نبشتہ کار: بچکند گُرک
من 2023 ءَ رسانکدر ءَ اَتکاں لبزانکی دیوانانی ھوار بوگ بندات کت، بلے من بانک مرواہ بلوچ ءِ نام بھ لبزانکی پِڑ ءَ نہ اِش کتگ اَت۔ اناگہ ءَ یک روچے من“راجی زبان دربرجاہ دیوان ءَ “ نمبرے دیست جُست ءُ پُرس کنگ ءَ اَت، بلے سکیں ھاموشیں گْوھارے اَت۔ بھ وتسر ءَ وھد زوال نہ کتگ ئِے، مدام گوں وانگ ءُ دربرگ ءَ دلگوشے داتگ۔ من دیوان ءِ تہ ءَ بانک مرواہ بلوچ جُست ءُ پُرس کنگ ءَ دیستگ، من مدام ھمے جیڑ اِتگ اے گْوھار وت ءَ لبزانک ءِ پڑ ءَ نامداریں نامے دنت۔ اے گْوھار ءِ دست ءِ ند نیمراہ ءَ پروش نہ وارت اوشت ءِ آماچ نہ بیت، وھد گوں وتی گاماں جنزان اَت۔ من گوں اے ڈی دشتی نامیں سنگتے ءَ لبزانک ءَ دپ کپتاں، من ءُ اے ڈی دشتی ءَ لبزانک ءِ باروا گپ ءُ تران بندات کت لبزانکی دیوانانی، آ من ءَ جُست ءَ اَت ءُ من آئی ءَ جست ءَ اِتاں، گڑا اے ڈی دشتی ءَ من ءَ یک ءُ دو دیوان ءِ نام دات ءُ گْوشت ئِے من اے دیواناں ھواراں ترا چہ ایشاں کجام دیوان ءَ ھوار بہ کنائیناں؟ من “دشیتاری لبزانکی دیوان“ دیست من اے ڈی دشتی ءَ گْوشت من ءَ اے دشیتاری لبزانکی دیوان ءَ ھوار کنائیں تئی مننتوار باں۔ اے ڈی دشتی ءَ گْوشت شر من ترا ھوار کنائیناں ءُ انوں تئی نمبر ءَ کارمسترے ءَ دیاں ترا ھوار کنت، گڑا من کمو چہ دمگ ءَ گستا بوتاں واتر اَتکاں چار اِت من ءَ ناکو ارمان بے وس ءَ دیوان ءَ ھوار کتگ اَت۔ گْوھار ءُ براتاں من ءَ وشاتک کتگ اَت، ھمے وشاتک کنوکانی تہ ءَ شیرزالیں مرواہ بلوچ ءِ ھم نام ھوار اَت۔ من درستیں برات ءُ گْوھارانی منت گپت دیوان ءَ نشتاں، سال 2024 اَت کہ دشیتاری لبزانکی دیوان ءَ من ھوار بوتاں من شیرزالیں مرواہ بلوچ دیست ھمے دیوان ءِ کارمسترے اَت۔
من چہ ھمے دیوان ءَ شیرزالیں مرواہ بلوچ ءِ زمہ واریاں گندگ ءَ اِتاں چہ پیسریگیں جیڑگ ءَ منی جیڑگ گیشتر بوت اَنت، دل ءَ مدام ھمے جیڑ اِت اے گْوھار ءَ کہ زبان ءِ پڑ ءَ گام ایر کتگ اَنت الم یک روچے وت ءَ رژنائیں نامے دنت ءُ وت ءَ اے جھد ءِ پڑ ءَ نامدار کنت۔ مدام سھب ءَ مھلہ دیوان ءِ بنگپ ئِے ایر کتگ پد ءَ بنگپ ءَ وت ھم جوانیں رنگے ءَ بھرے زرتگ۔ شیرزالیں مرواہ بلوچ ءِ ایر کتگیں بنگپ گیشتر گوں چاگردی ءُ بلوچی دود ءُ ربیدگانی بوتگ اَنت، نشہ ءُ نپ ءُ تاوان ءِ سر ءَ بوتگ اَنت، زالبوال ءُ مردین ءِ پرک ءُ پیرانی سر ءَ بوتگ اَنت، پد ءَ دیوانے ءَ ھر ھیال ءِ مردم ھوار اِنت۔ ھر کس وتی ھیال ءَ وتی وڑ ءَ درشان کنت، کسے زالبوالاں نزورتر پھم اِیت ءُ کسے مردیناں نزورتر پھم اِیت، ھر کسی ھیال ءُ لیکہ وتی وڑ ءَ اَنت۔ کسے دود ءُ ربیدگانی سر ءَ گپ جنت ھما بنگپ دیوان ءَ ایر کنگ بوتگ ھما بنگپ ءِ سر ءَ دیوان ءِ باسکاں بھر زرتگ، کسے ءَ کمو نبیس اِتگ ءُ کسے ءَ باز نبیس اِتگ کسے ءَ وت ءَ چہ بنگپ ءَ بے بھر نہ کتگ، وھدے من شیرزالیں مرواہ بلوچ ءِ ھیال ءُ لیکہ ونتگ اَنت گڑا آئی ءِ تہ ءَ ھر مارشت گوں چاگرد ءُ دود ءُ ربیدگاں بندوک بوتگ اَنت۔ چہ شیرزالیں مرواہ بلوچ ءِ گالاں آئی ءِ تھ ءِ راجدوستی ءُ زباندوستی ءِ مھر ءُ مھروانی زاھر بوتگ اَنت، گْوھار مرواہ ءَ گوں راج ءُ زبان ءَ چنچو مھر ءُ دوستی ھست۔ برے برے ھمے دیوان ءَ ھما وت ماں وتیں جیڑہ بوتگ انت کسانکیں گپانی سر ءَ جیڑھے بندات بوتگ، بلے شیرزالیں مرواہ ءَ ھر برات ءُ گْوھار گوں سبر ءُ اوپار ءَ سرپد کتگ اَنت۔ گوں برات ءُ گْوھاراں سکا مھروان بوتگ، براتے جھل تر ءُ گْوھارے برزتر نہ کتگ ئِے، گْوھار ءُ برات گوں یک چمے ءَ چار اِتگ اَنت ئِے۔ پد ءَ ھما وھد ءِ نہ رسگ ءِ سبب ءَ چہ دیواناں دراتک شت بزاں چہ لبزانک ءَ گستا بوت اے راستے کہ وھد زوراک اِنت ھر وھد ءَ یک دابے ءَ نہ جنز اِیت، شیرزالیں مرواہ پد ءَ وتی وانگجاہ ءَ روگ ءُ آیگ ءَ بوتگ وھد کم بہ بیت سر ءِ زمہ واری گیش بہ بنت اینچک زمہ واری یک مردمے وتی سر ءَ کت نہ کنت۔ من مدام اگاں گْوھار ءِ ھال گپتگ گڑا آئی ءَ من ءَ ھمے گْوشتگ ”لالا وھد نہ بوتگ من دیوان یلو داتگ اَنت، کتاب وانگ ءَ آں وانگجاہ ءَ روگ ءُ آیگ ءَ آں ، وھد رس اِیت دیواناں ھوار باں۔“
بلے مرچی من رسانکدر ءَ وٹس ایپ ءِ دیواناں شیرزالیں مرواہ بلوچ ءِ رجانک کتگیں کتاب ءِ جار دیست من چہ بازیں گل ءَ زمین ءَ نہ بوتاں، انچوش سما بوت اے منی زندمان ءِ وشتریں روچاں چہ یک روچے کہ گْوھارے ءَ پہ زبان ءَ جھد کتگ ءُ وت ءَ رژنائیں نامے داتگ ئِے۔ چوناھیا مردمے دری زباناں بہ وان اِیت دری زبانانی رجانک کنگ چوشیں بلاھیں کارے نہ اِنت، بلے رجانککاری ءِ تہ ءَ ھم لھتیں نپ ءُ نکسان بنت، بلے شیرزالیں مرواہ ءَ اے چیز درست چار اِتگ ءُ دربرتگ اَنت ئِے۔ من اگاں پہ زبان ءَ وھد کش ات کناں دری کتابے وتی زبان ءَ رجانک کت کناں، گڑا من ءَ کتاب وانگی اِنت آئی ءِ تہ ءِ ھر گالانی بزانت پٹگی اَنت۔ من کتابے واناں آئی ءِ رجانک کنگ ءَ بندات کناں، گڑا کتاب ءِ وانگ ءَ پد وانوکاں چے نپ دنت آ چہ اے کتاب ءَ چِہ سرپدی زیر اَنت، بلے شیرزالیں مرواہ ءِ گچین کتگیں کتاب بے دروریں کتابے۔ کتاب ءِ نبیسوک جھدکار ءُ نبشتہ کارے بوتگ۔
