(من کُجام کِسّو ءَ نبشتگ بِہ کن آں)
بیا وتی جِند ءَ اَچ وت ءَ موکیں!
جزماں وش آتک کنت بھارگاھے
بِندات ءَ ما وتی سما ءُ سسّا، ھیال ءُ دلگوش کہ راجی آجوئی ءِ جُنز ءِ نیمگ ءَ ترّینت ءُ گْور کُت، بلوچی لبزانک ءُ شائِری ءَ گچینیں کِردے پیلو کُت، مئے بازیں شائِراں راجی بامرد ءُ راھشونیں سرانی سر ءَ وتی مھر ءِ درشان گوں شائِری ءَ کُرت۔ نبشتگیں کِسّہ ءُ درد سرّیچیں داستان سک کم چمّانی آپریچ ءَ گْوست، پمیشکا من گْوش آں کہ ھما روچ ءَ ما وتی کُنٹیں گام لبزانک دوستی ءَ در اَمَلی دْروشم ءَ راجی آجوئی ءِ جُنز ءِ پِڑ ءَ شھار دات اَنت، مارا پہ وانگ ءَ چوشیں کِسّہ ءُ داستان نہ رست کہ آیانی ھُنڈال ءُ سْیادی گوں مئے ایردستیں سرڈگار ءَ ھمگْرنچ بِہ بَہ اَنت۔۔۔۔، بلے ھبر اے نہ اِنت کہ مئے زیردستیں ڈگار اَچ کِسّہ ءَ ھورک ءُ ھالیگیں درپے بوتگ۔۔۔۔۔۔، بلکیں من ھمے پوہ باں کہ مئے کواس ءُ نبشتہ کاراں آ کِسّہ داں مئے ھدّ ءَ سر نہ کُرتگ اَنت داں ما آیاں آشنا ءُ آگاہ بِہ بَہ اِیں۔۔۔۔۔۔۔۔، یا نگیگیں جاوراں موہ نہ داتگ۔۔۔۔۔۔۔۔۔۔۔۔۔۔۔۔۔، بلے نادْراہ بے ھِلّت نہ اِنت۔۔۔۔۔۔۔۔
چی ءَ کہ کُشندہ ءُ چُکچینیں بھٹو ءِ زمانگ ءُ گْوستانک مرچی مئے دیم ءَ اِنت کہ آئی ءَ ھپتاد ءُ سَے ءِ دْھک ءَ گوں بلوچ راج ءَ کُجام زُوراکی ءُ زُورانسری کُرتگ اَنت، اے گپّ ءِ منّانک واجہ جنرل شیروپ ءِ گُلگدار ءَ ھوار اے دِگہ کماشیں سنگتانی اَچ دپ ءَ ما اِش کُرتگ ءُ ونتگ اَنت۔۔۔۔۔۔
بلے! مرچی ما ھما اَھد ءَ زندگ ءُ گوں وتی چمّاں توامیں جاوراں گِندگ ءَ اِیں کہ آ پہ ما لبزانکے ءِ کِرد ءَ پیلو کنگ ءَ اِنت، بس ند، زرنگ ءُ نتُرسیں نبشتہ کار ءِ پکار اِنت۔۔۔، بلکیں چو مئیگ ءَ کُنٹیں ندے ءِ واھُند مہ بیت۔۔۔۔۔۔
مرچی من گوں وت ءَ نشتگ ءُ کِسّو ءِ آرگ ءَ دِلمانگ آں، بلے کِسّھانی جوھان ءُ اَمبار ءِ دپ ءَ بِہ نِند اِیت ءُ مردُم کُجام کِسّو ءَ بْیار اِیت۔۔۔۔۔۔، چی ءَ کہ ھر کِسّہ پہ نبشتگ بُوَگ چاڑ ءُ وتی باتِن ءَ جُتائیں کارِست ءُ دْروشمے ءِ ھّدابُند اِنت۔۔۔۔۔۔
