نمیرانیں کپٹن آدم | مھیم ابدل رھیم

زندگیءِ سپرءَ لھتے انچیں مردم دوچار کپ ایت ، چر اے کو‌‌ڑہ ءَ آیانی لڈگءَ پد ھم آ پشت کپ اَنت ، ھمے پشت کپگ ءِ مانزمان آیانی شھمیر ءُ گھگیریں کرد بیت. اے مساپت ءَ بازیں بلوچ پسگانی بالاچیں کرد منی ترانگ ءِ بنزہ ءَ نکش اَنت چر آ بامرداں یکے نمیرانیں کپٹن آدم بلوچ اِنت.

من ءُ آدم یکسر اَت ایں، یکیں لوگ ءِ تہ ءَ رست ءُ مزن بوت ایں، ما مدام ھمراہ اَت ایں برے اے جنگل ءُ برے آ جنگل. مئے نزیکی بے درور اَت ،چہ نشہ ءُ سلکاریاں ما چہ درکسانیءَ یک کر اَت ایں. من ءَ وانگ ءِ ھب اَت بلے آدم ءَ تشے ھم وانگءِ تب نیست اَت.من چارمی تبک (کلاس)ءَ وانگ اَت آں من ءَ یک روچے گْوشت ئِے : ’’ من مکتب ءَ کا آں گوں تو کہ سھبءَ وانگ ءَ رو ئے من ءَ میتگ ءَ تھنا وش نہ بیت، باند ءَ من گوں تو مکتب ءَ کا آں۔‘‘

من باز وش بوت آں ، سھب ءَ من آدم مکتبءَ برت ءُ نام نبشتہ کنائینت ۔ مئے روزنی کار اَت وھدے مکتب ءَ موکل بوت ما وتی ھر زرت اَنت شت ایں ڈنو سرا (ڈنو مئے کھولءِ ڈگار اِنت کہ مندءِ دمگ ملاچات ءَ اِنت) آ اود ءَ مارا تاھیر رس اِت، ما مدام آ اود ءَ لیب کرت۔ پہ وتی دلوتاں کاہ چت ءُ بیگاہ ءَ پد ءَ لوگءَ اتک ایں . چار سال ءَ پد من کہ مڈل ءِ چکاس ءَ سوبین بوت آں گڑا پہ وانگءَ سورو ءَ شت آں پرچا کہ بلو ءَ تھنا مڈل ءَ وانگ اَت. منی سورو ءَ آیگ ءَ رند آدم ءَ ھم بلو ءِ مکتب یلہ کرت .روچ ءُ ماہ گوزان بوت اَت اِنت، جاورانی تب ھم بدل بیان بوت ءُ 2001 ءَ من پہ لاپ ءِ شوھازءَ درانڈیھ بوت آں۔

جاورانی بدلیءَ ھوار وھدے بلوچ راجدوستیءِ جز ءَ کہ وتی وشبو آتار کرت گڑا آدم اوں چر اے وشبو ءَ اسرمند بوت۔آدم ءِ ھمگرنچی گوں کرکٹ ءَ اَت ، چہ کرکٹ ءَ آئی ءِ مھر گوں چاگرد ءَ روچ پہ روچ ودان بوت. اے مھر ءِ ھد ءُ سیمسر تھنا لیب ءُ گوازی نہ بوت بلکیں آدم ءَ وتی کرد ءِ دْروشم ءَ اے دگہ چاگردی کاراں بہ گر داں بی این ایم ءِ پتر ءَ بلوچ ءِ اسیلیں زمین زھگیءِ ھک ادا کرت۔

2010 ءَ وھدے کہ من سرپد بوت آں کہ آدم گوں ’بلوچ راجی زْرمبشت‘ ءِ سنگتاں نزّیکی کنگ ءَ اِنت گڑا ھمے دمان ءَ من ءَ دو مارشتاں گور جت، گلءُگم ۔گل پمیشکا بوت آں کہ آدم راجی جھد ءَ ھوار اِنت کہ اے ھرچ بلوچ ءِ سر ءَ واجب اِنت ، گمیگ پمیشکا بوت آں کہ آدم سکیں سادگیں مردمے ، چوشیں سادگی مردم ءَ سک تاوان دنت۔اے دوازدھیں سالاں آدم گوں دل ءُجان جز ءَ ھوار اَت ءُ ھچ وڑیں دیمونی ءَپد کنز نہ بوت۔ سکیں گْرانیں جاورانی تہ ءَ ھم وتی راجی زمہ واری جوانیں وڑے پیلو ئِے کرت اَنت۔

ھنکینءِ لگوراں پہ وتی وار ءِ وش کنگ ءَ پاکستانی فوج ءِ کر ءَ آئی ءِ شکایت کرت کہ اے مرد ’بلوچ راجی زْرمشت‘ ءِ مردم اِنت، شھر ءِ تہ ءَ جھدکارانی گیشتریں کاراں ھمے کنگ ءَ اِنت، شمئے اے دگہ دلار کج ءَ اَنت کہ ایشی ءِ بابت ءَ شمئے کر ءَ ھچ وڑیںرپورٹ نیست۔

گڑا ریاست ءُ آئی ءِ کاسگ چٹّاں ھما روچ ءَ شور کرت کہ آدم مارا ھرچ وڑ ءَ جنگی اِنت۔یکءُدو رند ءَ لشکر (پاکستانی فوج ) ءَ تچک ءَ تچک بیھار دات کہ مند ءِ کش ءُ گْوراں اگاں ما جنگ بہ بہ ایں بزاں سھولت کار تو ء آدم ئے۔بلے آدم ءَ اے گپ سرکار ءِ واکدارانی کر ءَ یکسر نہ من اتگ اَت ءُ گْوشتگ کہ’’ اے وڑیں کاراں منی دست مان نہ اِنت ، من چاگردی ءُ سیاسی جھدکارے آں۔بلے ریاستی کاسگ چٹاں مدام ریاست ھمے سدکی دات کہ اے مرد (آدم) شمارا ھرچ وڑ ءَ چہ مئے راہ ءِ سر ءَ دیر کنگی اِنت کہ اے جز ءِ مردم اِنت۔

گڈسر ءَ ریاستی کاسگ چٹ ءُ لگوراں 27 جنوری 2022 ماں بلو کرکٹ گراؤنڈ ءَ آئی ءِ پنچ سالی زھگ ھمل ءِ دیم ءَ آ تیرگواری ءَ شھید کرت،ریاست ءُ آئی ءِ کاسگ چٹ اے گپءَ ھچ بر بے ھال مہ بہ اَنت کہ شھید ھچ بر گار نہ بہ اَنت ، آئی ءِ جھد کاروان ءِ شکل ءَ روچے ناں روچے آجوئی ءِ دْروشم ءَ وتی منزل ءَ سر بیت بلے لگور ءُ دلار زندشر بہ اَنت آیاں پہ وتی سر ءِ چیر دیگ ءَ جاگاہ نہ رس ایت۔نی اے ریاست یاکہ آئی ءِ کاسگ چٹ چہ شھید آدم ءِ چک ’ھمل ‘ ءَ چی امیت دار اَنت کہ پنچ سال ءِ امر ءَ آئی ءِ دیم ءَ آئی ءِ پت دہ تیر سینگ ءَ جت ءُ شھید کرتگ۔ انچیں جاوراں بیرگیری ءِ جزبگ ردوم زیر انت ءُ سمیہ(سمل) ءُ سلمان ھمل ودی بہ اَنت۔