مرچی شیرزالیں مرواہ ءِ ند ءَ زبانے رکینتگ اے پدّر ئِے کتگ، زالبوال ھر پڑ ءَ وتی گاماں ایر بہ کن اَنت وتی منزال ءَ سوبین ءُ باج بر اَنت، بلے زالبول ھما وھد ءَ نزوریانی دیمپان بنت پہ راج ءُ زبان ءَ ھچ کت نہ کن اَنت۔ آیانی هیال پلگ بنت، مکن کنگ بنت، زالبوالانی سر ءَ پادبندی بہ لگ اِیت چوں زندے ءَ لوگ ءَ بندیگ کنگ بہ بنت، پد ءَ بلوچی ءِ نام ءِ سر ءَ مکن کنگ ءُ گْوشگ بنت تو بلوچیں چکے ئے اینچک ونتگ ترا بس اِنت، بلے آئی ءَ کدی اے گْوشگ نہ بیت تو بلوچی چکے ئے ترا راجے ھست، ترا زبانے ھست، تو پہ وتی راج ءُ زبان ءَ جھد کن ایشانی بھازگ ءِ جھد ءَ بہ کن، زبان تئی پجّار اِنت تئی زندگ کنوک اِنت تئی زبان زندگ بہ بیت گڑا تو جھان ءَ نامے کار ئے ءُ زندگ مان ئے، مرچی ما تمپ ءِ دلبند ءَ وپتگیں لمہ کریمہ ءِ جھد ءِ نیمگ ءَ بہ چاریں گڑا ما گند اِیں لمہ ءِ کُشتگیں پُلاں بر پر کتگ، انچوش مئے گْوھار مرواہ بلوچ ھم یک ویرانیں میتگے ءَ ودی بوتگ کہ اود ءَ ھچ چوشیں چیز نیست کہ مردم زندے ءِ گْوازینگ ءَ لاچار اَنت وانگ ءُ وانگجاھانی گیشتر جیڑہ ھست، ھر کس چہ وانگ ءُ زانگ ءَ زبر اِنت پہ وانگ ءُ دربرگ ءِ واستا دگہ شھراں رو اَنت شال، کیچ ءُ گودار ھر کس وتی کنجائیش ءِ ھساب ءَ یک شھرے ءَ پہ وانگ ءِ واستا روت، چوش کہ ما بہ چار اِیں شیرزالیں مرواہ ءَ ھم وانگ ءُ زانگ ءِ واستا پندے بر اِتگ دگہ شھرے ءَ پہ وانگ ءِ واستا شتگ، بلے مرواہ بلوچ ءَ اے ھم نہ زانتگ من پندے جناں، میتگے یلو کناں شهرے ءَ رواں، رسانکدری دنیایے ءَ من ءَ وٹس ایپی وانگجاھاں بلوچی زبان ءِ وانگ ءُ دربرگ ءِ موہ رس اِیت، بلے وھدے شیرزالیں مرواہ ءِ سر ماں رسانکدری دنیایے ءَ کپتگ لبزانک ءِ پڑ ءَ اَتکگ گڑا شیرزالیں مرواہ ءَ گوں دری زباناں ھوار وتی زبان ھم ونتگ ءُ وانینتگ ئِے۔ چہ دری زبانانی وانگ ءَ وت ءَ بلوچی زبان ءِ تہ ءَ نامدار ءُ رژنائیں نامے داتگ ئِے، ما وتی دل ءَ دلجم اِیں کہ شیرزالیں مرواہ ءَ وھد کش اِتگ ءُ پہ زبان ءَ جھد کتگ، مرواہ بلوچ ءِ ھم کشتگیں درچک بر کار اِیت ءُ ھر زالبوال وت ءَ لبزانک ءَ ھمگرنج کنت، گڑا گوں شوکیں دابے ءَ پہ زبان ءَ کار کنت۔
سلامت ءُ سوبین بات ئِے شیرزالیں گْوھار، مئے دُوا اِنت تئی دست ءِ ند چد ءُ گیشتر مھکم بات ءُ نبیسان بات، تئی دست ءِ ند ءَ پہ زبان ءَ رنگے آرؤتگ ءُ ترا نامداریں نامے داتگ ئِے۔
بلوچستان ءُ بلوچی زبان زندگ بات اَنت۔
