سرمچار ، مھلوک ءُ اِستانی گپتمان

نبشتہ کار: بابا بلوچ

یک ایردستیں چاگردے ءِ اندر ءَ زورآور وتی ناھکّیں کوزہ ءِ برجم دارگ ءَ ایردست ءَ پگری تک ءُ پھنات ءَ ھلاس کنگ ءِ جُھد ءَ کنت ءُ دومی نیمگ ءَ ایردستیں مھلوک اِنت کہ آ پہ وتی ڈیھ ءِ آجوئی ءَ گھگیری ءِ راہ ءَ در چِنت۔ نوآبادکار ءُ زورآور تھنا یک اِنت کہ آ ایردست ءِ لگتمالی ءَ کنت، بلے ایردست ءِ میان ءَ مھلوک دو بھر ءِ اندر ءَ اِنت۔ یکے لس مھلوک ءُ دومی سیاسی ءُ سلاہ بندیں مھلوک۔ سلاہ بندیں مھلوک ھما اَنت کہ آ دُژمن ءَ گوں دیم پہ دیمی گھگیری کن اَنت ءُ آجوئی ءِ جار ءَ جن اَنت۔ دومی لس مھلوک اِنت کہ پہ ھمے لس مھلوک ءَ سِلاہ بندیں سرمچار گھگیری کن اَنت ء ڈیھ ءَ ھوار ھمے لس مھلوک ءَ دُژمن ءَ چہ آجو کن اَنت۔

بلے! ھمے میان ءَ اِستانی گپتمان ءِ یک مزنیں ءُ بےسوبیں کچے گندگ ءَ کئیت ءُ اے گپتمان ءَ اِستان وتی جند ءِ رکینگ، کوزہ ءِ رکینگ ءَ لس مھلوک ءِ ھیال ءُ لیکھانی مٹ ءُ بدل کنگ ءِ کوشست ءَ کنت۔ دومی نیمگ ءَ راجی سرمچار اَنت کہ آ اے اِستانی گپتمان ءَ پروش دَیگ ءِ کار ءَ کن اَنت ءُ لس مھلوک ءَ ھمے باور کنائین اَنت کہ اے جنگ مھلوک ءِ جنگ اِنت ءُ سرمچار پہ وتی مھلوک ءَ گھگیری کنگ ءَ اَنت ءُ اِستان ءِ دیم ءَ آؤرتگیں گپتمان سرجم ءَ رد اَنت۔ انچوش کہ ڈیوڈ گلولا نبشتہ کنت کہ: ” یک ھندے ءَ ڈی کالونائیشیشن ءِ زْرمبشت چِست بیت اُود ءَ اولی گامگیج لس مردم ءِ کمک ءُ آوانی بیسہ اِنت، اے رِد ءَ سرمچار ءُ زورگیر ءِ جنگ تھنا لس مردماں وتی گپتمان ءِ نیمگ ءَ آرگ ءِ کوشست اِنت۔”

بلوچ ءُ بلوچستان ءِ نِز ءَ سرمچار ء لس مھلوک ءِ سیادی ءَ سرپد بہ بئیں گُڑا مارا اے گندگ ءَ کئیت کہ وھدے سرمچار شھر ءُ بازاراں کایاں، پوجی بُنجل ءُ سرکاری مڈّیانی سوچگ ءَ کایاں گُڑا لس بلوچ ءِ مھر مزنیں کِساسے ءَ گندگ ءَ کئیت کہ آ بے ترس ءُ بیمّ ءَ کایاں سرمچاراں گوں اکس کَش اَنت، ءُ سرمچاراں وتی راجی پوج سرپد بنت۔ لس مھلوک ءِ اے اَمَل ھمے دیدانک ءُ لیکہ ءِ شون ءَ دنت کہ آشوبی جھدکار ءُ آجوئی لوٹوکیں سرمچار مھلوکی سرمچار اَنت، گوں مھلوک ءَ مھر کنوکیں سرمچار اَنت۔

تھنا توپک سرمچار ءِ پجّار ءَ نہ کنت، پرچا کہ ھمے توپک زورگیریں پوج ءَ گون اِنت، ھمے توپک اِستانی چارِیگ ءُ راجدْروھاں گون اِنت، ھمے توپک دُزّ ءُ ڈُنگاں گون اِنت ءُ ھمے توپک یک سرمچارے ءَ ھم گون اِنت۔ بلے سرمچار ءِ توپک ءِ نل ءَ چہ دراتکگیں ھر یک تیرے گوں لیکھے ءَ بندوک اِنت، مھلوک ءِ لاچاری ءُ گلامی ءِ ھتم کنگ ءَ بندوک اِنت، ڈیھ ءِ آجوئی ءَ بندوک اِنت ءُ دُژمن ءِ نیست ءُ نابود کنگ ءَ بندوک اِنت۔

