شپ اِنت تھاری اِنت چم پہ چم ءَ میم نہ بیت کوش ءِ لھم لھمیں توار پیداک اِنت ھشک سردی ءِ موسم اِنت ابیل ءَ تاکریچے ، تاکانی سدگ ءُ کپگ اے تھاری ءَ گروناک کنگ ءَ اَت۔ ٹریڈیشن ءِ پاکِٹ ءَ چہ ٹالے سگریٹ کش اِت باکسءِ ڈیل روک کرت گْوش ئے تھاری دور شت ءُ اوشتات ۔ سگریٹ روک کنگ ءَ پیسر میئت اِنت۔ دیم ءِ چادر دور کرت ڈیل ءِ رژناھی ءَ چار اِت ءُ سگریٹ روک کرت ۔پورا جھان ءِ زژنا تریں جاگاھے اگاں ھست اَت ، آ ھمے ساھت ھمے سگریٹ ءِ روکیں سھری اَت ، ڈیل ءِ مِرگ ءَ پد سرجمیں روچ ءِ گْوستانک وتی دیم ءَ پچ کرت۔
آدینگ ءِ روچ ءِ دیگر ءَ پیسر دو سپاھیاں من ءَ تلام کرت ءُ دیم پہ کارگسے ءَ برت۔ چم پچ کرت اَنت ، ٹیبل ءِ دیم ءِ سپاھی ءَ گْوشت اد ءَ دزرند بہ جن۔ باریں چنت وھد ءَ پد من کلم ءَ دست ءَ کنگ ءَ اَت آں۔ چہ دزرند ءَ پد لوتوکے منی دیم ءَ ایر کرت ئِے کہ وتی اُرداں بہ چار پورا اَنت۔ من دست جت ءُ سر سرینت۔ لوتوک ءِ توکا چادرے اَت ، چل تر اِتگ اَت۔ سگریٹی پاکٹ ءُ باکس من دیست اَنت بس۔کلم انگت منی لنکوکانی شم ءَ اَت ءُ کلم ءَ چارگ ءَ اَت آن ءُ جیڑگ ءَ اَت آں کہ اے بیگواھی ءِ مستریں سبب ھمے بوتگ من ءَ کلم دست ءَ بوتگ۔
من گوں ھیرانی ءَ اے کوٹی ءَ بوٹ والا سپاھیانی دیمم ءَ اَت آں کہ ھمے بوٹ والایاں منی لنکوک کرنٹ دات اَنت کہ تئی نبشتہ مئے ھلاپ اَنت بلے مروچی گْوش ئے ایشاں پیسلہ ئِے کرتگ اَت ، منی کلم ءَ مدامی پچ بہ گر اَنت ۔لوتوک ءَ گکے دات ئِے ءُ منی نیمگ ءَ شھارت ئِے۔ کلم ئِے چہ من دست ءَ چانپ اِت کہ نوکی من وتی ھیل ءَ جیڑگانی وھد ءَ کلم ءِ دپیگ ءِ نیمگ دپا کرتگ اَت ءُ گوں دنتاناں زور دیگ ءَ اَت آں ۔لوتوک من دست گیپت، منی چم اِش پد ءَ بست اَنت، مُھر بست اَنت اِش ، تلام کرت اِش ءُ گاڑی ءِ توک ءِ سیٹ ءَ گت اش کرت ۔دمانے رند گاڑی راھادگ بوت گاڑی کمو اوشتات ءُپدا راھادگ بوت منا بو بوت کہ دگہ مردمے منی کش ءَ نشتگ گوں ، ابید چہ لشکرے مردماں۔ وتی بو ءَ مردم زیت ھیل کنت بلے دگہ بویے کش ءُ کراں بہ بیت الم ماراِت کنت کہ کسے ھست اِنت۔
من ءَ اے کیمپ ءَ سال پورا بوگی اَت من آدینگ پہ آدینگ ءِ ھساب داشتگ اَت ھر دو آدینگ ءِ سر ءَ پہ گْور ءَ کنگ ءَ گد اش داتگ اَت۔ھمے روچ ھمے تنک ءُ تھاریں کوٹی ءَ ایریں ڈبی ھم در کرتگ اَنت چہ مسیتاں واز ءِ آواز ھم کمو کمو اتکگ اَت۔گْوستگیں آدینگ ءَ من ءَ منی جندے سئے سال پیسری گد آؤرت ءُ دات اَنت اِش۔ اے مدت ءَ من ءَ وڑ وڑیں سزا داتگ اَت اِش ۔ھردے کہ اے کیمپ (بندی جاہ) ءَ گریوگ ءُ پریاتانی توار بوتگ گڑا من زانتگ کہ مروچی نوکیں ورنایے بیگواہ کرتگ ءُ آؤرتگ اش یا چہ دگہ کیمپے ءَ چہ اد ءَ آرگ بوتگ۔دیر اَت کہ من دگہ کیمپ ءُ آزار جاھاں برگ نہ بوتگ اَت آں درائیں راہ من ھمے پِکر کننگ ءَ اَت آں مارا کج ءَ بارت نوکیں کیمپے ءَ یا۔۔۔۔۔۔!
