بلوچ ھستانک ءِ ابدمانیں کارست

نبشتہ کار: کمبر بلوچ

رجانکار:ِ نوھان بلوچ

دوھزار ءِ دھک ءَ چست بوتگیں بلوچ جنز مروچی ھم گوں ترندی ءَ یکشل ءَ برجاہ اِنت۔ دنیا ءِ تہ ءَ چست بوتگیں جتا جتائیں جنزانی سر ءَ جنگی پریسکارانی ریس ءُ پریس ءَ پد آھانی دیم ءَ یک آھیں شے یے ایش گندگ بیت کہ جنگانی دراج کشی جنگی مردمانی مجگانی سر ءَ ھرابیں سان دور دنت (جنگ ءَ چہ دزکشی، بیزاری ءُ ایندگہ مجگی نادْراھیانی آماچ بوگ ءِ سبب جوڑ بنت) دژمن ءِ مدام کوشست ھمے بیت کہ تئی مُچانکی سما ءُ جزبگانی سر ءَ ارش بہ کنت پمے ھاتر ءَ دژمن مدام جُنزانی سرھیل بزانکہ آیانی مجگاں وتی نشانگ جوڑ کنت۔ بانک کریمہ بلوچ ءِ شھید کنگ ءَ دژمن ءَ ناں ایوک ءَ مارا چہ مئے راجی رھشونے ءَ زِبھر  کت، بلکیں مئے راجی سما ءُ بودشت ءِ سر ءَ ھم اُرش کت۔ 

دُگنیا ءِ تہ ءَ اگاں ما مُلکاری جیڑھانی سر ءَ باوست بہ کن اِیں گڑا ازرائیل ءِ جیڑہ گوں ھِزب اُللا ءَ اِنت بلے آئی مستریں نشانگ ھسن نسرُللہ اَت، پرچا کہ آ جُنز ءِ ارواہ اَت۔ ھمے وڑ پلستین (فلسطین) ءِ تہ ءَ ازرائیل ءِ دست ءَ کُشگ بیتگیں یھیا سنوار (یحیی سنوار) ءِ کُوش ءِ پُژدر ھم ھمیش انت کہ سنوار میانی گزہ (غزہ) ءَ پہ پلستین (فلسطین) ءَ یک رھشونے ءِ کرد ءَ پیلو کنگ ءَ اَت، ازرائیل چہ آئی ءِ کردار ءَ باسما اَت،  چرائی ءَ بیم آماچ ات۔ پہ دژمن ءَ جُنزانی سرھیلیں سروک ءُ رھشون مدام مستریں نشانگ بنت۔

 پاکستانی کبزہ ءِ ھلاپ ءَ 1948 ءَ آگا ابدُالکریم (آغا ابدُالکریم) ءِ سروکی ءَ پاد اتکگیں بلوچ جنز ءَ  1962 ءَ بابو شیرو مری ءِ سروکی ءَ یک مھکمیں دروشمے  زرت ءُ 1973 ءَ گَلؔ ءُ پارٹیانی ارزشت ءُ آھانی زرورت ءِ ھیال بلوچ جنز ءِ بنپدانی مھکمی ءِ مانزمان جوڑ بوت۔ چہ ھما دؤر ءُ باریگ ءَ داں مروچی بلوچ جنز  بازیں کُتہ کاری ءُ تجربھاں دوھزار ءِ دھک ءَ کاملیں ءُ پُرآشوبیں گوناپے زرت۔ بلوچ راجی جُنز ءِ تہ ءَ وھدے زالبولانی کرد ءِ سر ءَ باوست ءُ تْران بیت گڑا اولی کردار بانک کریمہ اِنت کہ سھرا بیت، بانک ءَ پیش ھم زالبول بلوچ جھد ءِ بھر  بوتگ اَنت چوشکہ 70 ءِ زمانگ ءَ بلوچ زالبول ھمے دیناں شھید کنگ بوتگ اَنت، شھرانی نیادی جاھاں بھا کنگ بوتگ انت بلے ھمے جنز بانک کریمہ بلوچ ءَ یک نوکیں دروشم ءُ گوناپے  داتگ ءُ دنیا ءِ دیم سھرا کتگ۔

بانک کریمہ ءَ بلوچ نودربر گل (بی ایس او) ءِ پلیٹ پارم ءَ چہ راجکاری ءَ بھر زرت ءُ دوھزار پنچ ءِ سال ءَ بی ایس او ءِ جنکانی بھرگ تمپ ھنکین ءِ سرکماش گچین کنگ بوت، آ وھد ءَ راجی جُنز ءِ تہ ءَ زالبولانی بھر زورگ پہ بلوچ چاگرد ءَ سرجم ءَ نوکیں گپّے اَت ءُ ایش شرپ بانک ءِ بھر ءَ کپت۔