بلے من وت ءَ گوں توامیں کِسّھانی رجگ ءَ مُلمہ کُت نہ کن آں۔۔۔، چی ءَ کہ منی ند ءِ وس ءُ زانت آ کچ ءُ کیل ءَ نہ اِنت کہ توامیں کِسّھاں یکّیں کیلو ءَ کیل بِہ کنت ءُ گوناپ بِہ دنت، بِہ گِندئے پہ دِگہ نبشتہ کار ءُ کواسے ءَ اے ارزانیں کارے۔۔۔، بلے من وتی زانت ءُ ند ءِ ھاٹیگ ءَ جْوان سوھو ءُ سرپد آں کہ آ توامیں کِسّواں یکّیں دْرپ ءَ مانگیجگ ءِ توان ءَ نہ دار اِیت۔۔۔۔۔
پمیشکا من گوں وت ءَ دائم ھمے ھلوت ءَ کن آن کہ من کِسّھانی اَمبار ءِ دپ ءَ نِشتگ ءُ کُجام کِسّو ءَ نبشتگ بِہ کن آن۔۔۔۔۔، گوں وت ءَ اے جُست پرے ھاتِر ءَ مانایے دار اِیت ءُ من پہ تکے ءِ ماندیگ ءَ مُلمہ بَہ آں کہ منی ڈگار درد چکار ءُ ھون مینتگیں کِسّھاں امباز اِتگ ءُ پتار داتگ، ھمُک ملپد ءُ بیدھاں۔۔۔، لد ءُ کھچراں۔۔۔، دشت ءُ کوچگاں۔۔۔، شھر ءُ بازاراں۔۔۔، کوہ ءُ جنگلاں۔۔۔، وڈّ ءُ گیاباناں۔۔۔، زِر ءُ ریکستگاں ترا واناک۔۔۔، زانت ءُ پنت شکسوکیں کِسّھے دز کپ اِیت کہ پہ وشبوھیں پُلّ ءِ امبازگ ءَ پاتُویے کولیگ بوتگ۔۔۔، چِراگ ءِ رُژن ءِ پلگارگ ءَ پروانگے ندْر بوتگ۔۔۔، ءُ ھمے داب ءَ ھزاراں کِسّہ پہ نبشتگ بُوَگ ءَ ھُدوناک۔۔۔۔۔۔
پمیشکا۔۔۔! من وت ءَ مُدام اے جُست ءَ کن آں کہ کِسّھانی جوھان ءِ پادُوم ءَ من نشتگ آں کُجام کِسّہ ءَ پہ آیوکیں پدریچ ءَ نبشتگ بِہ کن آں۔۔۔۔۔۔۔
ویرانگ ءُ چارراہ ءَ ٹپّ ءُ ٹور، تیر سُپتگیں جون ءِ بارو ءَ۔۔۔، لشکر ءِ دست ءَ لپاشتگیں لجّ ءُ ننگ ءِ کِسّو ءَ۔۔۔، راج ءِ بگیر ءَ درکپتگیں چرّیک ءُ چارِیگانی۔۔۔، گْواتگِریں ماڑیانی ھُدوک ءُ راجدْروھانی۔۔۔۔۔۔
یا تلکاریں لُنٹانی جُمبوکیں توار ءَ۔۔۔، ارسیگیں چمّانی ودارِیگیں نوبت ءَ۔۔۔، تِپلیں زھگانی ھیسکارگاں۔۔۔، درد ءُ رنجانی گْرانیں بار ءَ۔۔۔، تاموریں شپ ءُ درامدیں دوار ءَ پِیرزال ءُ کماشانی چیھانٹاں۔۔۔، سارتی ءِ آپندیں چِڑکّہ ءَ۔۔۔، زُورگِر ءِ بیھار ءُ لٹّ شاپ کنگ ءَ۔۔۔، ورناہ ءُ کماش، پِیرزال ءُ شیرزالیں جِنکّانی گِرگ ءُ بندی ھانہ ءِ باھوٹ کنگ ءِ بابت ءَ۔۔۔، گِھگیری ءِ شھموکیں سگار ءِ سھرائیں دْرپشگاں کہ بدواہ کدی سوب نہ کنت۔۔۔۔۔۔۔۔
