ماما بے تو کیمپ ابیتک اِنت

نبشتہ کار: کامریڈ کازی

ماما من ترا 2020 ءَ ماں کراچی ءَ لمہ بانک کریمہ ءِ شھیدی ءِ درگت ءَ زھرشانی ءَ دیست کہ ما شما ھوری ءَ چہ کراچی آرٹ کونسل ءَ بہ گر داں کراچی پریس کلب ءَ یک مزنیں روانکے ءِ دروشم ءَ شُت اِیں۔ پد ءَ درستاں ساری تو وتی ھیال ، یات ءُ درد بانک ءِ بابت ءَ درشان کُرت اَنت، انگت من ءَ یات اِنت کہ تو گْوشت: ”یک رَندے ما ءُ لمہ کریمہ ھوری ءَ یک روانکے کش اِتگ، پد ءَ ھمیشی ءِ سر ءَ سرکار ءَ تیرگاری کتگ ءُ مئے بازیں ھمراھے ٹپّیگ بوتگ۔“
تو لانگ مارچ ءِ کسّہ ھم آؤرت اَنت کہ شمارا سرکار ءَ بیھار داتگ ءُ پروش دیگ لوٹ اِتگ، بلے شما انگت وتی زمہ واریاں چہ دزکش نہ بوتگ اِت۔آ روچ ءَ مارا چہ لمہ جتا بوتگ، بلے مرچی ماما ھم ھمے روچ ءَ۔ منی ءُ ماما ءِ ھما اولی ءُ گُڈّی دیدار اَت، پد ءَ ماما من بس ماں رسانکدر ءَ دیست، بلے دیم پہ دیم نہ دیست۔ ماما شال ءَ اَت، بلے من ماں دگہ جاگھے ءَ اِت آں۔ من باز جھد کرت کہ گوں ماما ءَ بہ ملان، بلے وھد ءَ موہ نہ دات۔ وھدے کہ من 20 دسمبر ءَ ماں پیس بک ءَ چار اِت کہ VBMP ءِ سرکماش واجہ نسراللہ ءُ بانک ھوران ءَ وتی وتی درشانانی تہ ءَ تئی جتائی ءِ ھبر راست کتگ اَت۔

من ھمے پھم اِت ءُ دل ءَ گْوشت اے ھبر دروگے بات، بلے نسراللہ ءُ ھوران ءَ ھوار دگہ مزنیں مزنیں نیوزانی ھیڈ لائن ءَ تئی جتائی ءِ ھبر شنگ اَت۔ من گوں ناوشیں دل ءَ تئی جتائی ءِ تھلیں راستی منّ اِت، بلے دل سک پدرد بوت کہ انگت تئی ھواری ءَ کوم ءَ را باز کار کنگی اَت۔ انگت ھما بیگوائیں بچانی مات ءُ پت دلبڈّی دیگی اِت اَنت، بلے باریں ماما پرچا چو زوت اِشتاپی کُت۔ ماما ترا من ھمے گْوشگ لوٹاں کہ انگت ھما لانگ مارچ پش کپتگ تو آئی جار جتگ اَت، اگاں آ بہ بیت بلے بے تو۔۔۔۔۔

ماما تئی روگ ءَ پد شال ءِ دمک ءُ درانی رژنائی شُتگ، ماما مدام میڈیا ءَ تئی پریس کانپرنس، تئی کلوہ ءُ تئی درشان، بلے مرچی نیست اَنت۔ ھما شُدکشّیں کیمپ مرچی ایبیتک اِبت، من مرچی گوں نسراللہ ءُ بانک ھوران، دگہ یک کھولے ءَ نشتگاں، بلے من چار اِت کہ تئی جاگہ ھورک اِنت۔ ھما دردیگیں کیمپ، آہ ءُ زاری ئیں کیمپ تئی نندگ ءَ رُوژنا اَت، بلے مرچی چار اِت ھما کیمپ پُرسیگ اَت۔ ماما تئی کمی مارا مدام گیر کئیت، بس ھمے گْوشاں تئی ارواہ آسودگ بات۔