دوھزار شش ءَ بانک بی ایس او آزاد ءِ بنجائی مجلس ءِ باسک گچین کنگ بیت، اے ھمے زمانگ اِنت کہ بانک  بلوچ زالبولانی تہ ءَ اولی سانمندیں (اثرمندیں) زالبول اِنت چاگرد ءِ پوچکیں رھبند آئی دیم  ءَ اڑاند بیت، بلے بانک ءِ وڑیں آشوبی مردمے چشیں اڑاندانی سرگوز کنگ زانت ءُ ھمے مادنیں کشک ءَ وتی مجتی ھمراہ لیک ایت۔ نواب اکبر ھان بگٹی ءِ شھادت ءَ پد بلوچ نودربر سیاست ءِ چیردستی ءَ بانک ءَ راجی آجوئی جنز ءِ پیگام بلوچستان ءِ ھمک کوچگ ءُ گیاباناں بگر داں شھر ءُ بازاراں برت ءُ سر کت ءُ بلوچ زرمبش یک جتائیں دروشمے بکشات کہ چرائی ءَ پد بلوچ زالبولانی مزنیں بھرے جنز ءِ بھر بوان بوت ءُ زالبولانی بھر زورگ ءَ گوں بلوچ راجی آجوئی جنز توانگر تر بوت۔ وھدے استان ءِ زُلم ءُ زوراکیانی درچ ءِ تہ ءَ تُرندی گیش بوان بوت بازیں زالبول آجوئی جنز ءِ مُلکاری کاروان ءِ ھمرائی ءَ چہ گستا بوان بنت۔ بلے بانک کریمہ دژمن ءِ دیم ءَ چوں مھکمیں کوہ ءَ اُوشت اِیت۔ 

دوھزار ھشت ءَ بی ایس او ءِ شال ءَ برجم داشتگیں کونسل سیشن ءَ بانک جونیئر وائس چئیرمین گچین کنگ بیت۔ دوھزار نوہ تاں دوھزار دوازدہ پہ بلوچ زرمبشت ءِ گْوستانک (تاریخ) ءَ نگیگ تریں جاور لیکگ بنت کہ دژمن ءَ بلوچ راج ءِ دْراھیں پڑاں چہ سیادی داروکیں مھلوک وتی زُلم ءُ زوراکیانی نشانگ جوڑ کتگ اَت۔بی ایس او آزاد ءِ گوستگیں چیئرمین سنگت سناء دژمن ءِ دست ءَ زورانسری آوارجنی ءَ پد شھید کنگ بیت ءُ وائس چیئرمین زاکر مجید زورانسری بیگواہ کنگ بیت ھمے جاورانی نگیگی ءِ سبب ءَ  چیئرمین بشیر زیب ءَ یاگی بوَگ کپ اِیت۔اے نگیگیں وھد ءِ تہ ءَ راجکاری چست ءُ ایرانی سر ءَ سرجم ءَ بندش ءُ گَل ءِ دْراھیں رھشون ءُ باسک نگیگیں جاورانی دیمپان بنت بلے ھمے ساھتاں بانک کریمہ ءِ کمنٹمنٹ نا کور دیدیں چاگرد ءَ نزور کُت نئیکہ اِستان ءِ ناروائیاں آئی گام  داشت کُرت اَنت۔

روانک ءُ زھرشانی بہ بنت یا بی ایس او ءِ چیریں مجلس ، شال ءَ بگر تاں کراچی ، جھالاوان تاں جیونی بانک ءَ بلوچستان ءِ مُلکاری چست ءُ ایرانی درچ یکشل ءَ جُنزینان کت اَنت ءُ بلوچ راجی زرمبشت ءِ کاروان توان بکشان کت ءُ دوھزار دوازدہ ءِ کونسل سیشن ءَ بانک بی ایس او آزاد ءِ وائس چیئرپرسن گچین کنگ بوت۔

بلوچستان ءِ نگیگیں جاوراں کہ اِستان بلوچ سروکانی زورانسری آوارجنی ءُ ژانگولیں جوناں کوہ ءُ ویرانگاں دور دیان ات(زورانسری آوارجنی ءُ مزنیں کچے ءَ  بلوچانی کُوش انگت برجاہ انت) ءُ بلوچ راجی آجوئی جُنز تہ او توکی دگریاں (اندرونی اختلاف ) ءُ ھمیشانی سبب ءَ وت ما وتی گِر ءُ چیلاں سر چست کتگ اَت کہ ایش پہ بلوچ راجی زرمبشت ءَ مزنیں تاوانے زانگ بیت اَنت۔ 