چی ءَ کہ مرچی بدواہ ءِ زُوراکی ءُ زُورانسریاں تانسریں راج سوگہ ءُ سرپد اِنت کہ منی ءُ اے ریاست ءِ سْیادی ابید ء گُلامی ءَ دِگہ ھِچّے نہ اِنت۔۔۔۔۔۔۔، بلے انگت بازیں مُریدے واجہ ءَ چنگ ءَ جَنَگ ءَ اِنت کہ من وتی کچکول ءَ پُر بِہ کناں راج زانت ءُ آئی آکبت۔۔۔۔۔۔۔، بلے گچینکاری ءِ موسم ءَ واجہ پد ءَ نادْراہ کُتگ ءُ سرے ماں بلوچ ءِ کُڈّک ءُ گِداناں کشّ اِتگ۔۔۔، بلے بلوچ راج شیوار بِہ بیت کہ اے ھمے لاپچار ءُ کاسگ چٹّ اَنت کہ اِیشانی کُمک ءَ پاکستانی لشکر مئے ایردستیں ڈگار ءِ مال ءُ مڈّیانی لُٹّ ءُ پُل کنگ ءَ ھوار اسلام آباد ءَ مئے مات ءُ گْوھار، زھگ ءُ کماشانی گوم ءَ چے کنگ ءَ اِنت۔۔۔۔، اگاں انگت ما اِیشاناں وش آتک کُت ءُ آیانی ھمراھی ءَ وتی گام شھار دات اَنت۔۔۔، گُڑا پہ ستک بِہ زان اِیں کہ نمیرانیں سرانی رِتکگیں ھونانی ھواری ءَ مھرنگ ءِ چاک داتگیں جیگ۔۔۔، سیما ءِ ماں پنگ ءَ گِرگ ءُ کشّگ، زِندانی بُوَگ ءِ ساھتاں چہ تِپلیں زھگ ءَ گِستا کنگ۔۔۔، سمّی ءِ تُرسینگ ءُ بیھار دَیَگ۔۔۔، ماہ نور، ماہ زیب، گُلزادی، ایدگہ بلوچ جِنکّانی لٹّ ءُ کُٹّ کنگ۔۔۔، ناکو میار ءُ بالاچ ءِ کماش ءِ پیراں سالی ءَ بے شْرپ کنگ۔۔۔، بیگوائیں پُسّگانی ماتاناں ژامبلینگ ءُ تیلانک دَیَگ۔۔۔، بندی کنگ۔۔۔، زِمستان ءِ سارتی ءَ آپ پرّچگ۔۔۔، ارس ریچیں گیس جَنَگ مارا باندا الم اے جُست ءَ کنت کہ تو گوں کُشندہ ءَ پرچا ھمدست بوتگ ئے۔۔۔۔۔۔، چی ءَ کہ اے توامیں زُوراکیانی باپُشت ءَ چیریں اکس کہ ترا گِندگ ءَ نئیت۔۔۔، آ ھمے اُوٹ پنڈُوکانی اکس اِنت کہ مرچی پد ءَ منی ءُ تئی گِس ءَ چو دُزّیں رُوباہ ءُ تولگ ءَ سْراپ کنان ءَ پیداک اَنت۔۔۔۔۔۔۔۔، پمیشکا مئے راجی ڈُبّہ ءُ زِمہ واری بیت کہ ما اے ھوادگیں دانکانی ھُدابُنداں بے سوب بِہ کن اِیں ءُ اے گِھگیری ءِ زرمبشت کہ پہ راجی ھستمان ءِ رکّینگ ءَ جُنزگ ءَ اِنت ما ھمیشی ءَ مُھکم بِہ کن اِیں ءُ اے توامیں داتگیں دیمونیاں بِہ موک اِیں۔۔۔۔۔