نبشتہ کار: ازیز سنگھور
رجانکار: بانڑی بلوچ
22 اکتوبر 2025 ءِ بیگاہ ءَ سند پولیس ءِ اسپیشل انویسٹی گیشن یونٹ (ایس آئی یو) ءِ کارمنداں چاردہ (14) سالی ئیں ارپان بلوچ ءَ چہ کراچی ءِ ھند آئیشہ منزل ءَ گوں دگہ سے سنگت ءَ آوار جتگ اَت۔ پولیس ءِ گْوشگ اَت کہ آیان ءَ کیسے ءِ بنیاد ءَ آوار جتگ، بلے لھتیں روچ ءَ پد پولیس ءَ وت منّ اِت کہ ارپان ءَ ھوار چاریں ورنا بے میار اَنت۔ سے آزار دیگ ءَ پد آجو کنگ بوتگ ءُ چارمی ارپان بلوچ پد ءَ پہ سلامتی واتر نہ بوت۔
23 اکتوبر ءِ بیگاہ ءَ پولیس ءَ کھول ءَ را گوں یک لھمیں گالوارے ءَ ھال دات کہ شُمئے زھگ چہ ھارٹ اٹیک ءِ سَوب ءَ بیران بوتگ، بیا اِت لاش ءَ بہ بر اِت۔ لاش جناہ نادْراھجاہ ءِ سرد جاہ ءَ ایر اَت۔
ارپان بلوچ بھالپور ءِ ھند بیٹ اھمد ءِ جاہ منند اَت، یک کسانین میتگے اُود ءَ انوگیں سیلاب ءَ ھاک ءِ گس، ملک، واب ءُ واھشت دُرستیں برت اَنت۔ لنگڑی ءُ بے روزگاری ءَ آئی ءَ پہ کراچی ءَ آھگ ءَ لاچار کرتگ اَت۔ بلے اِد ءَ آئی مزدوری نہ کرت ءُ کُشگ بوت، پولیس ءِ رپورٹ ءِ رد ءَ ارپان ءَ بندیگجاہ ءِ میان ءَ دل ءَ گپتگ ءُ بیران بوتگ، بلے ھندی مردم، چم دیستگین ءُ یل بوتگیں سے ورنایاں ھمے گْوشتگ کہ چو رسترانی وڑ ءَ آزار دیگ بوتگ۔ آئی جان ءَ کرنٹ، لٹّانی ٹپّ ءُ آزار تچک ءَ گندگ بوتگ اَنت۔ ارپان ءِ میار بس ھمیش اَت کہ آ “بلوچے” اَت۔
اگاں آ ڈیرہ جات ءِ بلوچے بہ بیت، سِند ءِ بلوچے بہ بیت یا بلوچستان ءِ، گوں اے بچّار ءَ زندگ بوَگ نوں میارے جوڑ بوتگ۔
ریاست ءَ بلوچ چہ آئی پجّار ءَ زبھر کُرتگ، تھنا یک ”شکی ئیں“ شھری یے جوڑ کرتگ۔ نوں پہ بلوچ ءَ پجّار کارڈ ءِ سر ءَ نبیسّوکیں ”پاکستانی“ بوگ ھم بس نہ اِنت۔ پولیس وھدے کہ بلوچ ورنایے گند اِیت، گڑا آئی چماں آ یک ٹوھیں میار بارے بیت۔ ھمے مارشت ارپان بلوچ ءِ وڑیں زھگانی لاشاں سردجاھاں بارت۔
ارپان بلوچ ءِ ویل نہ اولی اِنت ءُ نہ گُڈّی بیت۔
چہ بلوچستان ءِ کوھاں بہ گِر داں سِند ءِ دریا ءَ، چہ ڈیرہ جات ءِ کوچگاں بہ گر داں کراچی ءِ دمکاں بلوچ بوَگ نوں یک شکے جوڑ بوتگ۔ کدی ناشرکار، کدی گدار، کدی کاچاک ءُ کدی چہ ریاست ءَ ڈنّ ءِ ناشرکار، اے دُرستیں بُھتامانی پُشت ءَ یک گپّے ھست، آ بلوچ بوَگ اِنت۔ ارپان ءِ وڑیں سدانی کچ ءَ ورنا پمیشکا آزار دیگ ءُ کُشگ بنت کہ آیانی نام ءِ دیم ءَ بلوچ نبشتہ اِنت۔ ارپان ءِ کسّہ ھمے پیشدار اِیت کہ پاکستان ءَ بلوچ بوَگ نوں تھنا یک راجے نہ، یک بھتامے جوڑ بوتگ۔
بلوچ اگاں پہ وتی ڈگار ءَ گپ بہ کنت گڑا آجوئی لوٹوک گْوشگ بیت، اگاں شھر ءَ مزدوری ءَ بیت گڑا شکی اِنت، اگاں بے توار بہ بیت گڑا آ گیر زمہ دار اِنت، انچوش کہ پہ بلوچ ءَ پھریزگ ءِ ھچ راہ ءُ در پشت نہ کپتگ۔ ارپان بلوچ بیران بوت، بلے آئی کسّہ زندگ اِنت۔
اے کسہ ھمے پیشدار اِیت کہ بلوچ مزدورے بہ بیت یا شائر، نودربر ے بہ بیت یا ڈاکٹرے دُرس یکیں ھساب ءَ شکی چارگ بنت۔ ریاست اگاں چنچو پندل بہ ساز اِیت، بلے ارپان بلوچ ءِ لاش اے دُرستیں دُروگانی سر ءَ یک زندگیں جُستے۔ گُڈّی ءَ بلوچ بوَگ چہ کدی میارے جوڑ بوتگ؟