دوھزار سینزدہ ءَ بی ایس او آزاد ءِ بنجائی جنرل سیکرٹری رزا جھانگیر ءُ بی این ایم ءِ رھشون امداد بجیر استان ءَ کیچ ءَ شھید کت اَنت ءُ  مارچ دوھزار چاردہ  ءَ چیئرمین زاھد بلوچ زورانسری آوار جنگ بیت۔  بی ایس او آزاد ءِ گْوستانک (تاریخ) ءِ تہ ءَ اے گرانتریں ساھت بنت یکے بی ایس او  دژمن ءِ زلم ءُ  زوراکیانی آماچ بیت دومی آئی تہ ءَ وت ما وتی دگریانی (اختلافات) سوب ءَ گل ءِ سنگت دزکش بوان بنت بلے ھمے پیمیں گرانیں جاورانی تہ ءَ ھم بانک کریمہ ءَ گوں مھکمی ءَ تیوگیں جنجال ءُ جاورانی دیم داشت گوں سنگینی ءَ بی ایس او دیم ءَ جُنزینت ءُ دوھزار پانزدہ ءِ کونسل سیشن  بی ایس او ءِ گْوستانکی (تاریخی) سیشنے اَت کہ ھمے سیشن ءِ تہ ءَ بلوچ نودربر سیاست ءِ گْوستانک (تاریخ) ءَ اولی رند ءَ زالبولیں سروکے ( چئیرپرسن) گچین کنگ بوت۔

سیشن ءَ پد بانک کہ وھدے چیئرپرسن گچین کنگ بوت، اے دؤر ءَ کشت ءُ کوش، زورآنسری بیگواھی، سیاست ءِ سر ءَ سرکار ءِ بندش ءُ زوراکی روچ پہ روچ ودّان اَت اے میان ءَ بی ایس او ءِ بنجاھی پتر ءِ کوشست ھمیش اَت کہ بلوچانی جاور ءُ بلوچستان ءِ راستی ءَ میان اُستمانی تَک ءَ آژنا بہ کن اَنت ءُ ھمے بنگپ ءِ سر ءَ دَری راجانی تہ ءَ سرپدی ءُ باوستے چست بہ کن اَنت ھمے رِد ءَ بی ایس او ءِ گور ءَ سوڑگ ھمیش اَت بانک دیم پہ کینیڈا ءَ سپر بہ کنت بانک ءِ ما ڈری ڈیھاں سپر کنگ ءَ پد بلوچستان ءِ تہ ءَ سیاست سُستی ءِ آماچ بوت کہ روچ ء مروچی آئی مٹ آئی سان گندگ بنت۔ ایش پیسلہ ناں پہ گل ءَ ءُ نئیکہ پہ جنز ءَ سیتمند زانگ بوت۔ بانک ءَ دوھزار پانزدہ ءَ بگر تاں دوھزار ھژدہ ءَ ما درانڈیھاں وتی زمہ واری جوانیں وڑے ءَ پیلو کرت انت۔ مروچی بلوچ راجی زرمبش ءِ تہ ءَ زالبولانی ھوار بوگ ءُ جتائیں پڑاں وتی زمہ واریانی پیلو کنگ ءَ بانک کریمہ بلوچ ءِ مزنیں کردے کہ آئی ءَ بلوچ چاگرد ءُ دگنیا ءَ اے بروسہ دات کہ بلوچ زالبول مُلکاری ءُ چاگردی زند ءِ ھمک تک ءَ وتی کرد ءَ یک وڑ ءَ پیلو کت کن انت مرچی شاری بلوچ ءِ دروشم ءَ بلوچ زالبولاں اے زرمبش نوک ءُ جتائیں دگے پِرینتگ۔

بانک کریمہ وھدے بلوچستان ءَ مُلکاری چست ءُ ایراں پہ جھد کنگ ءَ ات گڑا استان ءِ پاتراپ ءُ بیھار لوگانی سر ءَ بیڑ برگ آئی کھول ءِ زورانسری آوارجنی ءُ شھید کنگ ءِ وسیلہ ءَ آئی ءَ چہ جنز ءَ دور دارگ ءِ کوشست کت بلے آئی ءَ مدام  دژمن ءِ ھمک وڑیں مکر ءُ پندلانی دیم گوں دلیری ءَ داشت ءُ وتی زمہ واریانی دیم ءَ ھچ چوشیں شے یے آیگ ءَ نیشت کہ آئی ءَ نزور بہ کنت وھدے آئی ءَ ما دری ڈیھاں پہ انسانی اُگبالانی ھاتر ءَ توار چست کنگ بندات کت گڑا استان ءَ ھمود ءَ ھم وتی ھیلہ ءُ ھُنر ساز ات انت ءُ پاتراپ دیگ ءِ کوشست کت بلے بانک ءَ وتی راہ گچین کتگ ات آئی ءَ وتی سرجمیں زند پہ بلوچ زرمبشت ءِ ھاتر ءَ کربان کتگ ات۔آ گوں بی این ایم ءَ ھوار بوتگ ات ءُ آئی ءَ میان استمانی راجانی پتر ءَ بلوچ راج ءِ جھگیری کنگی ات بلے اشی پیش  ما کینیڈا ءَ آ شھید کنگ بوت۔