، اگاں نا اسلام آباد ءِ ماتُوئی مھر ءُ واکداریں مھلوک ءِ کارپد مئے شُمئے کُلّانی دیم ءَ کہ آیاں گوں وتی کھراں مئے زھگ ءُ زالبُول۔۔۔، پِیرزال ءُ کماش۔۔۔، ورناہ ءُ جِنکّانی گوم ءَ کُجام اَمَل کُتگ ءُ کنگ ءَ اِنت۔۔۔۔۔۔۔، چوش کہ چرے کارپداں بدواہ ءِ بدّیں واھگ چو رُوچ ءَ سھرا اِنت کہ آ پہ مئے گُٹّ ءِ ھوناں تُنّگ اِنت۔۔۔، گُڑا مارا ھم پہ آئی ءِ وش آتک ءَ دوچاپی۔۔، ڈُھل ءُ سُرناہ کنگی نہ اِنت، بلکیں بدواہ ءِ ھر تْرندیں دانک گوں تْرندی ءَ پسّو کنگی اِنت دانکہ آ بِہ زانت کہ بلوچ ءِ دِلبند ءَ منی روک کُتگیں آس ءِ بْرانز پہ منی سوچگ ءَ چینچو جمبور اِنت۔۔۔۔۔۔
ءُ ھمے رنگ ءَ مارا وتی راج ءَ را اے کلوہ دَیَگی اِنت کہ ما پہ تئی ایردستی ءِ سانکلانی پْروشگ ءَ۔۔۔، آجوئیں بام ءِ پلگارگ ءَ چو رپتگیں سرانی داب ءَ ھر دابیں دیمونی ءِ دَیَگ ءَ جاڑِیگ ءُ چک ءُ پد کدی نہ بَہ اِیں۔۔۔، ناکہ زِندان ءِ تھاریں کُوٹی مئے توکل ءَ ھاٹیگ ءَ نِزور کنت۔۔۔، چی ءَ کہ زِندان ءِ تھاریں کُوٹی ءَ چہ ءَ مارا زاھد ءُ زاکر جان ءِ مُھکمی پیداک اِنت کہ تئی زُلم ءُ زُوراکیاں آیانی بالاد الم ریز اِتگ، بلے پْروش دات نہ کُتگ۔۔۔، گُڑا مارا چتور پْروش دئے۔۔۔۔۔۔۔۔
ھمے دْروشم ءَ مارا وتی ریزاں بندیگیں گُلزمین، وپا ءِ مرزبُوم، مھر ءِ بُندر، زِندمان ءِ جلواہ، آکبت ءِ مانزمان ھمے کلوہ دَیَگی اِنت کہ پہ تئی دائمی بندیگ کنگ ءَ جزماں بدواہ ءِ بدّیں واھگ کدی پیلو نہ بیت۔۔۔۔۔۔۔۔۔، بلکیں اے گِھگیری ءِ ھار تئی بدواہ ءَ پہ مُجّتی پتار دنت ءُ آجوئی ءِ بام مِستاگ گیت۔ پہ تو نمیرانیں بالاچانی ھون نبیسّ اِتگیں کِسّہ۔۔۔۔۔۔۔، مھرنگیں شیرزالانی زِندانی۔۔۔۔۔۔، سمّی ءُ سیمائیں کاڑانی پند آیوکیں پدریچ ءِ درونت بیت۔۔۔۔۔۔۔۔۔
آسے ءَ چنکّاں گیابان، کُوکُویے تلکاں چِتگ
اَمبریں شھر ءُ دوارے انگراں ماں پُوشتگ
