نبشتہ کار: بابُل لتیپ
کندیلیں سبا ءِ جُھد ءُ لیکہ ءِ ھُنڈال گوں سرڈگار ءَ پیوند اَنت، پمیشکا آ پہ مُجّتی زندگ ءُ ابدمان اِنت۔
بدواہ ءَ جیڑ اِتگ اَت کہ من پروپیسریں سبا ءَ شھید کناں ءُ آ پہ دائمی اِیرموش بیت، بلے بدواہ چہ گْوستانک ءَ ناآشنا ءُ سُکرات ءِ کسّہ ءَ نابلد اَت۔ آئی راستے کہ کندیلیں سبا شھید ءُ جسدی دْروشم ءَ اَچ ما گستا کُتگ، بلے آ چو رُژنے ءَ ڈیھ ءِ ھر ھمُک پاند ءَ شِنگ ءُ تالان اِنت۔ بہ کَول ء بشامیں اتا شاد:
تو پہ سرانی گُڈگ ءَ زند ءِ ھیالاناں کُش ئے!
پہ سِندگ ءَ داشت کن ئے پُلّاں چہ بوہ تالانی ءَ
ھو! تو پہ سرانی گُڈگ ءَ بہ گِندے سوب بہ کن ئے، بلے وشبوھیں پُلّانی باساں پہ آتار بوگ ءَ ھِچّ رنگ ءَ داشت نہ کن ئے۔ کندیلیں سبا ھما وشبوھیں پُلّ اِنت کہ آئی باس ءَ ھر بلوچ ہُسّگ مار اِیت ءُ پہ مدیمی زندگ اِنت۔ پمیشکا من اے ھبر ءَ پہ سدک گْوش آں کہ کندیلیں سبا ءَ باج بُرتگ ءُ مدامی بلوچ راج ءِ دلاں بادشاھی کنت، ءُ آئی ھما زانت ءِ چراگ کہ بال اِتگ چہ آئی ءِ رُژن ءَ یلیں ورنا وتی گْواچنیں دگ ءَ پولان ءُ راھی اَنت۔
ھما ورنا کہ وت ءَ کندیلیں سبا ءِ رند پداں پولان اَنت، جزماں آ وتی مُرادانی منزل ءَ سر بہ اَنت۔ پرچا کہ زانت ءُ زانشت پہ چیردستیں راج ءَ ھما سِلاہ اِنت کہ دُژمن ءِ اشکام ءَ پہ مدیمی گار ءُ گُمسار کنت۔ ھمے واستا بدواہ نہ لوٹ اِیت کہ بلوچ راج ءِ ورنا زانتکار ءُ زانوگِر بہ بہ اَنت، چی ءَ کہ زانتکار ءُ زانوگِر ءِ رُوژنائیں چمّاں ایردستیں راج ءِ بزّگی ءُ درتہ پُچّی چو لسھیں آدینک ءَ سھرا بیت ءُ آ زانت کہ منی راج ءِ نادْراھی چی اِنت۔
آ کہ سرپد اَنت مئے راج ءِ نادْراھی چی اِنت، آ گُڑا پہ ھمائی ءِ درمان ءُ دارو ءَ درکپ اَنت۔ بلے بژن پہ ھمایاں کہ آ نادْراھی ءَ سرپد ءُ انگت درمان ءَ وتگڑیں پارلیمنٹ ءِ ساھگ ءَ پول اَنت، چوش کہ اے وتگڑیں پارلیمنٹ ھما کنجر ءُ کاٹار اِنت کہ بلوچ ءِ گردن ءَ ایر اِنت۔ پمیشکا پہ بلوچ راج ءُ یلیں ورناھاں کندیلیں سبا ءِ دگ ءَ پند بُرّگ وژدلیں مِستاگ اِنت، گُڑا مارا وتی ھیال ءُ دلگوش دارگی اِنت دانکہ ما آ گرداباں مہ کپ اِیں کہ آ مئے راجی سیتانی تاوان ءِ سبب جوڑ بیت۔
چی ءَ کہ کندیلیں سبا بے تماہ ءُ پھک دلیں رھشونے اَت، ءُ آ انگت مئے ورناھانی رھشون ءُ ابدمانیں چیدگے کہ مارا تچکیں دگ ءَ شون دنت۔ پرے واستا اے گپّ ءَ من یک رندے پد ءَ گْوش آں کہ منی راج ءِ یلیں ورنا وت ءَ کندیلیں سبا ءِ رند پداں بہ پول اَنت، جزماں آ ھم پہ وتی چیردستیں راج ءِ رھشونی ءَ کندیلیں سبا جوڑ بہ اَنت ءُ وتی سگاریں رُژن ءَ ڈیھ ءِ ھر ھمُک پاند ءَ تالان کن اَنت۔
پادا اِت یلیں ورناھاں!
“سوب گوں شکّلیں جنگان اِنت”