دگنیا ءِ تہ ءَ نا ایوک ءَ پاکستان بلکیں ھمک زورگیریں اِستان ءُ آیانی واکدار ما دری ڈیھاں وتی نہ منؔوک ءُ راہ ءِ دیم ءِ اڑاندانی کُشگ ءُ گار کنگ ءَ جتا جتائیں راہ ءُ در شوھاز انت دانکہ آیانی جنز ءَ پروش دات بہ کن اَنت ءُ آھانی جنز ءِ توانائیں تواراں ھاموش بہ کن اَنت۔ 

شست ءِ دھک ءَ ازرائیل ءَ دری ڈیھاں پلستینی رھشونانی کُشگ ءُ گار کنگ ءَ پہ وتی چیریں ٹولی (اسکواڈ) جوڑ کرت ءُ ما یورپی ڈیھانی مزنیں شھراں پی ایل او ءِ سروکانی کشگ ءَ ھوار بوت انت ھمے وڑ ءَ ترکی ھم جتائیں ڈیھاں کُرد رھشوناں نشانگ کنگ ءَ اِنت ءُ اربستان (سعودی عرب) ءَ جمال خشوگی ما ترکی ءِ زمین ءَ وتی سپارتھانہ (سفارتخانہ) ءِ تہ کُشت (ھمے وڑ چہ ترکی ءَ گلزار امام ءِ زورانسری بیگوائی ھم پہ زرمبش ءِ سروکاں جیڑگی ھبرے بہ بیت کہ دژمن چے وڑ ارزانی ءَ تئی مزنیں سرانی رندگیری کنگ ءَ سوبین بیتگ)

ایران ، روس، یورپی ڈیھ، رودرتکی کوریا، ءُ امریکہ ءَ ما دری ڈیھاں وتی نہ منوک ءُ راہ ءِ دیم ءَ اڑاند بوتگیں سر زھر داتگ ءُ جتائیں دروشماں کُشتگ انت۔ آرپ بارکزئی ،استاد اسلم بلوچ، ساجد ھُسین، بانک کریمہ، انجینئر ابدلرزاک ءُ مگربی بلوچستان ءُ اوگانستان ءَ بلوچ جھدکارانی شھادت ھمے شوربندیانی بھر اِنت کہ آ بلوچ زرمبشت ءَ گوں بندوکیں جھدکار بوتگ اَنت ءُ دژمن چہ آیاں بیم آماچ بیتگ۔

بلوچ رھشونانی ما دری ڈیھاں نشانگ کنگ ءَ دژمن ھمے پیش دارگ لوٹ اِیت کہ آ تاگتور انت ءُ ھر کج ءَ کہ آ بہ لوٹ اِیت راجی زرمبشت ءَ گوں بندوکیں سروکاں نشانگ کت کنت دانکہ آ وتی سان ءَ بلوچ راج ءِ مُچانکی سما ءُ مجگانی سر ءَ چگل دات بہ کنت ءُ مردمانی مجگانی تہ ءَ ھمے گپ ءَ ایر کت بہ کنت کہ آ گوں یک تاگتوریں ریاستے ءَ مڑ ات کت نہ کن اَنت۔ بلے راجدپتر گواہ انت کہ تاگتور ءُ زورگیر چکندر ھم زوراک ءُ زورآور بہ بنت بلے ایردستیں راجانی نہ اوشتوکیں جھد ءِ دیم ءَ آ باج بر نہ بنت آیانی بھت ءَ ایوک ءَ ناکامی بیت۔ وھدے کہ بانک کریمہءِ میّت ماں بلوچستان ءَ سر بیت گڑا اِستان ءِ بیم آماچی ءِ یک چھرے سھرا بیت کہ استان لس بلوچ ءِ دیم ءَ چنچو ترس آماچ ءُ بے وس ءُ لاچار ات(اگست دو ھزار شش ءَ نواب اکبر ھان بگٹی ءِ میّت ءَ گوں ھم ھمے وڑ کنگ بوتگ ات)

اے ھم یک منّ اِتگیں راستی یے کہ وھدے تئی گور ءَ دژمن ءِ شوربندیانی ھلاپ ءَ یک مھکمیں ءُ گشینتگیں سیاسی ءُ جنگی ترزکارے نہ بوت ءُ جھد ءِ تہ ءَ شوربندیانی ڈکال بہ بیت ءُ وھد ءِ ھمراھی ءَ رھبندانی تہ ءَ مٹؔی آرگ نہ بوت گڑا دژمن زرمبش ءِ سروکاں وتی نشانگ جوڑ کنگ ءَ سوبین بیت ءُ راجی جنز ءَ نزور کنت۔