نبشتہ کار: امجد رھیم
من تھنا نِندوک ءُ گْوانکو منی دست ءَ اَت، دل ھمے جیڑگ ءَ اَت کہ چیزّے نِبشتہ بہ کن آں، بلے مجگ ءُ ھیالاں ھچ رنگیں مارگ ءُ مارِشتے سھرا نہ بوت کہ منی ند پہ دو لبز ءِ نبشتہ کنگ ءَ ساجو بہ بیت، پمیشکا جیڑگاں جیڑگے پِر اَت۔
من ھمے جیڑگانی جھان ءَ گولگ ءَ اِتاں کہ تہ ھیال اتک کہ یار وتی سنگت ءِ باروا چیزّے نبشتہ بہ کناں، بلے منی کرّ ءَ چوشیں ھاس ءُ گچینیں لبز ءُ گالے نیست اَت کہ من وتی سنگت ءِ توسیپ ءُ ستا ءَ بہ کن آں۔
چی ءَ کہ آ بے مَٹّ ءُ درور اِنت۔ آ وتی مَٹّ وت اِنت، آئی جاگہ ءَ دگہ کسے گیپت کُرت نہ کنت۔ آ امنچو ڈولدار ءُ زیبا، کہ من ءَ چوشیں شوکیں گال ھم نیست من آئی توسیپ ءَ بہ کن آں، پرچا کہ آ ھمنچو بے درور اِنت۔
آ منی واستا بلائیں مال ءُ مڈّی یے، وھدیکہ من وتی سنگت ءَ گوں ھمراہ باں گُڑا من کدی وت ءَ اِیوک نہ پھم آں۔ آئی داتگیں مھرانی من داں زندگاں وامداراں، چی ءَ کہ آئی من ءَ ھمنچو مھر داتگ۔۔۔۔۔۔۔۔آئی مھرانی بدل گوں من ھچ وڑ ءَ دیگ نہ بنت۔
آ مُدام گوں من ھوار ءُ دلبڈّی دنت، وانگ ءِ باروا، دگہ دگہ چیزّانی سر ءَ سِکین ءُ دلبڈّی دنت۔ پمیشکا منی اے دوئیں دانک پہ آئی ءِ تمردیں بالاد ءَ مزنیں کارے نہ اِنت، بلے منی نیکیں واھگ ءُ ارمان اِنت کہ پُلیں سنگت ھر وھد سلامت ءُ وشیانی منگیراں بات ئے۔ ھست ءُ ھیات بات ئے بیلی۔۔۔۔۔۔۔۔
تئی وتی سنگت،
امجد رھیم
