دو دانک پہ اُستاد منھاج مکتار ءَ

نبشتہ کار: ڈاکٹر لاشاری

ھرچ ھمک راجے ءِ تہ ءَ یک جھدکارے ءِ وتی یک کردے یک نامے منینّگ بیت ءُ آئی ءِ کرد مان اَنت، مروچی اُستاد منھاج یک آشوبی گشندھے گْوشگ بیت ءُ یک راجے ءِ توار اِنت۔ ھمک راجی جھدکارے ءِ وتی گچتگیں کِشک ءُ راھے کہ ایردستیں مھلوک ءَ چون ءُ چتور راجی جنز ءِ آیگ ءِ سکین ءُ رھشونی ءَ کنت، بلے مرچی کہ اُستاد منھاج ءَ ھمک دلانی تہ ءَ یک آشوبے ودینتگ ءُ سرجمیں راجے آگاہ کُرتگ۔ اے پڑ ءَ اُستاد منھاج ءَ مزنیں بارے وتی کوپگ ءَ کُرتگ، بلکیں اُستاد ءَ ناں تھنا گشندھی ءِ پڑ ءَ کرد پیلو کُتگ ءُ نامے وت ءَ داتگ، بلکیں ھمک پند ءُ تْراولیں پادانی سپر ھم بُر اِتگ کہ یک نیمگے راجی توار ءُ دومی نیمگ ءَ یک تمردیں ھمبلے لیکگ بیت۔ اُستاد ءَ اِلمی زانشت ءُ پگری سسّا ءَ چہ سرریچ اِنت، اُستاد ءِ شائری، اُستاد ءِ مھروانی، اُستاد ءِ جَلواناکیں دیوان ءُ گپ یک شوکیں زیبائی یے۔

اُستاد راجی جھد ءَ گوں ھما وھد ءَ ھوار بیتگ کہ بی ایس او  ءَ بیتگ بلے اُستاد ھمک راجی کار ءَ گوں ساچو اِنت، توری زیمری پڑ بہ بیت یاکہ راجی گل بہ بنت ھردو اُستاد ءِ جان ءُ رگ ءُ بنداں پیوست اَنت۔ من وَ ھمینچو ستا بہ کناں کم انت پرچاکہ راجی جھدکار ءُ راجی گشندہ ءِ شرپ ءُ نامداری سک دراج ءُ جُھلانک اِنت، بلے اُستاد ءِ توار وت یک آشوبے کہ مُرتگیں دلاں تاھیر دیگ ءَ اِنت۔ گلامیں چاگرد ءَ توار جنگ ءَ اِنت کہ پادا تو گلام ئے! یک ھُشکاوگیں زمینے ءَ آپ دیگ ءَ اِنت کہ چُرّک بہ جنت ءُ بہ سبز اِیت۔ مرچی اُستاد ءِ ھمک توار ءَ سرجمیں راجے ءِ چم پچ کُتگ اَنت ءُ گلامی ءِ توک ءِ سندگ ءِ سکین ءُ جزبگ ءَ گیش مھکم کنان اِنت، مروچی اُستاد ءِ توتی ئیں توار ءَ ھمک چُک ءُ چوریگ ءُ کسان، مزن، پیر، ورنا آگاہ کُتگ اَنت ءُ پدریچ پہ پدریچ اے توار یک گلامیں راجے ءَ آجوئی ءِ کشک ءَ پیشدار اِیت ءُ دلانی تہ ءَ آشوبے رُدان بیت۔ مروچی کہ اُستاد ءِ شھدیں توار ءَ ھمک کوہ ءُ گیاب، درچک ، شانتل ءُ کپوتانی تہ ءَ گوں ھم توار اِنت، اُستاد ءِ راجی جھد ءُ کُربانی یک مزنیں شرپے پہ ما کہ اُستاد ءَ یک جوانیں کردے پہ راج ءَ پیلو کُرتگ ءُ وت ءَ راجی جھد ءِ تہ ءَ منینّتگ۔ اُستاد ءِ شیرکنیں توار ءَ سرجمیں بلوچستان زیبا کُرتگ، اُستاد تمرد ءُ باھڑیں ھمبلے یک مھروانیں انسانے، یک شوکیں ھستی ئیں کہ مدام مارا زندگ بوگ ءِ سکین ءَ گوں وتی توار ءِ شیرکنی ءَ دیگ ءَ اِنت۔ اُستاد ءِ ھمک توارانی تہ ءَ یک جُتائیں کیپ ءُ چاڑے ھوار اِنت کہ اگاں تو بہ چاڑ بہ بہ ئے گُڑا اُستاد ءِ زیبائیں توار ءِ گوش بدار ءُ بے چاڑی ھلاس بیت ءُ دل جیڑگ ءَ پرما اِیت کہ جھد ءُ سپر ھمیش اِنت کہ اُستاد ءِ توار اِنت۔ ھمک راج وتی راجی گشندھاں پہ شرپ چار اِیت ما وتی اُستاد ءَ ھم پہ شرپ چارین ءُ اُستاد مئے راج ءِ یک مڈی یے ءُ مئے توکل ءُ جزبگ اِنت۔ مئے سکین ءُ رھشون اِنت، مئے سنگت اِنت، جھدکار اِنت، سرجمیں بلوچ ءِ توار اِنت ءُ توار اِنت۔۔۔