اِیں باریں مئے آ دگہ مھروانیں سنگتانی ھال چی بیت؟؟
سکی جان بوت کنت کہ تو وت ءَ تھاریں کوٹیانی تہ ءَ مھکم کرت بہ کن ئے، بلے من ترا یک گپے گْوش آں، ما وت ءَ مھکم کرت نہ کن اِیں ، انگت ءَ واتر کن ءُ بہ یا کہ ما سک بے وار ایں۔گوں ما ھچ بوگ ءَ اوں نہ اِنت۔ ءُ نوں سال ھم بدل بوتگ ءُ نوکیں سالے آھتگ، اے نوکیں سال ءَ مارا ھِچ وشی نہ رس اِتگ بس تھنا مئے سالے ءَ کم کرتگ۔
اے سال ءِ روچ، ماہ، درد ءُ رنج دُرست ھما اَنت بس سال ءِ نام بدل بیتگ دو ھزار بیست ءُ چار بیتگ۔
بوت کنت کہ تھاریں کوٹیانی تہ ءَ تئی نی پٹ اسپیت بوگ ءَ اَنت ءُ بوت کنت کہ تو ھما 5 جون ءَ 2023 ءَ بہ گر داں روچ ء مروچی ءَ روچ ھم نہ دیستگ چونیں روچے؟؟؟
من آں ، تئی کستر ءُ نابودیں سنگت سدیر
سال 2024