من وھدے اندازہ ھم جنگ ءَ اَت آں کساس داں چار ساھت ءِ راہ روگ ءَ پد گاڑی ءَ ویرانگیں دڑ دڑے ءَ رؤگ بندات کرت اے دڑ دڑ ءَ نیم ساھت روگ ءَ پد گاڑی اوشتات مارا ایر کنگ ءُ گران کنگ بوت ۔ پہ کونڈانی سر ءَ نندگ ءَ ھکل دیگ بوت ، من چم پچ کرت اَنت بلے چہ چک ترینگ ءَ مہ کن اش کرت۔گاڑی ءِ لیٹ اش مئے پشتاں سک اش دات اَنت۔ من بس وتی کش ءِ مردم ءِ ساھگ دیست۔ آئی ءَ من چہ ساھگ ءَ ھچ زانگ ءَ نہ اَت آں کہ کے بوت کنت ، گپ کنگ ءَ ھم مہ کن اش کرتگ اَت۔گاڑی ءِ توار ءِ ھوریءَ دگہ کسانیں توارے بوت گمان بوت کہ تپنگے ءِ لاک پچ کنگ بوت منی دپ ءَ دراتک سنگت بوپس منی وت ءَ دور دیگ ءَ گوں تیراں توار کرت۔منی سما یک ویرانیں ھالیگیں ڈنے ءَ تچگ ءَ اَت ، تچگ ءَ اَت بلے رسگ ءَ نہ اَت۔ اناگاہ گاڑی ءِ توار گوں تیزی ءَ نزیک اَتک من ساہ داشت لھتیں چیز مئے نیمگ ءَ کپگ ءِ توار بوت ءُ گاڑی راہ گیپت من داں دیراں وتی گوش داشت اَنت (گوشانی دارگ من انچوش ھیل کرتگ اَت بندی جاہ ءَ مدام کہ گریوگ ءُ پریاتانی توار بوتگ من زانگ ءِ جھد کرتگ بہ گند ئے پریاتانی تہ ءَ آشنائیں نامے بہ گر اَنت۔ برے برے لنجیں ھاموشی ءَ وتی کوٹی ءِ زمین ءَ گوش سک داتگ اَنت کہ بلکیں آوازے یا لشکر ءِ بوٹانی توار ھست یا نیست) کہ گاڑی ءِ توار گار بوت ۔میزان میزان من کش ءِ سنگت ءِ نیمگ ءَ چار اِت داں ھچ میم نہ بوت تھارماھی اَت۔وت ءَ دلگوش بوت آں۔ ھچ وڑیں ٹپ ٹور پِر نیست اَت۔
توار دات سنگت! سنگت !آہ نیمگ ءَ ھچ توار نے اتک من دزموش کرت ، دزموش کنان منی پادانی جپتی ءَ منی دست ءَ چیزے سما بوت۔ من گڑ اِت آن ءُ ھوش برجاہ کرت داں چار اِت سنگت ءَ تیر وارتگ اَت ۔ ھمے ساھت ءَ کہ من گُشت سنگت پوپس من دؤر کرت سنگت ءَ منی نیمگ ءَ وت ءَ دور دات سنگت ءَ منی نسیب ءِ درائیں تیر وارتگ اَت اَنت۔ من جیڑگ ءَ اَت آں اے کہ بوت کنت چیا چوش کرتگ ئِے پہ من ، ءُ ما دؤئیں رک اتگ اَت ایں بلے اگاں منی نیمگ ءَ دور ئِے مہ کرتیں۔
من دزموش کنان کرت آئی ءِ دیم ءِ کیسگ ءَ کلم مان جتگ اَت دگہ ھچ نیست اَت کہ من سرپد بہ بہ آں۔ ھما گاڑی ءَ دور داتگیں اردانی پٹگ ءَ داں دو لوتوک دست کپت یکے منی اَت یکے الم ھمے سنگت ئیگ اَت ، من چہ وتی لوتوک ءَ چادر در کرت ءُ سنگت ءَ پر دات۔ آئی ءَ لوتوک پچ کرت۔آئی ءِ اُردانی توک ءَ آئی ءِ کارڈ ئِے مان اَت من زیت باکس ءِ ڈیل روک کرت کارڈ ءِ سر ءَ نبشتہ اَت ، بالاچ۔
