واب مٹّ بوتگ اَنت

نبشتہ کار: مھراج بلوچ

واب مَٹ بوتگ اَنت، واب راست اَنت یا پہ اولی گام، بلے واب مردم ءِ اَندر ءِ چراگ اِنت کہ تھاری ءِ راہ ءَ پیشدار اِیت۔ واب کہ گندے مُردم گْوش ئے وت ءَ گوں یک مُول ءُ مُرادے ءَ ھمگرنچ کنت، بلے ھر واب راست نہ بیت ءُ بوت کنت کہ واب ءِ راستی ھم تہ ءَ اِنت۔ واب تھنا گندگ ءِ واستا نہ اِنت، آ پہ مردم ءِ چکاسگ ءَ اِنت۔

من ھم واب دیستگ، مزنیں واب، رُوژنائیں واب، ھما واب کہ من وتی سرجمیں ھستی ءِ تہ ءَ ھوار کتگ، من اے گپ پکّا زانت کہ من واباں راستی ءَ بدل کناں، بلے وھدے راستی دیم ءَ اتک گڑا واب بدل بوتگ اَت اَنت ءُ نوں آ واب منی نہ اِنت. بس ایشانی گُنج مان ایت کہ آئی ءِ تہ ءَ یک بے تواریں دردے پَشت کپتگ۔

باور ءِ زوال:
یک زمانگے ءَ باور منی مستریں ھمراہ بوتگ۔ من جُھد وتی ایمان ءُ وھد ءَ وتی سلاہ جوڑ کتگ، بلے واب ءِ بدل بوَگ ءَ گوں باور ھم ھلاس بوت۔ ھر اُمیت کہ گوں واباں بندوک اِنت، نوں کم کم ءَ ٹُکّر ٹُکّر اِنت۔ دل اوں ھما نہ اِنت، ھما جاہ ءَ کہ یک وھدے ءَ آچش بوتگ ءُ نوں ھاک اِنت۔ نوں جُھد ھم چو کوھنیں کسھے ءَ یات اِنت، بلے انسان ءِ زیبائی ایش اِنت کہ آ ھرچ وڑ بہ بیت ھم سرجمیں پْروش ءَ نہ منّ اِیت۔ بوت کنت ھمے سرکشّی ءَ زندگی گْوش اَنت۔

زندگی ءِ سرکشی:
من ءَ اے گپ ءِ سرپدی رستگ کہ وھدے مرد ٹکّ اِیت گڑا آ راستیاں سرپد بیت، واب ءِ بے سوبی راستی ءَ مُردم ءِ نوکیں آگھی ءِ بندات اِنت۔ ما وتی گُڈّی ساہ ءَ داں جھد کن اِیں، پرچا کہ دل ءَ باور نہ بیت کہ ھر چیز ھلاس بوتگ۔
ھمے زِد مارا پد ءَ واب گندگ ءِ ھاٹیگ ءَ دنت، ھمے زِد مارا زندگ کنت۔

مزنیں وابانی پلسپہ:
نوں من سرپد بوتگاں کہ واب مدام مزن بہ بنت، کسانیں واب مارا آسراتی دے اَنت بلے مارا بدل نہ کن اَنت۔ مزنیں واب مارا ٹُکّ اَنت، بلے مارا نوک کن اَنت۔ پرچا کہ ھرچی مزن تِر اِنت ھما وڑ ءَ شرتِر اِنت۔ مزنیں واب تھک ءُ تاگت کن اَنت، بلے ھمے واب زند ءِ بزانت ءَ وانین اَنت۔ یک مردمے ءَ گوں وت ءَ آشنا کن اَنت، ءُ برے برے آ ھم آئی ءَ چہ وت ءَ جتا کن اَنت بلے اے جتا بوَگ راستیں پجّار ءِ نیمگ ءَ بارت آسر بلے ناسرجم نہ اِنت۔

واب مَٹ بوتگ اَنت:
وابانی مٹّگ ءَ ھور تب زانتی ھم مَٹ بوتگ اَنت۔ زندگی ءِ رپتار ھم بوت کنت بدل بوتگ، بلے واب گندگ ءِ واھگ انگت زندگ اِنت۔ پرچا کہ اگاں واب مَٹ بہ بنت، گڑا چے بیت؟ ھما وھد ءَ کہ مردم ءَ واب گندگ ءِ توکل ھست، آ زندگ اِنت۔ آ سرجم اِنت، آ وت اِنت، ءُ آ جُنزگ ءِ ھاٹیگ دار اِیت، اگاں ناں۔۔۔۔۔۔۔۔۔۔۔