چوش کہ سرمچار ءُ سرمچار ءِ مھلوک ءِ میان ءَ گِستائی ءِ کار ءَ اِستانی گپتمان کنت۔ انچوش کہ اِستان ءَ اے سما کپ اِیت کہ سرمچار ء مھلوک ءِ میان ءَ نزّیکی ودّان اِنت آ دو کار ءِ نیمگ ءَ روت۔ یکے آ لس مھلوک ءَ گوں سیاست کنت۔ آ نیکرو سیاست ء بائیو سیاست ھردو بنت۔ بیھار دنت، لٹّ ءُ کُٹّ کنت، زورانسری گار ءُ بیگواہ کنت، شھید کنت، پروگرام ءِ لَیب ءُ گْوازی ءِ رنگ ءَ ریپین اِیت۔ ءُ دومی نیمگ ءَ سرمچار ءِ کارانی ءُ ڈکّانی ردیں پندل دیم ءَ کار اِیت ءُ آجوئی ءِ مکسد ءَ دگہ رنگے دَیگ ءِ کوشست کنت۔

اول سر ءَ آ لس مھلوک ءِ میان ءَ نیکرو سیاست بزاں کہ مرگ ءِ سیاست ءَ جاہ دنت۔ مرگ ءِ سیاست ءَ مراد ترس ءُ بیمّ ءِ سیاست، کُشگ ءُ گار کنگ ءِ سیاست، مچانکی سزا ءُ جزا ءِ سیاست اِنت۔ اے رِپک ءُ اَمَل ءَ چہ لس مھلوک ءَ اِستان وتی چیردستی ءَ کنگ ءِ جھد ءَ کنت۔ اے درور مارا بلوچستان ءِ اندر ءَ ارزانیں رنگے ءَ گندگ ءَ کئیت وھدے یک ھندے ءَ سرمچار اُرش کن اَنت ءُ اِستان ءَ مزنیں کچّے ءَ تاوان دے اَنت، ھمے ھند ءَ اِستان پد ءَ لس مھلوک ءِ لَٹّ ء کُٹ ءَ بندات کن اَنت کہ لس مھلوک تُرس ءِ آماچ بہ بنت ءُ گوں سرمچاراں آجوئی ءَ  مھر مکن اَنت۔ اشی درور بلوچستان ءِ کنڈ کنڈ ءَ گِندگ ءَ کئیت کہ ھر ھما ھند کہ اُود ءَ آجوئی ءِ زْرمبشت ءُ گھگیری ءِ جزبگاں سر چِست کُتگ اُود ءَ اِستان ءَ مرگ ءِ سیاست دیم ءَ آؤرتگ ءُ گھگیری ءِ ھلاس کنگ ءِ ناکامیں کوشست کتگ۔

سیاست ءِ دومی رنگ اِستانی بائیو سیاست اِنت۔ بائیو سیاست ءَ مراد آسراتی ءِ سیاست۔ اے دابیں سیاست ءَ اِستان ھما وھد ءَ کنت وھدے کہ نیکرو سیاست ءَ چہ، ترس ءَ گیش مردم گھگیری ءِ راہ ءَ در چِنگ ءَ بنت۔ نوں اِستان کوشست  کنت کہ کسانیں کِساسے ءَ آسراتی دَیگ بہ بیت کہ نِزوریں زھن ءِ مردم چہ ھمے آسراتیاں سوھو بہ بنت ءُ گھگیری مکن اَنت ءُ گھگیری ءِ راہ ءَ رد بہ گْوش اَنت۔ بائیو سیاست بلوچستان ءِ تہ ءَ ھمے زمانگاں (2023…) باز گندگ ءَ کئیت کہ اِستان ءَ روڑ داتگ، وانگجاہ ءَ پہ کوٹی داتگ ، آپ ءِ واستا پہ واٹر سپلائی داتگ ءُ اے دابیں آسراتی کہ بس تھنا نام ئیگ اَنت ءَ لس مھلوک ءِ رد دَیگ ءِ واستا اَنت۔

اِشی ءَ ابید شال، کیچ، ھُزدار (خضدار) ءُ ھب چوکی ءِ وڑیں شھراں اِستان وتساچیں دود ءُ ربیدگی پروگرام، لَیب ءُ گْوازی ءِ پروگرام اڈّ دنت کہ لس مھلوک ءِ وانندگیں مھلوک گیش ءَ گیش چہ اِستان ءَ وش دل بہ بنت ءُ گھگیری ءَ پہ توار چِست مکن اَنت۔

