نبشتہ کار: مھلب ھسین بلوچ
باید اِنت ما بلوچ راج ءِ زالبول راجی سرمچار ءُ رھشون بانُک کریمہ بلوچ ءَ بِہ وان اِیں، بہ زان ایں ءُ راج ءَ سرپدی بہ دے اِیں کہ کریمہ کے بوتگ؟ بانُک کریمہ راجی رھشون ءُ مرچیگیں بلوچ راجی آجوئی جُھد ءِ یک بلاھیں سرمچارے بوتگ۔ بانُک شھید کریمہ بلوچ یک راجدوست ءُ زبان دوستیں پیرزالے بوتگ، وتی بزگیں راج ءُ سرڈگار ءِ شیدایے بوتگ۔ مارا یات بہ بیت کہ ساری ءَ بلوچ راجی آجوئی جنگ نواب ءُ سردارانی دست ءَ بوتگ۔ وھدیکہ شھید کریمہ بلوچ بلوچ نودربری گل بی ایس او ءِ سرکماش بوتگ گُڑا کریمہ بلوچ ءَ بلوچ چاگرد ءِ تہ ءَ بلوچ راجدوستی، گُلامی ءِ ھلاپ ءَ نپرت ءُ آجوئی جنگ ءِ بابت ءَ آگاھی ءُ سرپدی ودی کُتگ۔ چہ زھرشانی، زرمبش ءُ وتی گُشتانکانی برکت ءَ وتی راج ءِ ورناھیں بْرات ءُ گْوھار ھم اِے راجی جنگ ءَ ھوار ئِے کنائینتگ پمیشکا مرچاں ما گِند ایں بلوچ راجی آجوئی ءِ جنگ ورناھیں بلوچ بْرات ءُ گْوھارانی دست ءَ اِنت۔ مرچی راجی آجوئی جنگ ءِ سرکماش سردار ءُ نواب نہ اَنت، بلکیں لس وانِندھیں بلوچ برات ءُ گْوھار اَنت۔
شھید بانُک کریمہ بلوچ میان اوستمانی چاگرد ءَ بلوچ راج ءِ توارے اَت کہ مُدام راجی آجوئی ءِ واستا گپ ئِے کُتگ۔ دُنیا ءِ مُلکاں گْوشتگ ئِے بلوچ یک جُتائیں راج ءُ سرڈگارے ءِ واھُند اِنت۔ بلوچ پہ وتی زبان، راج ءِ وشھالی ءُ وتواجھی ءَ راجی آجوئی لوٹ ایت۔ بانُک کریمہ بلوچ ءَ وتی جھد ءَ بلوچ زالبولاں ھم ھمے درس ءُ دلبڈّی دات کہ بلوچ یک آزات ھیالیں راجے، باید اِنت بلوچ زالبول ھم آجوئی جنگ ءَ وتی بْراتانی ھمراہ ءُ ھمدست بہ بنت۔
اگاں کسّے بلوچ راجدپتر ءَ چمشانکے بہ دنت گڑا آئی ءَ کریمہ وڑیں زالبولانی مزنیں کردے دیم ءَ کئیت۔ گِند ئے ھمے زالبول راجی آجوئی جنگ ءَ گوں وتی براتیں سرمچاراں ھمکوپگ ءُ ھمگام اَنت۔ ما دلجم ایں بلوچ راج یک روچے الم آجو بیت۔ کریمہ پد ءَ یک بھادریں سپاھی یے ءِ دْروشم ءَ واتر کنت۔
شالا بلوچ راج وت ماں وت تپاک ءُ یکمُشت بات۔ بلوچستان آزات ءُ آزات ھیال ءُ راجمستریں(جمھوری) بلوچستان دیمروئی بہ کنات۔
ارواہ آسودگ بات گودی کریمہ بلوچ۔
