نبشتہ کار: مریم یادگاری
بلوچ ءُ بلوچستان ءِ نام ھر وھد ءَ کہ چہ دپ ءَ در کئیت گڑا ھزاراں جیڑگ، واری ءُ بزگی گوں ھیالاں ھمگرنچ بیت۔ بلوچ زھگ چہ کسانی ءَ بزگی ءُ واری ءِ آماچ اِنت، سرجمیں آسیا (جغرافیہ) ءِ تہ ءَ یکیں چہ مستریں زمینانی ھساب ءَ شمار کنگ بیت چہ بندر اباس ءِ تک ءُ پھناتاں بہ گر تاں کرمان ءُ بلوچستان ءَ دانکہ کراچی ءُ سِند ءِ سیمسراں دانکہ اوگانستان ءُ نیمروز ءَ بروت بزانکہ ایران ءُ پاکستان ءُ اوگستان ءِ ھر سئیں کشواراں بلوچ آباد اَنت، ھر سئیں جاگھاں بلوچ ءِ زمین بُرّ ءُ بین کرتگ۔
بلے! ھر جاگہ ءَ کہ بہ چاریں بلوچ بزگ ءُ واری ءِ آماچ اِنت، بلوچ ءِ زمین ءِ سر ءِ سھر ءُ تلاہ، دگہ ھزاراں مادن ءُ مڈی در آیگ ءَ اِنت بلے بلوچ پہ ھشکیں نان ءِ چنڈے ءَ مھتاج اِنت۔ بلوچ ءِ زھگانی گُد ءُ چوٹ، چمپل ائیدانی سر ءَ ھم نوک بہ بنت من بلوچستان سرجم ءَ نہ دیستگ، بلے کدی کدی کوہ ء سلیمان ءِ تامراں چاراں کہ کسان کسانیں زھگانی گُد دِرتگ اَنت، چمپل اش پاد ءَ نیست۔ ھزاراں درد ءُ ارمان اے کسانیں زھگانی بالاد ءَ کل اَنت، مردم کجام گپ ءَ بہ کنت ھمے وڑ ءَ بلوچ ءِ وانگ ءُ زانگ، نودربریں زھگ چنت کلومیتر پہ ھزار بد بھتی گازائیل کشیں گاڑیاں درنگ بنت ءُ پہ وانگ ءَ رو اَنت مات ءُ پت ھزار بزگی ءُ واری وتی زھگاں وانین اَنت۔
ھمے وڑ ءَ بلوچ ءِ زھگ ھرچ پڑ ءَ درس بہ وان ایت، بلے پد ءَ ھم بزگی ءِ سر ءَ اِنت پرچا کہ اے دولت ءِ ھساب ءَ ناں کار ءُ روزگارے ناں کہ شرکت ءُ سنئتی اگاں بہ بیت باید اِنت ھزار دانگ پارتی ءُ رشپہ بہ بیت تاں یکے بروت سرکار ءَ گیشتریں بلوچ وانندہ پہ گازئیل کشی ءُ تیل کشی ءَ چہ باڈر ءُ مرزاں یا اگاں جنک زھگے وانندھے بہ بیت گڑا ھمے راج ءِ مردم گْوش اَنت کہ پلانی ءِ جنک ءَ بس اِنت ونتگ بے کار اِنت لوگ ءَ نشتگ البت ءَ چہ گوستگیں سالاں انگت کمو گھتر بوتگ پرچا کہ مردم ءِ مجگاں پچتر بیتگ اَنت مردم وتی جنک زھگاں پہ وانگ ءَ روان دیگ ءَ انت۔
بلے مئے بلوچانی نزوری ءُ مشکل ایش اِنت کہ مارا وتی سر ءَ وت سک زھر کیت نہ لوٹ ایں کہ مئے براتے گْوھارے دیم ءَ بروت بید ء چہ ایشی ءَ کہ کسے آئی ءَ ایر بہ جنت ما وت زور ایر جن اِیں پمیشکا اوں کسے دل پہ بلوچ راج ءَ نہ سُچ ایت اگاں وتی کش ءُ گوراں بہ چاریں اگاں یک گجرے بروت سرکار دہ نپر دگہ کار ایت وتی کش ءُ گوراں بلے بلوچ چش نہ اِنت اگاں یک بلوچے سرکار بہ بیت گڑا چہ وتی بزگیں راج ءَ بے ھیال بیت ھمے بلوچ پہ درآمداں گیشتر مھرانتر اِنت بلے وتی راج ءِ درد ءَ نہ وارت اے درست مئے نزوری اَنت ءُ مئے کم دیدی اَنت ما باید وت وتی دیمروی ءَ برجم بدار اِیں وت وتی ملک ءَ گوں ھشر ءُ کمک آباد بہ کنیں بلے بژن ءِ گپ ایش اِنت کہ ما وت ءَ اسلاہ کرت نہ کن ایں بس مارا بل اَنت پہ وتی ایر جنگ ءَ کہ مئے مستریں دژمن اِنت بہ کول ء شھزانت ء بلوچستان واجہ ابداللہ پیشنی ئیگ ءَ۔
من نہ نالاں چہ دست ءِ ڈنیگاں
ٹپ من ءَ مان اِنت کہ از وتی کاٹار
سنگ ءُ شیشگ چہ دائم سیاد اَنت
پروشتگ ءُ سنگ ءَ شیشگ ءِ آبدار
آس ھمے دکان ءِ چراگ ئیگ اَنت
سوتکگ ئِے واھند ءِ وتی امبار
مرچی آ دگہ راجاں بہ چاریں وتی دیمروی ءِ ھاتر ءَ چے چے کنگ ءَ نہ اَنت مرچی اگاں ما اوگاناں بہ چار ایں کہ بزگ ءُ جنگ زدگیں راجے بلے دنیا ءَ مرچی دست دپ ءَ داتگ ئِے ھمے وڑ ءَ دگہ بزگیں راج ھست اَنت بلے وتی راج ءَ گوں وتی مردماں گوں ھم سنت ءُ ھمدست اَنت من بس ھمے گوشاں ما ءُ شما دْرست بلوچ بات ایں، ءُ یکے ءُ دومی ءِ ساہ ءُ جان، ارواہ بات ایں۔