اِستان ءِ دومی گپتمان راجی سرمچارانی سوبمندی ءِ رَد گْوشگ ءُ رسانکدر ءَ سیمیناراں وتگڑیں منّاک ءِ دیم ءَ آرگ ءُ بلوچ سرمچاراں دری کمککار گْوشگ ءُ آجوئی ءِ جُھد ءَ وڑ وڑیں نام ءِ دَیگ اِنت۔ اے وڑیں درور بازیں دْروشم ءَ گندگ ءَ کئیت کہ اِستان ءِ پوج ءِ جارکش وتی گیشتریں گُشتانکانی اندر ءَ کاؤنٹر انسرجنسی ءِ ترتیب ءَ کارمرز کنان ءَ آجوئی ءِ جُھد ءُ بلوچ سرمچاراں “فتنہ الہندستان” گْوش اِیت، پرچا کہ اے انسرجنسی ءِ کاؤنٹر کنگ ءِ کْوھنیں دابے کہ گھگیری کنوکاں انچیں نام بندگ کہ آئی مِنزل ءُ لوٹ ھمے نام ءِ میان ءَ گار بہ بیت۔

دومی نیمگ ءَ رسانکدر ءَ بلوچ سرمچارانی اُرشاں نِزور پیش دارگ۔ انچوش کہ زوتاں ھاران ءَ بوتگیں اُرش ءِ بابت ءَ اِستانی رسانکدر ءَ ھمے منّارینگ ءِ کوشست کت کہ بلوچ سرمچار پنچ ءُ دہ ساھت ءِ واستا شھر ءَ کایاں پہ بینک ءِ پُلگ ءَ، بلے اے تھنا اِستانی گپتمان اِنت۔

دومی نیمگ اگاں اِستانی گپتمان ءِ در، بلوچ سرمچاراں بہ چاراں مارا گندگ ءَ کئیت کہ سرمچاراں اِستانی گپتمان پْروش داتگ۔ اِستان ءَ ھر کوشست کتگ کہ مھلوک چہ گھگیری ءُ سرمچاراں گِستا بہ بنت، بلے مھلوک ءَ سرمچار ءُ گوں گھگیری ءَ گیشتر نزیکی کتگ۔ ھاس ھما مھلوک کہ اِستان ءَ زوراکی ءِ نشانگ ءُ بیھار داتگ اَنت، ھما مھلوک ءَ گیشتر گھگیری کتگ ءُ کنگ ءَ اَنت۔

دیمتر ءَ بلوچ راجی سرمچاراں اِستان ءِ رسانکدری پروپگنڈا ھم پروش داتگ۔ اِستان ھمے داوا ءَ کنت کہ سرمچار کِساس دہ ءُ بیست منٹ ءَ شھراں کاینت ءُ رَو اَنت، بلے راجی سرمچاراں اے پروپگنڈا پْروش دات ءُ زِھری ءِ دوبر گِرگ ءِ چِل روچ ءِ کِساس ءَ کنٹرول سرمچارانی تاگت ءِ مھکمی ءَ پیش دار اِیت۔ اِستان اے ھم ھبر ءَ کنت کہ سرمچار شھراں تھنا بینک ءِ پُلگ ءَ کایاں بلے ھاران ءِ اُرش ءَ دوبر اِستان ءِ گپتمان پروشت۔ انچوش کہ بلوچ سرمچاراں ھاران ءَ 50 ءَ بُرز اِستانی ہوجی مُردار کت ءُ ھپتاد (70) ءِ کِساس ءَ وڑ وڑیں توپک دز گیر کت۔

گُڈّسر:

گُڈْسر ءَ اگاں بلوچ سرمچار ، بلوچ مھلوک ء اِستانی گپتمان ءَ ھمدپ بہ کنیں مارا ھمے گندگ ءَ کئیت کہ بلوچ سرمچاراں وتی مھلوک منّارینتگ کہ اے آجوئی ءِ جنگ سرجمیں بلوچ ءِ جنگ اِنت، ءُ سرمچار بلوچ راج ءِ گھگیری ءِ چیدگ اَنت۔ دیمتر ءَ اِستانی گپتمان ءِ پْروش دیگ ءَ پہ سرمچار شھراں اتکگاں ءُ راجی جنگ منّارینتگ۔ مھلوک ءَ دوست ءُ دژمن ءِ تپاوت کتگ ءُ وتی دوزواہ درچتگ اَنت۔