نبشتہ کار: کوھی بلوچ
سیزدَہ نومبر بلوچ راجدپتر ءِ ھما روچ اِنت کہ گوں ھون ءُ کُربانی ءِ کِسّھاں سمبھینگ بیت۔ اے ھما روچ اِنت کہ بلوچ سرڈگار ءِ پھازگ ءُ راجی آجوئی ءِ پھازگ ءَ بامردیں سراں وتی سر نَدْر کُرت اَنت، ءُ مروچی ھم بلوچ کُربانی دیگ ءَ اَنت۔ اے روچ تھنا گْوست ءِ یات نہ اِنت، بلکیں پہ آیوکیں پدریچ ءَ یک بے بھائیں درسے کہ پہ آجوئی ءَ کُربانی دیگ ھژدری اِنت ءُ ابید ء کُربانی ءَ آجوئی ءِ واب گِندگی نہ اِنت۔
وھدے کہ کجام راج وتی شھیداں شموش اِیت یا آیانی داتگیں کُربانیاں شموش اِیت، گڑا اے پیمیں راج پہ ابد گُلام، زُلم ءُ زوراکی ءِ دیمپان بیت ءُ آئی ءِ نام ءُ نِشان، راجی پَجّار، گْوست، زُبان، دود ءُ ربیدگ ھم گار بہ اَنت ءُ گوں گُلامی ءَ زند گوازین اِیت۔ ھما راجاں کہ وتی شھید بوتگیں پُسگ یات نہ کُتگ اَنت، گُڑا مرچی آ راجانی نام ءُ نِشان گُمسار ءُ ھچ رنگ ءَ ودی نہ بیت۔
اے شھیدانی تہ ءَ زانتکار، نودَربَر، اُستاد، گْونڈیں چُک ءُ وُرنا، شائر، نِبشتہ کار ءُ پیریں مردم ھوار اَنت، ایشاں نہ ایوک ءَ وتی سر نَدْر کُرتگ اَنت، بلکیں راج ءِ وشیں باندات ءِ بُنھِشت ھم ایر کُتگ کہ پہ آجوئی ءِ ھاتِر ءَ کُربانی دیگ ھَژدَری اِنت۔ شھیدانی داتگیں کُربانی پہ راج ءَ شان ءُ رُژن ءِ آدینک اَنت، آیانی کُربانی بلوچ راج ءِ یکمُشتی ءُ دُژمن ءِ نِزور کنگ ءَ داں برجاہ دارگ بیت اِنت۔ انچوش کہ بلوچ رَھشون گْوش اَنت کہ “شھید ھما اَنت کہ نہ مِر اَنت آ نَمیراں بنت.“ گُڑا مروچی ھم ھما شھید مئے میان ءَ زِندگ ءُ آجوئی ءِ جُھد ءَ ھوار اَنت۔ آیانی داتگیں کُربانی، جُھد ءُ جپاکشی، رِتکگیں ھید ءُ ھون مارا پہ جُھد کنگ ءَ لاچار کن اَنت ءُ مُدام ھمے سِکین ءَ دے اَنت کہ جُنزگی اِنت، پند بُرگی اِنت، کُربانی دیگی اِنت ءُ ھما راھاں روگی اِنت کہ آ راہ تئی راج ءَ یک وشیں بانداتے بہ دنت۔
بلوچ شھیدانی داتگیں کُربانی چو دْرپشوکیں اِستال ءَ پہ بلوچ راج ءَ یک رُژنائی یے کہ ھمک تھاریں شپ ءُ کِشکاں رُژنا کنت۔ اگاں مرچی بلوچ راج وتی سر ءَ پہ پھر ءُ شان چِست ءُ وت ءَ بلوچ گْوش اِیت، گُڑا اے ھمے شھیدانی داتگیں کُربانیانی برورد اِنت۔ سیزدَہ نومبر ایوک ءَ یک ماھے نہ اِنت کہ کئیت، بلکیں یک گْوستانک ءُ یک راجدپترے۔ اے ھما روچ اِنت کہ بلوچ ءِ بچاں وتی سر نَدْر کُرتگ اَنت، بلے زمین اِش نہ بکشات۔
کُلیں شھیدانی داتگیں کُربانی یک ھِساب اَنت ءُ بے ھیال نہ بہ اَنت، آیانی کِرد، پِگر ءُ لیکہ، تمردی، اِیمانداری ءُ اُوپار راجدپتر ءِ تاکانی تہ ءَ نبیسگ بنت ءُ مئے جُھدے، جُنزے ءُ ھیالانی تہ ءَ ھر ساھت ءُ دمان مئے چمّانی دیم ءَ اَنت۔ ”سیزدَہ نومبر“ بلوچ شھیدانی روچ ءِ نام ءِ دیگ ءِ مول ءُ مراد ایش اِنت کہ بلوچ راج ءِ کُلیں شھید یکیں روچ ءَ یات کنگ بہ بہ اَنت، آیانی کِرد ءُ داتگیں کُربانی پہ بلوچ راج ءَ، جُھد ءُ جپاکشی پہ گُلامیں راج ءَ، گوں زوراک ءَ مِڑگ ءُ وتی زمین ءِ پچگِرگ ءَ ھوار۔
اے راست اِنت کہ مرچی بلوچ راج وتی جِند ءِ سرڈگار ءِ سر ءَ یک گُلامیں زِندے گْوازینگ ءَ اِنت، زورگریں ریاست آئی ءِ چُکچینی ءَ کنگ ءَ اِنت ءُ بلوچ نودَربَراں، وانِندَہ ءُ زانتکاراں، شائر ءُ نِبشتہ کاراں گار ءُ بیگواہ ءُ پد ءَ آیانی جوناں ماں گیابان ءَ چگل دیگ ءَ اِنت۔ بلے بلوچ راج ءَ را اے جُھد دیم ءَ برگی اِنت، کُربانی دیدگی اِنت ءُ راجدپتر ءَ وتی نام ایر کنگی اِنت۔ بلوچ شھیدانی داتگیں کربانی ھما دْرپشوکیں اِستال اِنت کہ ماں تھاریاں چِراگ بالین اَنت۔ آیاں اے تچک کُت ءُ پیشداشت کہ زوراک ءِ دیم ءَ سرجھل کنگی اِنت، بلکیں گیش کُربانی دیدگی اِنت ءُ ھمے کُربانی اِنت کہ تئی راجدپتر ءَ نوک کنت۔ اے شھیدانی داتگیں کُربانی بے سوب نہ بہ اَنت، الم مئے زمین آجو بیت ءُ لگوریں دُژمن بے سوب بیت۔
