نبشتہ کار: رھچار بلوچ
زبان ءِ مرگ ءِ بزانت ایش اِنت کہ آ زبان میزان میزان ءَ ھلاس بیت ءُ پد ءَ آ زبان ءَ کس ھبر نہ کنت ءُ نہ پھم اِیت یا کہ آیوکیں پدریچ ءَ وانینگ نہ بیت۔ وھدیکہ مردم وتی ماتی زبان ءَ گپ کنگ ءَ شرم کن اَنت ءُ دگرانی زبان ءَ شرتر ءُ جْوانتریں زبان پھم اَنت، گڑا آ وتی زبان ءَ یلہ دے اَنت ھمے دری زباناں ھبر کن اَنت گڑا میزان میزان ءَ وتی ماتی زبان ءَ مرگ ءِ آماچ کن اَنت۔
آیوکیں پدریچ ءَ وانینگ مہ بیت، وھدیکہ ھما زبان ءِ گپ جنوک وتی پدریچ ءَ وتی زبان ءَ مہ وانین اَنت گڑا آ زبان مرگ ءِ آماچ بوت کنت۔ اِلم ءُ رسانکدر ءِ تہ ءَ جاگہ دیگ مہ بیت۔ وھدیکہ یک زبانے ماں وانگجاھاں، رسانکدر ءُ وتگش(ریڈیو) وتگند(ٹی وی) ایشانی تہ ءَ ڈالچار کنگ بہ بیت گڑا آ زبان پشت کپ اِیت، گڑا آ زبان ءِ گپ جنوک دگہ زباناں ھبر کنگ بنا کن اَنت۔ وھدیکہ مردم وتی ھلک ءُ میتگاں یلہ کن اَنت، انچوش کہ باز مردم وتی ملک ءُ وتی جاگھاں یلہ کن اَنت دری ڈیھاں رو اَنت اُود ءَ آ وتی زبان ءَ یلہ کن اَنت ھما درملکی زبان ءَ ھبر کنگ بنا کنت وتی زبان ءَ ارزشت نہ دے اَنت اِے وڑ ءَ زبان ءَ مرگ ءِ آماچ کن اَنت۔
ریاست زبان ءَ ارزشت مہ دنت، وھدیکہ یک زبانے ءَ ریاست ارزشت مہ دنت آ زبان ءِ پھازگ ءِ جھد مہ کنت گڑا آ زبان میزان میزان ءَ مرگ ءِ آماچ بیت۔ انچوش کہ مئے بلوچی زبان ءُ بلوچ یک گلامیں راجے، بلوچ ءِ دژمن اِے نہ لوٹ اِیت بلوچی زبان ءِ نام ماں گیدی ءِ تہ ءَ پشت بہ کپ ایت۔ ریاست ءَ مرچی مئے بلوچی زبان ارزشت نہ داتگ ءُ ناں کہ وانگجاھاں وانینگ بیت ناں کہ دگہ وسیلگے ھست۔
زبان ءِ مرگ تھنا گالانی ھلاس بوگ نہ اِنت۔ وھدیکہ یک زبانے مر ایت یک راجے ءِ دود ءُ ربیدگ، راجدپتر، آ راج ءِ شان ءُ پجّار درست مر اَنت ءُ گار بنت آ راج ءِ جند ھم گار بیت، پرچا کہ زبان ماں راجانی زندگ دارگ ءِ واستا یک مزنیں درے۔
بلوچی زبان، بلوچی یک گلامیں راجے بلوچ ءِ دژمن ءِ واھگ ھمیش اِنت کہ بلوچی زبان ماں گار ءُ بیگواہ بہ بیت بلوچ ءِ دژمن لوٹ ایت بلوچی زبان ماں گیدی ءِ تہ ءَ آئی ءِ نام ءُ نشان گار بہ بیت پرچا کہ زبان راجانی روتگ اَنت۔ انچوش کہ یک درچکے ءِ روتگاں بہ سند ئے آ درچک مر ایت، ھمے وڑ اگاں راجے ءِ زبان ءَ گار بہ کن ئے آ راج ھم مر ایت۔ اگاں مرچی بلوچ راج وتی زبان ءَ مہ وان اِیت وتی زبان ءِ سر ءَ جھد مہ کنت، وتی زبان ءِ پھازگ ءِ جھد ءَ مہ کنت گڑا بزانکہ بلوچ وت وتی دژمن ءِ واباں سرجم کنگ ءِ جھد ءَ اِنت۔ پرچا کہ بلوچ دژمن ءِ لوٹ ھمیش اِنت کہ بلوچ ماں وتی زبان ءَ مہ وان ایت ءُ نبشتہ مہ کنت، بلوچی زبان ءِ وانگ ءُ زانگ بلوچی زبان ءِ سر ءَ جھد کنگ اِے ھرچ یک بلوچے ءِ زمہ واری اِنت، آ وت بلوچی بہ وان ایت وتی زبان ءِ سر ءَ جھد بہ کنت۔ وتی زبان ءِ زندگ دارگ ءِ جھد ءَ بہ کنت ءُ وتی زبان ءَ ماں گیدی ءَ نامدار بہ کنت۔
شالا بلوچی زبان دیمروئی کنات ماں دنیا ءِ تہ ءَ، یک نامداریں زبانے بات۔
بلوچستان آجو ءُ بلوچ وتواجھیں راجے بات۔
