نبشتہ کار: بابُل لتیپ
جنگ آماچیں بلوچستان ءَ ھوناکیں دْرد ءَ ایر داتگ، ءُ اے دْرد ءِ دیم گوں راجی توان ءَ دارگی اِنت۔
کجام ڈیھ ءُ دمگ ءَ کہ جنگے رُد اِیت کُشت ءُ کوش، آوار جَنگ ءُ زندانی کنگ، زورانسری ءُ زوراکی زورگِر ءِ مُھکمیں سِلاہ جوڑ بیت، ھمے وڑ ءَ زورگِریں پاکستان بلوچستان ءَ گوں ھمے رِپک ءُ پندلاں گُلائیش اِنت۔ اے گْوستانکی راستی یے کہ زورگِر وھدے وت ءَ چہ اندر ءَ کْواپگ ءُ نِزور سرپد بیت گُڑا زوراکی ءِ دْرچ ءَ برجاہ دار اِیت ءُ وت ءَ ھمے تسلّا دنت کہ من مُھکماں، بلے راستی ھمیش اِنت کہ آ نِزور ءُ چہ اندر ءَ کْواپگ اِنت۔
اے راستی مارا چو اے وڑ ءَ گِندگ ءَ پیداک اِنت کہ ریاست پاکستان چہ بلوچ راج ءِ راجی جُنز ءَ بیمّ آماچ ءُ پہ وتی تُرس ءِ چیر دَیگ ءِ ھاتِر ءَ زُلم ءُ زوراکیانی دْرچے برجاہ داشتگ، پمیشکا آ بلوچ زالبولانی آوار جَنگ ءُ زندانی کنگ ءَ ابید تیر باران ءُ شھید کنگ ءَ اِنت۔ چوناھیا اے نوکیں ھبرے نہ اِنت کہ بلوچ راج اجکّا ءُ ھیرانگی ءِ آماچ بہ بیت، بلکیں اے در چہ ھما روچ ءَ بُنگیج بوتگ کہ اے زورگر ءَ پہ زورانسری ءُ گوں وتی پوجی توان ءَ مئے گُلزمین ءِ سر ءَ بیڑ بُرتگ ءُ دستی کُرتگ۔
بلے! بلوچ راج گوں وتی نِزوریں توان ءَ چہ ھما روچ ءَ اے ریاست ءِ بگیر ءَ اُوشتاتگ ءُ گھگیری کُتگ ءُ داں روچ ء مرچی برجاہ اِنت۔ پمیشکا زورگر مرچی اے راجی زْرمبشت ءُ گھگیری ءَ ناشرکاری (دھشتگردی) ءِ نام دنت ءُ رسانکدر ءَ اے دُروگ ءِ شِنگینگ ءَ مُلمہ اِنت داں من گوں وتی بے سوبیں کارپداں بلوچ راجی زْرمبشت ءِ اِیرموش کنگ ءَ سوبین بہ باں، بلے جنگ آماچ ءُ زُلم دیمپانیں بلوچ راج جوانی ءَ شیوار ءُ سرپد اِنت کہ ریاست پاکستان پہ وتی ھستمان ءِ پھازگ ءَ وڑ وڑیں رِپک ءُ پندل سازگ ءَ اِنت۔
زی بہ گِندے اے رپک ءُ پندلانی گْوارچ ءَ نابزانتی ءِ بُنیات ءَ لس مھلوک جاھے نہ جاھے ھمے پندلانی شِکار ءُ آماچ بوتگ، بلے مرچیگیں بلوچ زیکّیں پھوال نہ اِنت کہ تو ھرچی ناشری ء زوراکی بہ کن ءُ آ تئی ھوکار ءُ منّوگِر بہ بیت۔ بلکیں اے ھمے زُلم ءُ زوراکیانی سبب اِنت کہ بلوچ راج سوگہ ءُ ھر زُلم ءِ بگیر ءَ پاد کئیت ءُ میلانک بیت، ھمے گھگیری ءِ پُژدر ءَ تو آیاں گونڈلیں تیرانی آماچ ءُ زندانی کنگ ءَ گُلائیش ئِے۔
بلے! اے ھبر تچک اِنت کہ تئی زوراکیانی بام ءَ داتگ ءُ بلوچ راج ھِچّ رنگیں پندلانی آماچ نہ بیت، بلکیں آ تئی ھر زُلم ءُ زوراکی ءِ پسّو ءَ گوں گھگیری ءَ دنت۔ تو بہ گِندے دگہ ماجبین ئے گوں آئی برات ءَ زورانسری آوار بہ جن ئے ءُ زندان ءِ تھاریں کوٹیانی بندیگ بہ کن ئے، کسانسالیں نئیم ءُ ھوری ءَ شھید، پیرزالیں دادی ءَ زدگ ءُ ٹپّی، پہ درور لھتیں روچ پیسر مشکے، جاؤ ءُ کولواہ گُشانگ، مالار ءَ ورنا آوار جَنگ ءَ پد شھید کُرتگ ءُ تیر سُپتگیں جون چگل داتگ اَنت۔ بارکان ءَ ھوار مرچی پد ءَ ھال اِنت کہ کولواہ گُشانگ ءَ یک دگہ ورنایے ریاست ءِ درندگیں لشکر ءَ جتگ ءُ شھید کُرتگ داں من راجی توار ءِ گُٹگیر کنگ ءَ سوبین بہ باں، بلے پہ بلوچ راج ءِ اے راجی توار ءِ اِیرموش کنگ ءَ کدی سوبمند نہ بوتگ ءُ نہ بیت۔ چی ءَ کہ بلوچ راج ءَ اے سوڑگ ءُ سلاہ ھما روچ ءَ کُتگ کہ تو پہ زورانسری آئی ڈگار کبزہ کتگ۔ اے کبزہ ءِ بگیر ءَ راجی آجوئی ءِ جھد ءُ جنگ وت اے گپّ ءِ گْواہ اِنت کہ زورگریں پاکستان ءُ مئے سْیادی بس گُلام ءُ ھاکم ئیگ اِنت، اے گُلامی بلوچ راج ءَ نہ زی منّ اِتگ ناں کہ مرچی پہ آئی منّگ ءَ ساڑی ءُ ساجو اِنت۔ گُڑا اے ھبر تچک اِنت کہ تئی زُلم ءُ زوراکی بلوچ راجی جُنز ءِ دیم ءَ ھچّ وڑ ءَ اڑاند نہ بہ اَنت، بلکیں اے زُلم ءُ زواراکی راجی جُنز ءَ گیش مھکم ءُ توانمند کن اَنت۔
