درد ءُ ھاک ءِ سیادی

شپ نھنگام ءَ سر اَت، ابید ء تھاری ءَ دِگہ ھِچّ میم بُوَگ ءَ نہ اَت ءُ واب چہ چمّاں ھمے اُمیت ءَ یاگی اَت کہ بام دنت ءُ زِندمان نوکیں رنگے کار اِیت، بلے چو نہ زانتگ اَت تھنا دِل ءَ واب ءِ سمارگ کدی آپسرے ءَ سر نہ کنت، بلکیں پہ آپسرے ءِ رسگ ءَ اَچ وتی جاہ ءَ سُرگ ءُ جُنزگ لوٹ اِیت۔۔۔۔۔۔۔۔۔

من گوں یاگی ئیں چمّانی واباں برے کِسّویے سازگ ءُ کرُوجگ ءَ اِت آں کہ مُلّا ءَ بانگ دات، من چہ نپادانی تل ءَ درکپت ءُ ڈنّ ءَ اتک آں، چاراں تھاری انگت میلانک ءُ سْیاہ گْواتے ءَ سرکشّ کُتگ۔۔۔۔۔چمّ پہ چمّ ءَ میم نہ بیت، ءُ ھمے تھاری ءِ تلکار ءُ راڑیں باتِن ءَ پِیرزالے ءِ درد سرّیچیں نالگ ءُ آزُردگیں چیھانٹ مات زلیا ءِ چھرگ ءَ جَنَگ ءَ اِت اَنت کہ بام ءَ داتگ ءُ پہ زھگانی سھڑینگ ءَ شکر ءُ چائیتاک چہ کُجا بیاراں۔۔۔۔۔۔۔۔، چی ءَ کہ نیزگاری ءَ مئے گِس ءِ ھرچار کُنڈ ءَ گُل میه جتگ اَت۔۔۔۔۔۔۔۔

بلے!

مات زلیا ءُ اے پِیرزال ءِ کِسّہ یک ءُ کارِست جُتا اَنت، ھردو درد ءُ دور ءَ سرّیچ۔۔۔۔۔۔، زلیا زھگاں پہ جنوزامی رُودینگ ءِ گماں بار اَت۔۔۔۔۔۔۔۔، ءُ اے پِیرزال وتی جود ءِ بیگوائی ءُ رُستگیں جِنکّانی گماں دیمپان ءُ گولاپیں ودار ءِ چانٹ ءَ نشتگ ءُ مُھرگیں ارساں شلینگ ءَ اَت۔۔۔۔۔۔۔۔

جَوَڑگ، جَوَڑگ (جبڑگ) ءِ تہ ءَ پِیرزال ءَ ٹھکے دات ءُ درّائینت کَیت۔۔۔۔۔، من جزماں کَیت۔۔۔۔، منی اے تاموریں کُڈُّک ءَ چِراگے بال اِیت ءُ وتی لاڑُکیں جِنکّانی گیوار ءَ گوں مِسک ءُ اَمبراں مین اِیت۔۔۔۔۔۔۔، ٹھلیں بچّ ءَ کورگان کنت۔۔۔۔۔۔۔، کَیت، الم کَیت۔۔۔۔ھاھاھاھاھا۔۔۔۔

ناگت ءَ ھمے کندگ، کندگ ءِ تہ ءَ چیھالے ءَ باھِند کُت ءُ موسم ءِ نِدارگ مٹّ بوت۔ ھمُک دیم ءَ کہ چمّ کپت اَنت، بے تواری میلانک اَت، بلے ھمے بے تواری ءِ تہ ءَ زرمبش ءُ توارے ءَ چِڑکّہ کُت ءُ وتی پِیرزالیں مات چہ نااُمّیتی ءِ کُڈُّک ءَ در کُت ءُ اُمیت ءِ راھسر ءَ آؤرت نوکیں جوزگ ءُ ھاٹیگے شکسات۔۔۔۔۔۔

ءُ مرچی ھمے توار ءَ توامیں دمگ جکسّینتگ ءُ زُوراکیں ھاکم ءِ چمّانی واب بُرتگ، پہ بے تواراں توارے ءُ اُمیت ءِ ڈیوا ءَ بالگ ءَ اِنت۔۔۔۔۔۔

پمیشکا!
ھمے توار ءِ پُشت ءَ بازیں تواراں وتی توار مانداتگ ءُ گاماں دیم ءَ جَنان دانکہ مونجائیں زِندمان اَچ سْیاہ گْوات ءِ بُندر ءَ در تھاری ءَ چاک بِہ دنت ءُ رُژنے بِہ پلگار اِیت۔۔۔۔۔۔۔

توار جُنزان اِنت۔۔۔۔۔۔، پِیرزال گوں ھمے توار ءَ ھمتوار ءُ جُنزگ ءَ اِنت۔۔۔۔۔۔، بلے من ءَ انچو سما بُوَگ ءَ اِنت کہ اے توار ءِ مجگ ءَ مات زلیا ءِ توار ھم پیوند اِنت۔۔۔۔۔۔۔، چی ءَ کہ درد ءُ ھاک ءِ سْیادی یکّ اِنت۔۔۔۔۔۔۔۔